ມາແລ້ວ!! ຄຳຕອບຈາກພາກລັດທີ່ຫຼາຍຄົນຢາກຮູ້ ເຫດການໝອກຄວັນ

ຈາກກະແສສັງຄົມກໍລະນີໝອກຄັວນຫຼາຍຜິດປົກກະຕິໃນນະຄອນຫຼວງວຽງຈັນ ທີ່ຫຼາຍຄົນກຳລັງຄອງຄອຍຄຳຕອບຈາກພາກລັດ, ຫຼ້າສຸດແອັດມິນໄດ້ຮັບຂໍ້ມູນມາວ່າໝອກຄັວນເຫຼົ່ານີ້ຈະແກ່ຍາວເວລາໄປອີກ 2-3 ມື້ ພ້ອມນີ້ກໍ່ຮຽກຮ້ອງບໍ່ໃຫ້ປະຊາຊົນບໍຕື່ນເຕັ້ນເກີນເຫດ ຂໍພຽງແຕ່ປ້ອງກັນໂຕເອງໂດຍການໃສ່ຜ້າອັດປາກເວລາອອກນອກບ້ານເທົ່ານີ້ກໍ່ພໍ.

ອີງຕາມຂໍ້ມູນຈາກສື່ວຽງຈັນທາມ ໂດຍອ້າງອີງຄຳສຳພາດຈາກ ທ່ານ ນາງ ສີສຸພັນ ຫລວງລາດ ຫົວໜ້າກົມຄຸ້ມຄອງມົນລະພິດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມໃຫ້ຮູ້ວ່າ: ນະຄອນຫຼວງວຽງຈັນກຳລັງພົບກັບບັນຫາມົນລະພາວະທີ່ເປັນພິດຕໍ່ສຸຂະພາບ ທີ່ຢູ່ໃນເກນອັນຕະລາຍ ແຕ່ຍັງບໍ່ທັນຮ້າຍແຮງ ແລະ ຄາດວ່າ ອີກ 2-3 ມື້ໃນຕໍ່ໜ້າອາກາດຈະດີຂຶ້ນ.

ເຊິ່ງໃນວັນທີ 13 ມີນາ 2019 ຜ່ານມາ ວິຊາການຂອງກົມໄດ້ວັດແທັກປະລິມານມົນລະພິດ ໄດ້ 172 ໄມຄຣອນກຼາມ ຕໍ່ ຄິວບິກແມັດເຕີ(cubic metre) ຕໍ່ 24 ຊົ່ວໂມງ. ມື້ນີ້ ວັດໄດ້ 140 ໄມຄຣອນກຼາມ ຕໍ່ຄິວບິກແມັດເຕີ ຕໍ່ 24 ຊົ່ວໂມງ ສະນັ້ນ, ຍັງຢູ່ໃນເກນອັນຕະລາຍຕໍ່ສຸຂະພາບຂອງປະຊາຊົນແຕ່ກໍ່ຍັງບໍ່ທັນຮ້າຍແຮງຫຼາຍປານໃດ.

ໃນຂະນະທີ່ຫຼາຍຄົນໃຫ້ຄວາມສົນໃຈຊອກຮູ້ວ່າສາເຫດແມ່ນເກີດມາຈາກໃສນັ້ນ ຫົວໜ້າກົມຄຸ້ມຄອງມົນລະພິດ ໄດ້ກ່າວ່າ: ສາເຫດທີ່ພາໃຫ້ມີມົນລະພິດ ແມ່ນມາຈາກໄຟໄໝ້ປ່າຢູ່ປະເທດເພື່ອນບ້ານ ພ້ອມທັງ ໄຟໄໝ້ປ່າຢູ່ເມືອງສັງທອງ ນະຄອນຫລວງວຽງຈັນ. ເຊິ່ງປັດຈຸບັນ ເຈົ້າໜ້າທີ່ໆກ່ຽວຂ້ອງໄດ້ຄວບຄຸມໄຟໄວ້ໄດ້ແລ້ວ, ດັ່ງນັ້ນຄາດວ່າອາກາດຈະດີຂຶ້ນໃນອີກ 2-3ມື້ຂ້າງໜ້າ.

ໃນຂະນະທີ່ ທ່ານ ວັນນະ ພັນພົງສາ ຮອງຫົວໜ້າ ພະແນກຕິດຕາມ ແລະ ວິໄຈຄຸນນະພາບສິ່ງແວດລ້ອມ, ສະຖາບັນຄົ້ນຄວ້າຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ກ່າວຕໍ່ທີມຂ່າວເສດຖະກິດ-ການຄ້າວ່າ: ຝຸ່ນລະອອງມົນລະພິດເກີນຄ່າມາດຕະຖານຂຶ້ນທີ່ເກີດຂຶ້ນ ຄວັນດັ່ງກ່າວນີ້ ຖ້າສູດດົມເຂົ້າໄປຫຼາຍເກີນໄປອາດກໍ່ໃຫ້ເກີດເປັນມະເຮັງໄດ້. ສະນັ້ນ, ຄວນລະວັງຄືເດັກນ້ອຍ ແລະ ຜູ້ເຖົ້າ ໃຫ້ເອົາໃຈໃສ່ເບິ່ງແຍງເປັນພິເສດເພາະວ່າອາດເປັນພູມແພ້ທາງເດີນຫາຍໃຈໄດ້ງ່າຍ, ພ້ອມດຽວກັນນັ້ນ ຂໍໃຫ້ທຸກຄົນຢ່າແຕກຕື່ນເກີນໄປສາມາດໃຊ້ຊີວິດຕາມປົກກະຕິໄດ້ ແລະ ພຽງແຕ່ໃຫ້ລະມັດລະວັງຫຼາຍຂຶ້ນໂດຍສະເພາະການອອກກາງແຈ້ງໃຫ້ໃຊ້ຜ້າປີດປາກ-ດັງ ເພື່ອຫຼຸດຜ່ອນການສູບດົມມົນລະພິດດັ່ງກ່າວ.

 

%d bloggers like this: