ຜົນຕອບຮັບແນວໃດ ໃນງານມະໂຫລານສົ່ງເສີມການອ່ານ?

ງານມະໂຫລານສົ່ງເສີມການອ່ານ ນະຄອນຫຼວງວຽງຈັນ ຄັ້ງທີ I ເປັນງານທີ່ຈັດຂຶ້ນເພື່ອເລັງໃຫ້ບັນດານ້ອງນັກຮຽນ, ຄູ – ອາຈານ ແລະ ມະຫາຊົນເຫັນຄວາມສຳຄັນຂອງການອ່ານ, ຮັບຮູ້, ມີຄວາມເຂົ້າໃຈເຖິງຄວາມສຳຄັນ ແລະ ຈຳເປັນຂອງການອ່ານ ເຊິ່ງປະກອບດ້ວຍກິດຈະກຳກ່ຽວກັບສົ່ງເສີມການອ່ານ, ການສຳມະນາໃຫ້ ຄວາມຮູ້ກ່ຽວກັບການອ່ານ, ໂອ້ລົມໃຫ້ ຄວາມຮູ້ກັບການພັດທະນາຕົນເອງ ແລະ ອີກຫຼາກຫຼາຍກິດຈະກຳຂະບວນການທີ່ໄດ້ຮັບ ຄວາມສົນໃຈຈາກມະຫາຊົນເປັນຈຳນວນຫຼາຍ.

ທ່ານ ບົວລຽນ ວົງສີສຸພັນ

ທ່ານ ບົວລຽນ ວົງສີສຸພັນ ຄະນະຜູ້ຊ່ວຍຈັດງານມະໂຫລານສົ່ງເສີມການອ່ານ ໃຫ້ສຳພາດວ່າ: ການຈັດງານມະໂຫລານສົ່ງເສີມການອ່ານໃນຄັ້ງນີ້ ແມ່ນມີຄວາມສຳຄັນຫຼາຍ, ເປັນງານທີ່ວາງສະແດງບັນດາປຶ້ມຕ່າງໆຂອງ 10 ປະເທດອາຊຽນ, ສປ ຈີນ ແລະ ສ.ເກົາຫຼີ ເພື່ອສ້າງ ຄວາມສົນໃຈໃຫ້ຄົນລາວເຫັນເຖິງຄຸນຄ່າຂອງການອ່ານປຶ້ມ, ອ່ານໜັງສື, ຫຼີກເວັ້ນການອ່ານບັນດາຂໍ້ມູນບໍ່ມີ ຄວາມຈິງທາງສື່ສັງຄົມອອນລາຍຕ່າງໆ.

ງານມະໂຫລານສົ່ງເສີມການອ່ານ ຄັ້ງທີ I ນີ້ ເຫັນວ່າໄດ້ຮັບຄວາມສົນໃຈຫຼາຍຈາກບັນດາຄູ – ອາຈານ, ນ້ອງນັກຮຽນ ແລະ ມະຫາຊົນເປັນຈຳນວນຫຼາຍ ເຊິ່ງໃນແຕ່ລະມື້ຈະເຫັນວ່າມີຜູ້ເຂົ້າຮ່ວມຫຼາຍພັນຄົນໂດຍສະເພາະຕອນເຊົ້າຂອງແຕ່ລະມື້ແມ່ນມີນັກຮຽນເຂົ້າຮ່ວມຫຼາຍກວ່າ 2 ພັນຄົນ ແລະ ຕອນແລງແມ່ນມີມະຫາຊົນເຂົ້າຮ່ວມເກືອບ 2 ພັນຄົນເຊັ່ນກັນ ທີ່ເຂົ້າຮ່ວມກິດຈະກຳແຈກປຶ້ມ, ຟັງການໂອ້ລົມ, ສຳມະນາ ແລະ ໃຫ້ຄວາມຮູ້ຈາກບັນດາຜູ້ຊ່ຽວຊານທັງພາຍໃນ ແລະ ຕ່າງປະເທດ.

ທ່ານ ນາງ ບຸນທ່ອນ ຈຸນລະມະນີ

ທ່ານ ນາງ ບຸນທ່ອນ ຈຸນລະມະນີ ພະນັກງານຂອງສຳນັກພິມ ມີດີບຸ໊ກ ຂອງ ບໍລິສັດ ປານຄຳ ຈຳປາ ໃຫ້ສຳພາດວ່າ: ຮ້ານມີດີບຸ໊ກ ປະກອບມີປຶ້ມຫຼາກຫຼາຍຊະນິດກ່ຽວກັບເດັກນ້ອຍ, ທຸລະກິດ, ວັດທະນະທຳ, ເລື່ອງສັ້ນ, ນິທານສອນເດັກ, ສະຖານທີ່ທ່ອງທ່ຽວ ແລະ ສາລະໜ້າຮູ້ ທີ່ສອນກິລິຍາມາລະຍາດໃຫ້ແກ່ເດັກ ເຊິ່ງປະກອບມີທັງພາສາລາວ, ພາສາອັງກິດ ແລະ ພາສາຈີນ ເຫັນວ່າແຕ່ລະມື້ໄດ້ຮັບ ຄວາມສົນໃຈຫຼາຍຈາກມວນຊົນ ບໍ່ວ່າເປັນຜູ້ໃຫຍ່, ເດັກນ້ອຍ ແລະ ນ້ອງນັກຮຽນ – ນັກສຶກສາ ໂດຍສະເພາະແມ່ນນ້ອງນັກຮຽນທີ່ກຳລັງຮຽນໃນລະດັບ  ມ.ປາຍ.

ທ່ານ ນາງ ນິດສະລາ ລາຊາສັກດ໌

ທ່ານ ນາງ ນິດສະລາ ລາຊາສັກດ໌ ພະນັກງານຂາຍສຳນັກພິມ ແລະ ຈຳໜ່າຍປຶ້ມແຫ່ງລັດ ໃຫ້ສຳພາດວ່າ: ງານມະໂຫລານສົ່ງເສີມການອ່ານໃນຄັ້ງນີ້ ຖືວ່າມີຄວາມສຳຄັນຫຼາຍທີ່ໄດ້ຈັດກິດຈະກຳ ເພື່ອໃຫ້ນ້ອງນັກຮຽນຮັບຮູ້ເຖິງຄວາມສຳຄັນຂອງການອ່ານ ແລະ ຍັງເປັນໂອກາດໃຫ້ບັນດາຮ້ານຕ່າງໆໄດ້ມີໂອກາດແລກປ່ຽນປະສົບການ ແລະ ໄດ້ຂາຍປຶ້ມອີກ ເຊິ່ງຮ້ານຮົາປະກອບມີປຶ້ມຕ່າງໆທີ່ໃຫ້ ຄວາມຮູ້ທາງດ້ານວັດທະນະທຳ, ວັນນະຄະດີ, ປະຫວັດສາດ, ການເມືອງ ແລະ ອື່ນໆອີກຫຼາຍປະເພດທີ່ໃຫ້ຄວາມຮູ້ຕໍ່ການພັດທະນາຕົນເອງ ແລະ ແຕ່ລະມື້ຖືວ່າໄດ້ຮັບຄວາມສົນໃຈຈາກມວນຊົນເປັນຈຳນວນຫຼາຍເຂົ້າມາຊື້ປຶ້ມຕ່າງໆ ໂດຍສະເພາະແມ່ນບັນດານັກສຶກສາ ແລະ ມວນຊົນທົ່ວໄປ.

ທ່ານ ສຸກວິໄຊ ສຸກອາລຸນ

ທ່ານ ສຸກວິໄຊ ສຸກອາລຸນ ພະນັກງານການຕະຫຼາດ ໃນຮ້ານສູນບໍລິການຮຽນຕໍ່ຕ່າງປະເທດ ໃຫ້ສຳພາດວ່າ: ຮ້ານຂອງພວກເຮົາແມ່ນຫາກໍມາເປີດໃນງານມະໂຫລານສົ່ງເສີມການອ່ານນີ້ ໃນມື້ວັນທີ 9 ມີນາ ເຊິ່ງຖືວ່າມາຊ້າກວ່າຮ້ານອື່ນເພາະວ່າໄດ້ຮັບຂ່າວຊ້າ. ແຕ່ເຖິງຢ່າງໃດກໍຕາມ, ຮ້ານເຮົາກໍໄດ້ຮັບຄວາມສົນໃຈຫຼາຍຈາກບັນດານັກຮຽນ – ນັກສຶກສາ ແລະ ອ້າຍເອື້ອຍພະນັກງານທີ່ເຂົ້າມາຊື້ປຶ້ມເຊິ່ງເຫັນວ່າມີຄົນເຂົ້າມາໃຊ້ບໍລິການປຶກສາໄປຮຽນຕໍ່ຕ່າງປະເທດ ເປັນຕົ້ນແມ່ນ: ປະເທດຈີນ, ສິງກະໂປ ແລະ ອົດສະຕຣາລີ ທີ່ມີຄົນສົນໃຈເປັນພິເສດ.

ພະ ນູສອນ ຂັນຍາສັກ

ພະ ນູສອນ ຂັນຍາສັກ ນັກສຶກສາປີ 3 ຂອງສູນພັດທະນາສີມືແຮງງານ ໃຫ້ສຳພາດວ່າ: ງານມະໂຫລານສົ່ງເສີມການອ່ານ ເປັນການເປີດໂອກາດໃຫ້ນ້ອງນັກຮຽນ ແລະ ປະຊາຊົນລາວ ໄດ້ສຳຜັດກັບບັນດາປຶ້ມຕ່າງໆທັງພາຍໃນ ແລະ ຕ່າງໆປະເທດ ເຊິ່ງເປັນງານທີ່ສະໜອງແຫຼ່ງ ຄວາມຮູ້ໃນການພັດທະນາຕົນເອງ ບໍ່ວ່າທັງດ້ານການປະພຶດ, ການດຳລົງຊີວິດໃນສັງຄົມ ແລະ ການພັດທະນາທາງດ້ານໜ້າທີ່ວຽກງານ.

ນາງ ສຸກວິໄລ ວິໄລສານ

ນາງ ສຸກວິໄລ ວິໄລສານ ນັກຮຽນຊັ້ນ ມ 5 ມສ ພອນສະຫວັນ ໃຫ້ສຳພາດວ່າ: ການຈັດງານມະໂຫລານສົ່ງເສີມການອ່ານຂຶ້ນເປັນງານທີ່ມີຄວາມສຳຄັນຫຼາຍ, ຕົນເອງມີຄວາມຮູ້ສຶກດີໃຈ ແລະ ພາກພູມໃຈຫຼາຍທີ່ໄດ້ມີໂອກາດມາພົບປະກັບບັນດານັກຂຽນຕ່າງໆ ແລະ ໄດ້ສຳຜັດກັບບັນດາປຶ້ມຕ່າງໆ ທັງປຶ້ມຂອງລາວ, ຂອງບັນດາປະເທດອາຊຽນ ແລະ ປະເທດຈີນ ເຊິ່ງບັນດາປຶ້ມເຫຼົ່ານັ້ນລ້ວນແຕ່ມີຄຸນຄ່າ ແລະ ມີປະໂຫຍດໃນການພັດທະນາຕົນເອງ ກໍຄືເປັນພື້ນຖານທີ່ດີໃນການຮຽນຮູ້ອີກດ້ວຍ.

%d bloggers like this: