ຢູ 12 ນະຄອນຫຼວງວຽງຈັນ ຄວ້າຮອງແຊັມບານເຕະຊີງແຊັມນາໆຊາດທີ່ໄທ

ທີມນັກເຕະເຍົາວະຊົນຮຸ່ນອາຍຸບໍ່ເກີນ 12 ປີ ນະຄອນຫຼວງວຽງຈັນ ຕົວແທນຈາກ ສປປ ລາວ ສ້າງຜົນງານຢ່າງໂດດເດັ່ນ ເຖິງວ່ານັດຊີງຊະນະເລີດຈະພາດທ່າເສຍໃຫ້ ທີມຊາດໄທ ຫວຸດຫວິດ 1 – 0 ປະຕູ ໃນນັດຊີງຊະນະເລີດການແຂ່ງຂັນເຕະບານເຍົາວະຊົນ ຢູ 12 ຊີງແຊັມນາໆຊາດ ( Bangkok International Junior Thailand 2019 ) ລະຫວ່າງວັນທີ 11 – 14 ມີນາ 2019 ທີ່ນະຄອນຫຼວງບາງກອກ ປະເທດໄທ ສົ່ງຜົນໃຫ້ ຂຸນພົນ ນັກເຕະນະຄອນຫຼວງໄດ້ພຽງຫຼຽນເງິນ.

ການແຂ່ງຂັນນັດຊີງຊະນະເລີດ ລາຍການ Bangkok International Junior Thailand 2019 ມີຂຶ້ນເມື່ອວັນທີ 13 ມີນາຜ່ານມາ ທີ່ສະໜາມກີລາເຕະບານ ກອງບັນຊາການທະຫານໄທ ເມືອງງາມວົງວານ ນະຄອນຫຼວງບາງກອກ ປະເທດໄທ ໃຫ້ກຽດເຂົ້າຮ່ວມ ແລະ ມອບຫຼຽນລາງວັນ ແລະ ຂັນຊະນະເລີດຂອງ ທ່ານ ພົນເອກ ພອນພິພັດ ເບັນຍະສີ ຜູ້ບັນຊາການທະຫານສູງສຸດແຫ່ງປະເທດໄທ, ມີບັນດານາຍ ແລະ ພົນທະຫານ, ຄະນະນຳ, ຄູຝຶກ ແລະ ນັກກີລາ ຈາກ 6 ຊາດ ຕະຫຼອດຮອດບັນດາກອງເຊຍຈາກປະເທດຕ່າງໆ ແລະ ພໍ່ແມ່ປະຊາຊົນຊາວໄທ ເຂົ້າຮ່ວມຊົມ ແລະ ເຊຍຢ່າງຫຼວງຫຼາຍ.

ການແຂ່ງຂັນນັດຊີງຊະນະເລີດ ປາກົດວ່າ: ຕະຫຼອດໄລຍະການແຂ່ງຂັນ ທັງສອງທີມສູ້ກັນໄດ້ຢ່າງດຸເດືອດສູສີ ແລະ ກ່ອນຈະໝົດເວລາ 50 ນາທີ ເຫຼືອພຽງ 5 ນາທີ ໃນທ້າຍເກມ ຂຸນພົນ ນັກເຕະນະຄອນຫຼວງວຽງຈັນ ເຮັດບານພາດຖືກ ເຍົາວະຊົນທີມຊາດໄທ ຍິງແຊງຂຶ້ນນຳ 1 – 0 ປະຕູ ແລະ ເວລາທີ່ເຫຼືອ ນະຄອນຫຼວງ ບໍ່ສາມາດຕີສະເໝີໄດ້ ຈົບເກມສົ່ງຜົນໃຫ້ທີມຊາດໄທ ເອົາຊະນະໄປແບບຫວຸດຫວິດ 1 – 0 ປະຕູ ໄດ້ຂັນແຊັມ ແລະ ຫຼຽນຄຳໄປຄອງ ສ່ວນ ນະຄອນຫຼວງ ໄດ້ພຽງຫຼຽນເງິນ ແລະ ຂັນອັນດັບທີ 2 ສ່ວນທີ 3 ຕົກເປັນຂອງ ອັງກິດ, ທີ 4 ສສ ຫວຽດນາມ, ທີ 5 ຍີ່ປຸ່ນ ແລະ ທີ 6 ຮົງກົງ.

ລາຍການນີ້ ມີ 6 ປະເທດເຂົ້າຮ່ວມ ແບ່ງອອກເປັນ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດ ຄັດເລືອກເອົາທີມທີ 1 – 2 ເຂົ້າຮອບຕາມລະບຽບ, ສ່ວນທີມທີ່ຕົກຮອບຄັດເລືອກໄດ້ຊີງພຽງອັນດັບທີ 5 ສຳລັບ ກຸ່ມ ເອ ປະກອບມີ: ທີມນະຄອນຫຼວງ ສປປ ລາວ, ທີມຈາກ ສສ ຫວຽດນາມ ແລະ ທີມຈາກ ຍີ່ປຸ່ນ; ສ່ວນ ສາຍ ບີ ເຈົ້າພາບທີມຈາກໄທ, ທີມຈາກ ຮົງກົງ ແລະ ທີມຈາກ ອັງກິດ.

ສໍາລັບຜົນງານຂອງ ທີມເຍົາວະຊົນ ນະຄອນຫຼວງວຽງຈັນ ໃນຮອບແບ່ງກຸ່ມສາມາດເອົາຊະນະ ຫວຽດນາມ 3 – 0 ປະຕູ ແລະ ຊະນະ ຍີ່ປຸ່ນ 4 – 0 ປະຕູ ຜ່ານເຂົ້າຮອບ 4 ທີມ ໄປເອົາຊະນະ ທີມອັງກິດ 3 – 0 ປະຕູ ກ່ອນທີ່ໃນນັດຊີງຊະນະເລີດຈະພາດທ່າຖືກທີມຊາດໄທ ຊະນະ 1 – 0 ປະຕູ ຄວ້າຮອງແຊັມໄປຄອງ.

ຂ່າວ: ຄໍາສອນ
ຮູບຈາກ: ສົງການ

%d bloggers like this: