ໂບອິງ ປະກາດຢຸດໃຊ້ຍົນ ລຸ້ນ 737 ແມັກ ທົ່ວໂລກ

ໂບອິງປະກາດຢຸດການໃຊ້ຍົນໂບອິງ 737 ແມັກທົ່ວໂລກ ຫຼັງການສືບສວນພົບຫຼັກຖານໃໝ່ໃນຈຸດເກີດອຸບັດເຫດຍົນຂອງສາຍການບິນ ເອທີໂອປີ ຕົກເມື່ອວັນທີ 10 ເດືອນມີນາທີ່ຜ່ານມາ ເຊິ່ງເປັນການຕົກ ຄັ້ງທີ 2 ໃນຮອບພຽງ 5 ເດືອນຂອງຍົນລໍານີ້ ຈົນເກີດກະແສຄວາມກັງວົນລຸກລາມໄປທົ່ວໂລກ.

ບໍລິສັດ ໂບອິງແຈ້ງການໃຫ້ຍົກເລີກການໃຊ້ຍົນ ລຸ້ນ 737 ແມັກ ທັງ 371 ລໍາ ທີ່ໃຊ້ຢູ່ໃນຂະນະນີ້ ໂດຍຄໍາປະກາດດັ່ງກ່າວມີຂຶ້ນ ຫຼັງຈາກ ອາເມຣິກາ ເຊິ່ງເປັນທີ່ຕັ້ງບໍລິສັດໂບອິງກໍໄດ້ປະກາດຫ້າມການໃຊ້ຍົນໂບອິງ 737 ແມັກ ຕາມຫຼັງ ກວ່າ 50 ປະເທດໃນໂລກ ທີ່ປະກາດຫ້າມຍົນດັ່ງກ່າວບິນເໜືອນ່ານຟ້າໄປກ່ອນໜ້ານີ້ແລ້ວ.
ສໍານັກງານບໍລິຫານການບິນແຫ່ງຊາດ ອາເມຣິກາ ຂະນະນີ້ໄດ້ພົບຫຼັກຖານໃໝ່ລວມເຖິງຂໍ້ມູນຈາກຮູບຖ່າຍດາວທຽມ ຈຶ່ງເຮັດໃຫ້ຕັດສິນໃຈມີຄໍາສັ່ງຫ້າມການໃຊ້ຍົນລຸ້ນດັ່ງກ່າວເປັນການຊົ່ວຄາວ.

ເຈົ້າໜ້າທີ່ສໍານັກງານບໍລິຫານການບິນແຫ່ງຊາດ ອາເມຣິກາ ລາຍງານຫຼັງການລົງເກັບຂໍ້ມູນໃນປະເທດ ເອທີໂອປີ ວ່າມີຄວາມແນ່ນອນແລ້ວວ່າເສັ້ນທາງບິນຂອງສາຍການບິນ ເອທີໂອປີ ທີ່ເກີດອຸບັດເຫດຕົກມີຄວາມໃກ້ຄຽງ ແລະ ມີລັກສະນະດຽວກັບຍົນໄລອອນແອທີ່ຕົກເມື່ອປີກ່ອນ.

%d bloggers like this: