ລັດຖະບານ ຍ້ອງຍໍບໍລິສັດທີ່ມອບອາກອນກໍາໄລ 1% ເຂົ້າງົບປະມານ

ກະຊວງການເງິນ ຈັດພິທີມອບໃບຍ້ອງຍໍໃຫ້ 5 ບໍລິສັດ ທີ່ຮັບເໝົາໂຄງການສາຍສົ່ງ – ສະຖານີ ແລະ ເຂື່ອນໄຟຟ້າ ຂອງລັດວິສາຫະກິດໄຟຟ້າລາວ ໃນປີ 2017 ແລະ 2018 ທີ່ໄດ້ຈ່າຍອາກອນກໍາໄລ 1% ມອບເຂົ້າງົບປະມານແຫ່ງລັດ. ດ້ານຮອງນາຍົກລະບຸຈະສືບຕໍ່ປະສານສົມທົບກັບກະຊວງກ່ຽວຂ້ອງ ແລະ ລັດວິສາຫະກິດໄຟຟ້າລາວ ເພື່ອລະດົມໃຫ້ບັນດາຜູ້ຮັບເໝົາໂຄງການທັງໝົດໃນທົ່ວປະເທດມອບເພື່ອໃຫ້ເປັນເອກະພາບ.

ທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ ກະຊວງການເງິນ ກ່າວວ່າ: ນັບແຕ່ປີ 2017 ກົມສ່ວຍສາອາກອນໄດ້ສົມທົບກັບລັດວິສາຫະກິດໄຟຟ້າລາວ ຂະແໜງການກ່ຽວຂ້ອງ ເພື່ອເກັບກໍາຂໍ້ມູນ ແລະ ເຊີນເອົາບໍລິສັດຜູ້ຮັບເໝົາເຂົ້າມາປຶກສາຫາລືຄວາມເປັນໄປໄດ້ ເພື່ອໃຫ້ການເກັບອາກອນມີຄວາມສອດຄ່ອງກັບກົດໝາຍວ່າດ້ວຍສ່ວຍສາອາກອນ ແຕ່ເນື່ອງຈາກສັນຍາຮັບເໝົາກໍ່ສ້າງສ່ວນໃຫຍ່ແມ່ນໄດ້ລະບຸແຕ່ເສຍອາກອນລາຍໄດ້ຈາກເງິນເດືອນ ແລະ ຍົກເວັນອາກອນກໍາໄລ, ອມພ ແລະ ອາກອນຊົມໃຊ້. ຂະນະທີ່ສັນຍາເງິນກູ້ລະຫວ່າງລັດຖະບານລາວ ກັບ ທະນາຄານ EXIM Bank ຂອງຈີນ ລະບຸວ່າ: ຖ້າຕ້ອງຈ່າຍອາກອນຕ່າງໆແມ່ນເປັນພາລະຂອງຜູ້ກູ້ຢືມ ແຕ່ນິຕິກຳດັ່ງກ່າວບໍ່ສອດຄ່ອງກັບມາດຕາ 98 ຂອງກົດໝາຍວ່າດ້ວຍສ່ວຍສາອາກອນ ເພາະການຍົກເວັ້ນພັນທະອາກອນແມ່ນຕ້ອງໄດ້ຜ່ານການເຫັນດີຈາກສະພາແຫ່ງຊາດ.

ในภาพอาจจะมี หนึ่งคนขึ้นไป, ดอกไม้ และข้อความ

ຜົນຂອງການຈັດຕັ້ງປະຕິບັດໃນປີ 2017 ມີ 4 ບໍລິສັດ ຈໍານວນ 9 ໂຄງການ ສາມາດຈັດຕັ້ງປະຕິບັດໄດ້ 25,68 ລ້ານໂດລາ ແລະ ປີ 2018 ມີ 7 ບໍລິສັດ ຈໍານວນ 8 ໂຄງການ ທີ່ເຫັນດີຈ່າຍອາກອນກໍາໄລ 1% ແຕ່ຈ່າຍຕົວຈິງມີພຽງແຕ່ 2 ບໍລິສັດເທົ່ານັ້ນ ຄິດເປັນເງິນ 2.914.000 ໂດລາ, ສ່ວນທີ່ເຫຼືອຈະຈ່າຍໃນປີ 2019 ແລະ ບັນດາບໍລິສັດຈໍານວນໜຶ່ງຍັງລໍຖ້າສັນຍາເງິນກູ້ກ່ອນ. ສະນັ້ນ, ລັດຖະບານຈຶ່ງໄດ້ຕົກລົງຍ້ອງຍໍໃຫ້ບັນດາບໍລິສັດດັ່ງກ່າວ ປະກອບມີ: 1). ບໍລິສັດ Sinohydro Bureau 10, Co.Ltd ກໍ່ສ້າງເຂື່ອນໄຟຟ້ານໍ້າອູ 2 ແລະ ນໍ້າອູ 5; 2). ບໍລິສັດ Sinohydro Corporation, Co.Ltd ກໍ່ສ້າງເຂື່ອນໄຟຟ້ານໍ້າງື່ມ 3, ນໍ້າຄານ 2 – 3 ແລະ ສາຍສົ່ງ 230 KV ນໍ້າອູ 5 ແລະ ນໍ້າອູ 6; 3). ບໍລິສັດ China International Water & Electric Corporation ໂຄງການສາຍສົ່ງ       500 KV ຊຽງຂວາງ – ນາຊາຍທອງ; 4). ບໍລິສັດ China National Heavy Machinery Corporation ໂຄງການສາຍສົ່ງ 230 KV ນາບົງ – ນໍ້າງື່ມ 1 – ຫີນເຫີບ, ໂຄງການສາຍສົ່ງ 500 KV ສາລະວັນ – ເຊກອງ 2 ແລະ ໂຄງການເຂື່ອນໄຟຟ້ານໍ້າງື່ມ 4; ສຸດທ້າຍແມ່ນ ບໍລິສັດ Pinggao Group International, Co. Ltd ໂຄງການສາຍສົ່ງ 230 KV ເຊຂະໝານ 2 – ເຊກອງ 2 ແລະ ໂຄງການ 115 KV ຫ້ວຍຊາຍ – ຕົ້ນເຜິ້ງ.

ในภาพอาจจะมี หนึ่งคนขึ้นไป และผู้คนกำลังยืน

ໂອກາດດຽວກັນ, ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ກໍໄດ້ໃຫ້ກຽດໂອ້ລົມໃນພິທີ ວ່າ: ອາກອນກໍາໄລ 1% ຂອງບັນດາບໍລິສັດທີ່ມອບໃຫ້ລັດຖະບານນັ້ນ ເຖິງວ່າຈະເປັນມູນຄ່າບໍ່ຫຼາຍ ແຕ່ກໍຖືເປັນການປະກອບສ່ວນສໍາຄັນເຂົ້າໃນງົບປະມານຂອງລັດ ແລະ ຍັງຈະສືບຕໍ່ປະສານສົມທົບກັບຂະແໜງການກ່ຽວຂ້ອງ, ລັດວິສາຫະກິດໄຟຟ້າລາວ ເພື່ອໃຫ້ທຸກໆໂຄງການໄດ້ມີຄວາມເປັນເອກະພາບກັນ ແລະ ຍຸຕິທຳໃນການມອບພັນທະ. ແນວໃດກໍຕາມ, ທຸກໆໂຄງການນັ້ນ ບໍລິສັດຜູ້ຮັບເໝົາສາມາດແບ່ງຈ່າຍໄດ້ຫຼາຍເທື່ອກໍໄດ້. ສໍາລັບໂຄງການຕ່າງໆທີ່ໄດ້ເຊັນສັນຍານັບແຕ່ປີ 2018 ເປັນຕົ້ນມາ ແມ່ນໃຫ້ປະຕິບັດຕາມລະບຽບກົດໝາຍ.

ພິທີມອບໃບຍ້ອງຍໍໃຫ້ບັນດາບໍລິສັດທີ່ຮັບເໝົາໂຄງການສາຍສົ່ງ – ສະຖານີ ແລະ ເຂື່ອນໄຟຟ້າ ຂອງລັດວິສາຫະກິດໄຟຟ້າລາວ ໃນປີ 2017 ແລະ 2018 ທີ່ໄດ້ຈ່າຍອາກອນກໍາໄລ 1% ມອບເຂົ້າງົບປະມານແຫ່ງລັດ ຈັດຂຶ້ນໃນຕອນເຊົ້າວັນທີ 13 ມີນາ 2019 ທີ່ກະຊວງການເງິນ ພາຍໃຕ້ການເປັນປະທານ ແລະ ມອບໃບຍ້ອງຍໍຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ມີບັນດາຜູ້ຕາງໜ້າຂອງລັດວິສາຫະກິດໄຟຟ້າລາວ ແລະ ບໍລິສັດຕ່າງໆເຂົ້າຮ່ວມ.

%d bloggers like this: