ສຕລ ຈັດການແຂ່ງຂັນ ສະຫຼອງວັນບານເຕະຍິງອາຊີ 2019

ສະຫະພັນບານເຕະແຫ່ງຊາດລາວ ( ສຕລ ) ຈັດກິດຈະກຳບານເຕະຍິງ ສະຫຼອງວັນບານເຕະຍິງອາຊີ 2019 ຫຼື “ AFC Women’s Football Day 2019 ” ເມື່ອວັນຈັນ 11 ມີນາ 2019 ທີ່ສະໜາມບານເຕະຫຍ້າທຽມ ສະຫະພັນບານເຕະແຫ່ງຊາດລາວ ໂດຍມີນັກຮຽນມາຈາກໂຮງຮຽນຊັ້ນປະຖົມ 7 ໂຮງຮຽນ ແລະ ຊັ້ນມັດທະຍົມ 7 ໂຮງຮຽນ.

ການຈັດກິດຈະກໍາຄັ້ງນີ້ເປັນປີທີ 5 ທີ່ໄດ້ມີການສະເຫຼີມສະຫຼອງວັນບານເຕະຍິງ ເຊິ່ງກົງກັບ ວັນແມ່ຍິງສາກົນ 8 ມີນາຂອງທຸກໆປີ ໂດຍປີນີ້ມີທັງໝົດ 30 ສະຫະພັນບານເຕະທີ່ເປັນສະມາຊິກຂອງສະຫະພັນບານເຕະອາຊີ ( AFC ) ພ້ອມໃຈກັນຈັດກິດຈະກຳບານເຕະຍິງດັ່ງກ່າວຂຶ້ນ ໂດຍມີຮູບແບບເປັນການສອນບານເຕະຂັ້ນພື້ນຖານ, ເຕັກນິກການຫຼິ້ນ ແລະ ຈັດການແຂ່ງຂັນເພື່ອແລກປ່ຽນປະສົບການ ເຊັ່ນດຽວກັບການຈັດກິດຈະກໍາທີ່ ສປປ ລາວ, ໄດ້ມີການສອນເຕະບານຂັ້ນພື້ນຖານ ແລະ ເຕັກນິກຕ່າງໆໃຫ້ກັບນັກຮຽນທີ່ເຂົ້າຮ່ວມ.

ສຳລັບທີມນັກກີລາທີ່ເຂົ້າຮ່ວມແມ່ນປະກອບມີທັງຊັ້ນປະຖົມ ແລະ ມັດທະຍົມມາຈາກຫຼາຍໂຮງຮຽນໃນຂອບເຂດນະຄອນຫຼວງວຽງຈັນ.

ນອກນັ້ນ, ຍັງມີບັນດານັກເຕະທີມຊາດຍິງລາວ ຈາກຮຸ່ນອາຍຸບໍ່ເກີນ 16 ປີ, 19 ປີ ແລະ ຄະນະຄູຝຶກບານເຕະທີມຊາດຍິງລາວ ລວມທັງໝົດ 170 ກວ່າຄົນ ທີ່ໄດ້ເຂົ້າຮ່ວມກິດຈະກຳດັ່ງກ່າວ.

%d bloggers like this: