ເຝົ້າລະວັງ ແລະ ຕ້ານການລະບາດຂອງພະຍາດໝາກແດງໃຫຍ່ ໃນຂອບເຂດທົ່ວປະເທດ

ເນື່ອງຈາກຫຼາຍປະເທດໃນພາກພື້ນ ແລະ ອາຊີຕາເວັນອອກມີການລະບາດຂອງພະຍາດໝາກແດງໃຫຍ່, ເຊິ່ງປັດໄຈພື້ນຖານແມ່ນຍ້ອນອັດຕາສັກຢາກັ້ນພະຍາດໝາກແດງໃຫຍ່ຍັງຕໍ່າ ເຊັ່ນ: ປະເທດຟິລິບປິນ ມີລາຍງານວ່າພົບພະຍາດໝາກແດງໃຫຍ່ ຫຼາຍກວ່າ 12.000 ກໍລະນີ, ເສຍຊີວິດແລ້ວ 203 ກໍລະນີ, ສ່ວນປະເທດໄທລາຍງານພະຍາດໝາກແດງຢູ່ທາງພາກໃຕ້ ພົບຫຼາຍກວ່າ 1.000 ກໍລະນີ. ນອກຈາກນັ້ນ, ຍັງພົບວ່າ ພະຍາດໝາກແດງໃຫຍ່ ແມ່ນມີທ່າອ່ຽງເພີ່ມຂຶ້ນໃນເມືອງໄຊທານີ, ນະຄອນຫຼວງວຽງຈັນ.

ພາບປະກອບຂ່າວ

 

ອີງຕາມທິດຊີ້ນຳຂອງລັດຖະມົນຕີ ກະຊວງສາທາລະນະສຸກ ໃນກອງປະຊຸມປຶກສາຫາລື ເພື່ອສະກັດກັ້ນພະຍາດໝາກແດງໃຫຍ່ ທີ່ຫ້ອງປະຕິບັດງານເຫດການສຸກເສີນ ຄັ້ງວັນທີ 4 ມີນາ 2 2019 ແລະ ອີງຕາມ ການລາຍງານທາງດ້ານລະບາດວິທະຍາ ເຫັນວ່າພະຍາດໝາກແດງໃຫຍ່ມີທ່າອ່ຽງເພີ່ມຂຶ້ນ. ດັ່ງນັ້ນ, ກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ອອກແຈ້ງການ ສະບັບເລກທີ 193/ກຄພຕ ລົງວັນທີ 5 ມີນາ 2019 ເຖິງ ທ່ານຫົວໜ້າ ພະແນກສາທາລະນະສຸກນະຄອນຫຼວງວຽງຈັນ ແລະ ອຂວງ ໃນຂອບເຂດທົ່ວປະເທດ ໃຫ້ເອົາໃຈໃສ່ເຝົ້າລະວັງ ແລະ ສະກັດກັ້ນ ພະຍາດໝາກແດງໃຫຍ່.

ພາບປະກອບຂ່າວ

 

ເຊິ່ງເນື້ອໃນແຈ້ງການລະບຸໄວ້ວ່າ: ໃຫ້ເອົາໃຈໃສ່ເຝົ້າລະວັງ ແລະ ລາຍງານໝວດອາການໄຂ້ ແລະ ອອກຕຸ່ມ ທຸກກໍລະນີຢ່າງໃກ້ຊິດ; ໃຫ້ເພີ່ມທະວີການເອົາໃຈໃສ່ຕິດຕາມເຝົ້າລະວັງ. ລາຍງານ ແລະ ຄົ້ນຫາກໍລະນີສົງໃສ ພະຍາດໝາກແດງໃຫຍ່ຢູ່ໂຮງໝໍເມືອງ ແລະ ໂຮງໝໍແຂວງ, ພິເສດແມ່ນຢູ່ນະຄອນຫຼວງວຽງຈັນ, ແຂວງ ວຽງຈັນ ແລະ ບໍລິຄຳໄຊ; ເອົາໃຈໃສ່ປະສານສົມທົບກັບອຳນາດການປົກຄອງທ້ອງຖິ່ນ, ພະແນກສຶກສາ ແລະ ກິລາແຂວງ, ພະແນກຖະແຫຼ່ງຂ່າວ. ວັດທະນະທຳ ແລະ ທ່ອງທ່ຽວ ໃຫ້ສຖຂະສຶກສາວິທີປ້ອງກັນ ແລະ ຄິດຕາມເຝົ້າລະວັງ ພະຍາດໝາກແດງໃຫຍ່ຢ່າງໃກ້ຊິດ; ເອົາໃຈໃສ່ເພີ່ມທະວີວຽກງານໂຄສະນາສຸຂະສຶກສາແກ່ປະຊາຊົນ ເນັ້ນໜັກການປ້ອງກັນການແຜ່ເຊື້ອພະຍາດເຊັ່ນ: ອັດປາກເວລາໄອ-ຈາມ, ລ້າງມືໃສ່ສະບູທຸກຄັ້ງ ເມື່ອສຳຜັດກັບຄົນເຈັບທີ່ເປັນພະຍາດໝາກແດງ ແລະ ກິນອາຫານທີ່ປຸ່ງແຕ່ງສຸກດີ.

ພາບປະກອບຂ່າວ

 

ໃຫ້ເອົາໃຈໃສ່ກວດກາຄືນອັດຕາໃຫ້ວັກຊີນກັນພະຍາດ, ສ້າງຂະບວນການໃຫ້ວັກຊີນປ້ອງກັນພະຍາດ ແລະ ແນະນຳປະຊາຊົນໃຫ້ລູກຫຼານໄປຮັບວັກຊີນກັນພະຍາດໃຫ້ຄົບ. ສຳລັບໂຮງໝໍແຂວງ-ເມືອງ ໃຫ້ກະກຽມຄວາມພ້ອມທາງດ້ານວິຊາການໃນການປິ່ນປົວ ແລະ ປ້ອງກັນໃຫ້ແກ່ພະນັກງານແພດໝໍ ແລະ ພະຍາບານ, ກວດກາຄວາມພ້ອມດ້ານອຸປະກອນຮັບໃຊ້, ຢ່ປິ່ນປົວການຄວບຄຸມການຕິດເຊື້ອໃນສະຖານທີ່ບໍລິການທາງດ້ານສາທາລະນະສຸກ ແລະ ເກັບຕົວຢ່າງກໍລະນີສົງໃສ ເພື່ອສົ່ງກວດຢູ່ສູນວິເຄາະ ແລະ ລະບາດວິທະຍາ. ເມື່ອມີລາຍງານກໍລະນີສົງໃສ ໃຫ້ຮີບຮ້ອນລົງສອບສວນ ນຳໃຊ້ມາດຕະການສະກັດກັ້ນ ແລະ ຕອບໂຕ້ ພ້ອມທັງເປີດຫ້ອງປະຕິບັດງານເຫດສຸກເສີນດ້ານສາທາລະນະສຸກ ເພື່ອຕິດຕາມສະພາບ ແລະ ລາຍງານຄວາມຄືບໜ້າຂອງພະຍາດ ພ້ອມມາດຕະການໃນການຈັດຕັ້ງປະຕິບັດ ໃຫ້ກົມຄວບຄຸມພະຍາດຕິດຕໍ່ ແລະ ສູນກ່ຽວຂ້ອງຢ່າງໃຫ້ຊິດ.

ພາບປະກອບຂ່າວ

 

ເມື່ອເວລາຈັດຕັ້ງປະຕິບັດ ເມື່ອພົບຄວາມຫຍຸ້ງຍາກ ໃຫ້ລາຍງານກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ແລະ ສູນກ່ຽວຂ້ອງ ເພື່ອທີ່ຈະໄດ້ແກ້ໄຂໃຫ້ທັນກັບເວລາ.

ในภาพอาจจะมี ข้อความ

ในภาพอาจจะมี ข้อความ

%d bloggers like this: