ຜົນຂອງການກວດກາ

ຜົນຂອງການກວດກາ

 

 

ອາທິດແລ້ວໄດ້ສະເໜີໄປແລ້ວເລື່ອງວຽກງານກວດກາ ມື້ນີ້ຂໍອະນຸຍາດນໍາສະເໜີຜົນຂອງການກວດກາ ເພື່ອໃຫ້ເພື່ອນຜູ້ອ່ານໄດ້ຮັບຮູ້ເຖິງການເຄື່ອນໄຫວວຽກງານວິຊາສະເພາະຂອງຄະນະກວດກາສູນກາງພັກຕື່ມອີກ.

ບາງຈຸດສຳຄັນມີດັ່ງນີ້:

▶ການຕິດຕາມ, ກວດກາພັກ.

ຜ່ານການຕິດຕາມ, ກວດກາເຫັນວ່າຄະນະພັກ, ຄະນະກວດກາແຕ່ລະຂັ້ນໄດ້ເອົາໃຈໃສ່ນຳພາ – ຊີ້ນຳຈັດຕັ້ງປະຕິບັດໜ້າທີ່ການເມືອງຕາມພາລະບົດບາດຂອງຕົນດັ່ງນີ້:

  • ຄະນະພັກແຕ່ລະຂັ້ນໄດ້ເອົາໃຈໃສ່ນຳພາ – ຊີ້ນຳການຄົ້ນຄວ້າເຊື່ອມຊຶມ, ຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ, ກົດລະບຽບຂອງພັກ, ມະຕິກອງປະຊຸມຄົບຄະນະຄັ້ງທີ 6 ແລະ 7 ຂອງຄະນະບໍລິຫານງານສູນກາງພັກ ສະໄໝທີ X ແລະ ມະຕິກອງປະຊຸມໃຫຍ່ອົງຄະນະພັກແຕ່ລະຂັ້ນ.

  • ຄະນະພັກ, ສະມາຊິກພັກ ສ່ວນຫຼາຍໄດ້ເອົາໃຈໃສ່ປະຕິບັດກົດລະບຽບ, ມະຕິ, ຄຳສັ່ງຂອງພັກ, ຂໍ້ຫ້າມສະມາຊິກພັກ, ຮັກສາໄດ້ບົດບາດເປັນແກນນຳໃນລະບົບການເມືອງ, ເປັນໃຈກາງເຕົ້າໂຮມຄວາມສາມັກຄີ, ມີສະຕິຕໍ່ການຈັດຕັ້ງ, ລະບຽບວິໄນຂອງພັກ, ຄຸນທາດການເມືອງ, ຄຸນສົມບັດສິນທຳປະຕິວັດໜັກແໜ້ນ, ມີຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍ, ມີແບບແຜນວິທີເຮັດວຽກ ແລະ ແບບແຜນດຳລົງຊີວິດທີ່ດີ. ສຳລັບຄະນະພັກ ແລະ ສະມາຊິກພັກຈຳນວນໜຶ່ງທີ່ມີຈຸດອ່ອນ ແລະ ຄວາມຜິດຮ້າຍແຮງກໍໄດ້ຮັບການສຶກສາອົບຮົມ, ສຳຫຼວດກວດກາ, ປັບປຸງແກ້ໄຂຕາມກົດລະບຽບຂອງພັກ ແລະ ກົດໝາຍຂອງລັດ.

 

 

  • ການກໍ່ສ້າງພັກດ້ານຈັດຕັ້ງໄດ້ຮັບການປັບປຸງທາງດ້ານປະລິມານ ແລະ ຄຸນນະພາບ, ຕາມການເກັບກຳຈຳນວນ 28 ກະຊວງ – ອົງການ ແລະ 17 ແຂວງ ແລະ ນະຄອນຫຼວງ ມີໜ່ວຍພັກທັງໝົດ 19.608 ໜ່ວຍ. ໃນນີ້, ມີໜ່ວຍພັກແຂງ 9.904 ໜ່ວຍ, ກາງ 996 ໜ່ວຍ, ອ່ອນ 50 ໜ່ວຍ ແລະ ບໍ່ໄດ້ຈັດແບ່ງປະເພດ 8.658 ໜ່ວຍ; ມີຈຳນວນສະມາຊິກພັກທັງໝົດ 321.281 ສະຫາຍ ຍິງ 80.868 ສະຫາຍ ( ສຳຮອງ 26.406 ສະຫາຍ ຍິງ 8.941 ສະຫາຍ ); ໄດ້ກວດກາຕີລາຄາຈັດແບ່ງປະເພດແລ້ວ 177.455 ສະຫາຍ. ໃນນີ້, ມີສະມາຊິກພັກແຂງ 152.415 ສະຫາຍ, ກາງ 23.886 ສະຫາຍ, ອ່ອນ 1.093 ສະຫາຍ, ເສຍທາດ 61 ສະຫາຍ, ແລະ ບໍ່ໄດ້ຈັດປະເພດ 143.826 ສະຫາຍ.

  • ສະມາຊິກພັກ ສ່ວນຫຼາຍໄດ້ເສຍເງິນສະຕິພັກເປັນປົກກະຕິ; ຕາມການລາຍງານຂອງ 28 ກະຊວງ – ອົງການ, 17 ແຂວງ ແລະ ນະຄອນຫຼວງ ມີເງິນສະຕິພັກທັງໝົດ 1.303.118.048 ກີບ. ໃນນີ້, ສົ່ງໃຫ້ຄະນະພັກຂັ້ນເທິງ 412.868.161 ກີບ ແລະ ຍັງຄ້າງບໍ່ທັນສົ່ງ 890.249.887 ກີບ.

  • ໄດ້ສຸມໃສ່ຕິດຕາມ, ກວດກາການແກ້ໄຂຜົນຂອງການດຳເນີນຊີວິດການເມືອງປັບປຸງປົວແປງພາຍໃນພັກ ປີ 2017. ໃນນັ້ນ, ມີ 6 ກະຊວງ ແລະ 5 ແຂວງ ໄດ້ດຳເນີນຊີວິດການເມືອງຄືນໃໝ່ ແລະ ຈັດວາງສັບຊ້ອນບຸກຄະລາກອນຈຳນວນໜຶ່ງ.

 

 

▶ການຕິດຕາມ, ກວດກາການບໍລິຫານລັດ.

 

 

ໃນໜຶ່ງປີຜ່ານມາອົງການກວດກາລັດແຕ່ລະຂັ້ນໄດ້ປະຕິບັດພາລະບົດບາດຕິດຕາມ, ກວດກາການປະຕິບັດໜ້າທີ່ຂອງອົງການບໍລິຫານລັດຢູ່ບັນດາກະຊວງ – ອົງການ, ແຂວງ – ນະຄອນຫຼວງ ແລະ ຂັ້ນເມືອງ ມີທັງໝົດ 1.213 ເປົ້າໝາຍ. ໃນນີ້, ຕິດຕາມ, ກວດກາປົກກະຕິ 408 ເປົ້າໝາຍ, ກວດກາຕາມຄຳສັ່ງ 129 ເປົ້າໝາຍ, ກວດກາຕາມຜົນການກວດສອບ 545 ເປົ້າໝາຍ; ຕິດຕາມ, ກວດກາໂຄງການລົງທຶນຂອງລັດເລີ່ມແຕ່ຫົວທີ 131 ເປົ້າໝາຍ ແລະ ພົບເຫັນຜົນເສຍຫາຍທັງໝົດ 999,02 ຕື້ກີບ, 67.144 ໂດລາ, 80.000 ບາດ, ເກັບກູ້ຄືນໄດ້ 26,51 ຕື້ກີບ, 17.389 ໂດລາ.

▶ກວດກາຕາມຄຳສັ່ງ.

  • ອົງການກວດກາລັດແຕ່ລະຂັ້ນ ໄດ້ດຳເນີນການກວດກາຕາມຂໍ້ຕົກລົງຂອງນາຍົກລັດຖະມົນຕີ ທັງໝົດ 07 ເປົ້າໝາຍ ຄື: ຄູກັນນໍ້າຂອງເຂື່ອນໄຟຟ້າເຊປຽນ – ເຊນໍ້ານ້ອຍແຕກພັງ, ລັດວິສາຫະກິດໄຟຟ້າລາວ; ບໍລິສັດ ຜະລິດໄຟຟ້າລາວມະຫາຊົນ, ລັດວິສາຫະກິດການບິນລາວ, ລັດວິສາຫະກິດດາຟີ, ຊັບສິນຂອງກາງຄະດີ ແລະ ຂໍ້ຂັດແຍ່ງການສຳປະທານໂຄງການພັດທະນາຕະຫຼາດເຊົ້າ. ຜ່ານການກວດກາພົບເຫັນການກໍ່ສ້າງໂຄງການບໍ່ຖືກຕ້ອງຕາມມາດຖານເຕັກນິກ, ການຄຸ້ມຄອງ – ບໍລິຫານບໍ່ມີປະສິດທິຜົນ, ການປະຕິບັດກົດໝາຍ ແລະ ລະບຽບການບໍ່ເຂັ້ມງວດ.

 

 

  • ກວດກາຕາມແຜນການ ແລະ ການຕົກລົງຂອງອົງການກວດກາລັດຖະບານ ມີ 06 ເປົ້າໝາຍ ຄື: ສະຖາບັນເງິນຝາກປະຢັດ, ກະຊວງໄປສະນີ ໂທລະຄົມມະນາຄົມ – ການສື່ສານ, ລັດວິສາຫະກິດບໍລິການສິນຄ້າຜ່ານແດນ, ທະນາຄານສົ່ງເສີມກະສິກຳ, ທະນາຄານພັດທະນາລາວ; ການນຳເຂົ້ານໍ້າມັນເຊື້ອໄຟປະເພດຕ່າງໆຂອງ 26 ບໍລິສັດ; ການເກັບກູ້ໜີ້ສິນຂອງ 02 ທະນາຄານທຸລະກິດ. ຜ່ານການກວດກາພົບເຫັນການຄຸ້ມຄອງ, ບໍລິຫານບໍ່ເຂັ້ມງວດຕາມກົດໝາຍ ແລະ ລະບຽບການວາງອອກ ເຮັດໃຫ້ຊັບສິນຂອງລັດ ແລະ ລວມໝູ່ເສຍຫາຍເປັນຈຳນວນຫຼວງຫຼາຍ, ການດຳເນີນທຸລະກິດບໍ່ມີຜົນກຳໄລ ແລະ ໜີ້ສິນຄຸມເຄືອ.

▶ການຕິດຕາມ, ກວດກາໂຄງການລົງທຶນຂອງລັດເລີ່ມແຕ່ຫົວທີ.

  • ອົງການກວດກາລັດຖະບານ ສົມທົບກັບກະຊວງ – ອົງການກ່ຽວຂ້ອງດຳເນີນການຕິດຕາມ, ກວດກາໂຄງການກໍ່ສ້າງທາງລົດໄຟ ລາວ – ຈີນ, ຜ່ານການກວດກາພົບເຫັນການນໍາເຂົ້ານໍ້າມັນ, ແຮງງານບໍ່ຖືກຕ້ອງ, ການອະນຸຍາດຜ່ານດ່ານມີຫຼາຍຂັ້ນຕອນ, ການຊົດເຊີຍຜົນເສຍຫາຍໃຫ້ປະຊາຊົນທີ່ຖືກຜົນກະທົບຊັກຊ້າ.

  • ອົງການກວດກາລັດແຕ່ລະຂັ້ນໄດ້ຕິດຕາມ, ກວດກາທັງໝົດ 131 ໂຄງການ, ມູນຄ່າຕາມສັນຍາ 5.683,29 ຕື້ກີບ, 124,06 ລ້ານໂດລາ. ໃນນີ້, ອົງການກວດກາລັດຖະບານໄດ້ກວດກາ 14 ໂຄງການ, ກະຊວງ – ອົງການກວດກາ 85 ໂຄງການ ແລະ ບັນດາແຂວງ – ນະຄອນຫຼວງ ກວດກາ 32 ໂຄງການ. ຜ່ານການຕິດຕາມ, ກວດກາເຫັນວ່າຫຼາຍໂຄງການໄດ້ຈັດຕັ້ງປະຕິບັດຖືກຕ້ອງຕາມລະບຽບກົດໝາຍ ແລະ ຍັງມີໂຄງການຈຳນວນໜຶ່ງຈັດຕັ້ງປະຕິບັດບໍ່ສອດຄ່ອງກັບລະບຽບຫຼັກການ ສະແດງອອກ ການປະກອບເອກະສານບົດວິພາກເສດຖະກິດ – ເຕັກນິກ, ບົດສຳຫຼວດ – ອອກແບບ, ການປະມູນ ແລະ ການເຮັດສັນຍາຮັບເໝົາກໍ່ສ້າງບໍ່ຖືກຕ້ອງຕາມລະບຽບການ, ໂຄງການມີມູນຄ່າສູງ, ການຕິດຕັ້ງອຸປະກອນບໍ່ຖືກຕາມສັນຍາ ແລະ ການກໍ່ສ້າງບໍ່ໄດ້ມາດຖານເຕັກນິກ.

▶ກວດກາຕາມຜົນຂອງການກວດສອບ ແຕ່ປີ 2011 – 2017.

  • ໃນໄລຍະ 1 ປີຜ່ານມາ ອົງການກວດກາລັດຖະບານ ສົມທົບກັບບັນດາກະຊວງ – ອົງການ, ແຂວງ ແລະ ນະຄອນຫຼວງ ດຳເນີນການກວດກາໂຄງການນອກແຜນ, ໂຄງການບໍ່ຜ່ານການປະເມີນ ແລະ ໂຄງການປະເມີນໄດ້ປະເພດ F ຕາມຜົນການກວດສອບ ເຊິ່ງໄດ້ລາຍງານຕໍ່ກອງປະຊຸມສະພາແຫ່ງຊາດ ລະຫວ່າງ ເດືອນພະຈິກທີ່ຜ່ານມາ ມີ 331 ໂຄງການ ແລະ ກວດກາສຳເລັດເພີ່ມຕື່ມ 119 ໂຄງການ, ລວມທັງໝົດທີ່ໄດ້ກວດກາຮອດປັດຈຸບັນ 450 ໂຄງການ ມູນຄ່າ 11.920,93 ຕື້ກີບ, ລວມຕົວເລກທີ່ກວດກາພົບເຫັນບໍ່ຖືກຕ້ອງຕາມລະບຽບທັງໝົດ 1.872.25 ຕື້ກີບ. ໃນນີ້, ເປັນຜົນເສຍຫາຍ 961,87 ຕື້ກີບ ແລະ ເກັບກູ້ຄືນແລ້ວ 1,12 ຕື້ກີບ.

  • ກວດກາຕາມຜົນຂອງການກວດສອບລາຍຮັບ – ລາຍຈ່າຍ ຈາກການຂາຍໄມ້ຢູ່ 6 ແຂວງ ມີໄມ້ທັງໝົດ 49.162.970 ແມັດກ້ອນ ແລະ 1.848,62 ມູນຄ່າທັງໝົດ 40,12 ຕື້ກີບ ແລະ 601.585,11 ໂດລາ; ຂາຍໄດ້ຮັບເງິນຕົວຈິງ 32,45 ຕື້ກີບ ແລະ 490.988,59 ໂດລາ, ຍັງຄ້າງ 7,60 ຕື້ກີບ ແລະ 110.596,52 ໂດລາ.

▶ການຈັດຕັ້ງປະຕິບັດ ຄຳສັ່ງເລກທີ 15/ນຍ.

  • ກວດກາການຂຸດຄົ້ນ, ເຄື່ອນຍ້າຍ ແລະ ທຸລະກິດໄມ້ຕາມ ຄຳສັ່ງເລກທີ 15/ນຍ ພົບເຫັນການລະເມີດໃນ 05 ແຂວງ, ມີບໍລິມາດໄມ້ທີ່ຂຸດຄົ້ນໄດ້ຕົວຈິງ 3.171.460 ແມັດກ້ອນ, ຂາຍແລ້ວ 1.542,336 ແມັດກ້ອນ ມູນຄ່າ 21,86 ຕື້ກີບ, ຢຶດພາຫະນະ 63 ຄັນ, ມີຜູ້ກະທຳຜິດ 62 ຄົນ. ໃນນີ້, ພະນັກງານລັດ 52 ຄົນ, ຜູ້ປະກອບການ 10 ຄົນ, ໄດ້ແກ້ໄຂທາງດ້ານບໍລິຫານ 27 ຄົນ, ຖືກດຳເນີນຄະດີ 35 ຄົນ, ສານຕັດສິນແລ້ວ 05 ຄົນ.

 

 

  • ກວດກາການດັດສົມໂຮງງານປຸງແຕ່ງໄມ້ ເຊິ່ງໃນທົ່ວປະເທດມີໂຮງງານປຸງແຕ່ງໄມ້, ເຟີນີເຈີຫັດຖະກຳແບບຄອບຄົວທັງໝົດ 2.863 ແຫ່ງ. ໃນນັ້ນ, ຍຸບເລີກຮື້ຖານແລ້ວ 1.618 ແຫ່ງ, ຍັງເຄື່ອນໄຫວ 1.245 ແຫ່ງ.

▶ການຄົ້ນຄວ້າຄຳຮ້ອງ – ຄຳສະເໜີ.

ຄະນະພັກ, ອົງການປົກຄອງ ແລະ ຄະນະກວດກາແຕ່ລະຂັ້ນໄດ້ສ້າງເງື່ອນໄຂໃຫ້ພົນລະເມືອງປະຕິບັດສິດຮ້ອງຟ້ອງ, ຮ້ອງທຸກ ແລະ ສະເໜີຄວາມຄິດເຫັນຕໍ່ການນຳພາຂອງຄະນະພັກ, ການຄຸ້ມຄອງບໍລິຫານລັດ ແລະ ການປະຕິບັດໜ້າທີ່ຂອງສະມາຊິກພັກ, ພະນັກງານ – ລັດຖະກອນ, ທະຫານ, ຕຳຫຼວດ. ໃນ 1 ປີຜ່ານມາໄດ້ຮັບຄຳຮ້ອງ – ຄຳສະເໜີທັງໝົດ 980 ສະບັບ. ໃນນີ້, ຄົ້ນຄວ້າແກ້ໄຂແລ້ວ 502 ສະບັບ, ສົ່ງໃຫ້ພາກສ່ວນກ່ຽວຂ້ອງຄົ້ນຄວ້າແກ້ໄຂ 169 ສະບັບ, ເກັບມ້ຽນເພື່ອຕິດຕາມ 16 ສະບັບ, ພວມດຳເນີນການຄົ້ນຄວ້າ ແລະ ເກັບກຳຂໍ້ມູນ 293 ສະບັບ, ເນື້ອໃນຄຳຮ້ອງ – ຄຳສະເໜີສ່ວນຫຼາຍແມ່ນຂໍ້ຂັດແຍ່ງກ່ຽວກັບທີ່ດິນ, ບໍ່ພໍໃຈຕໍ່ຄຳຕັດສິນຂອງສານ, ການຈັດຕັ້ງປະຕິບັດຄຳຕັດສິນຂອງສານ, ການປະຕິບັດໜ້າທີ່ຂອງພະນັກງານ, ການດຳເນີນຄະດີຂອງເຈົ້າໜ້າທີ່ຕຳຫຼວດ ແລະ ອີກຈຳນວນໜຶ່ງບໍ່ພໍໃຈຕໍ່ການລົງວິໄນຂອງການຈັດຕັ້ງພັກ – ລັດ.

▶ການຕິດຕາມ, ກວດກາການປະຕິບັດຜົນຂອງການກວດກາ.

 

 

ຄະນະກວດກາແຕ່ລະຂັ້ນໄດ້ຕິດຕາມ, ຊຸກຍູ້ການຈັດຕັ້ງປະຕິບັດຜົນຂອງການກວດກາ 33 ກະຊວງ – ອົງການ ແລະ 14 ແຂວງ ຈຳນວນ 206 ເປົ້າໝາຍ ມູນຄ່າເສຍຫາຍ 144,88 ຕື້ກີບ, 449.441 ໂດລາ, 2,16 ລ້ານບາດ, 32.000 ຢວນ. ໃນນີ້, ເກັບກູ້ຄືນໄດ້ແລ້ວ 31,73 ຕື້ກີບ, 132.784 ໂດລາ, 955.860 ບາດ, 32.000 ຢວນ; ຍັງຄ້າງ 113,15 ຕື້ກີບ, 316.657 ໂດລາ ແລະ 1,20 ລ້ານບາດ.

ທັງໝົດນັ້ນແມ່ນຜົນງານການເຄື່ີອນໄຫວວຽກງານກວດກາປີ 2018 ທີ່ຢາກໃຫ້ເພື່ອນຜູ້ອ່ານກຳໄດ້ນໍ!.

[ ທິດດີ ]

%d bloggers like this: