ດ້ານອ່ອນ – ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້

ດ້ານອ່ອນ – ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້

ສະບັບນີ້ຍັງສືບຕໍ່ນຳສະເໜີວຽກກວດກາ ເຊິ່ງຈະນຳເອົາດ້ານອ່ອນ – ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນບາງຈຸດຕາມບົດສະຫຼຸບຂອງຄະນະກວດກາສູນກາງພັກ ເລກທີ 64/ຄກສພ ລົງວັນທີ 12 ກຸມພາ 2019.

ເມື່ອເວົ້າເຖິງດ້ານອ່ອນ ແລະ ຂໍ້ຄົງຄ້າງນັ້ນບົດສະຫຼຸບໄດ້ລະບຸໄວ້ດັ່ງນີ້:

 

 

  1. ການຄົ້ນຄວ້າສ້າງ ແລະ ປັບປຸງນິຕິກຳກ່ຽວກັບວຽກງານກວດກາ ຈຳນວນໜຶ່ງບໍ່ສຳເລັດຕາມແຜນການ, ການໂຄສະນາເຜີຍແຜ່ນິຕິກຳບໍ່ທັນທົ່ວເຖິງ ແລະ ເລິກເຊິ່ງ, ນິຕິກຳຈຳນວນໜຶ່ງທີ່ມີແລ້ວ ແຕ່ການຈັດຕັ້ງປະຕິບັດຍັງບໍ່ທັນເຂັ້ມງວດ, ການເຜີຍແຜ່ຜົນຂອງການກວດກາຍັງບໍ່ທັນກວ້າງຂວາງ, ເນື້ອໃນວາລະສານກວດກາບໍ່ທັນຮັດກຸມ.
  2. ການຕິດຕາມ, ກວດກາພັກ.
  • ຄະນະພັກຈຳນວນໜຶ່ງການຈັດຕັ້ງເຊື່ອມຊຶມ ແລະ ຜັນຂະຫຍາຍບັນດາມະຕິ, ຄຳສັ່ງ, ກົດລະບຽບຂອງພັກ, ກົດໝາຍ ແລະ ລະບຽບການຂອງລັດຍັງບໍ່ທັນລະອຽດ, ເລິກເຊິ່ງ ແລະ ທົ່ວເຖິງທຸກເປົ້າໝາຍ; ການຈັດຕັ້ງປະຕິບັດມະຕິກອງປະຊຸມຄົບຄະນະ ຄັ້ງທີ 5 ແລະ 6 ຂອງຄະນະບໍລິຫານງານສູນກາງພັກ ສະໄໝທີ X, ແຜນພັດທະນາເສດຖະກິດ – ສັງຄົມ 5 ປີ ຄັ້ງທີ VIII ຂອງລັດ ແລະ ມະຕິກອງປະຊຸມໃຫຍ່ອົງຄະນະພັກຂັ້ນຕົ້ນບາງດ້ານບໍ່ໄດ້ຕາມຄາດໝາຍ; ການສຶກສາອົບຮົມການເມືອງແນວຄິດຢູ່ພາຍໃນພັກ ບໍ່ຕິດພັນກັບໜ້າທີ່ການເມືອງ ແລະ ການແກ້ໄຂບັນຫາທີ່ເກີດຂຶ້ນຕົວຈິງໃນແຕ່ລະໄລຍະ.

 

 

  • ການກໍ່ສ້າງພັກທາງດ້ານການຈັດຕັ້ງຈຳນວນໜຶ່ງ ບໍ່ທັນຮັບປະກັນດ້ານຄຸນນະພາບ, ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຍັງຊັກຊ້າ; ການຂະຫຍາຍສະມາຊິກພັກ ດ້ານຈຳນວນໄດ້ເພີ່ມຂຶ້ນແຕ່ບໍ່ຮັບປະກັນຄຸນນະພາບ; ການຂະຫຍາຍພັກຢູ່ຮາກຖານບ້ານຊັກຊ້າ ແລະ ມະຫາຊົນບໍ່ສົນໃຈເຂົ້າພັກ, ຜູ້ເຂົ້າພັກແລ້ວກໍຢາກອອກຈາກພັກ, ສະມາຊິກພັກຢູ່ຮາກຖານບ້ານມີອາຍຸສູງ, ບາງບ້ານບໍ່ມີສະມາຊິກພັກນຳພາ, ຍັງມີໜ່ວຍພັກນຳພາຫຼາຍບ້ານ, ບາງບ່ອນແກ່ຍາວສະໄໝສຳຮອງເລື່ອນຂຶ້ນສົມບູນ, ສະມາຊິກພັກຢູ່ຮາກຖານບ້ານຊົນນະບົດຈຳນວນໜຶ່ງ ບໍ່ຢາກເປັນເລຂາໜ່ວຍພັກ ແລະ ນາຍບ້ານ, ການຄຸ້ມຄອງສະມາຊິກພັກຢູ່ບາງບ່ອນບໍ່ທັນດີ, ຍັງມີການປອມແປງໃບຍົກຍ້າຍສະມາຊິກພັກ ເພື່ອເລັດລອດເຂົ້າພັກ.

  • ຄະນະພັກຈຳນວນໜຶ່ງ ປະຕິບັດຫຼັກການລວມສູນປະຊາທິປະໄຕ ບໍ່ທັນເຂັ້ມງວດ, ການຄົ້ນຄວ້າພິຈາລະນາບັນຫາທີ່ສຳຄັນບໍ່ເປັນໝູ່ຄະນະ, ການນຳພາ – ຊີ້ນຳແກ້ໄຂຜົນຂອງການດຳເນີນຊີວິດການເມືອງ ປັບປຸງປົວແປງພັກຫຼາຍບ່ອນຍັງຊັກຊ້າ, ບໍ່ເຂັ້ມງວດເດັດຂາດ, ການປະຕິບັດລະບອບປະຊຸມຂອງຄະນະພັກ, ຄະນະປະຈຳພັກບາງບ່ອນບໍ່ເປັນປົກກະຕິ; ບາງໜ່ວຍພັກຮ່ວມຊີວິດບໍ່ເປັນປົກກະຕິ, ການຕິຊົມເຊິ່ງກັນ ແລະ ກັນ ຢູ່ພາຍໃນພັກບໍ່ແຂງແຮງ; ເນື້ອໃນການຮ່ວມຊີວິດພັກບໍ່ທັນດີ, ບໍ່ຮັບປະກັນ 4 ລັກສະນະ; ການຕິດຕາມ, ກວດກາປົກກະຕິຂອງຄະນະພັກຂັ້ນເທິງຕໍ່ຂັ້ນລຸ່ມ ແລະ ສະມາຊິກພັກຍັງເຮັດໄດ້ໜ້ອຍ, ການກຳສະພາບເຄື່ອນໄຫວຕົວຈິງໃນສັງຄົມຂອງພະນັກງານ, ສະມາຊິກພັກບໍ່ແໜ້ນ.

 

 

  • ຄະນະພັກ, ສະມາຊິກພັກຈຳນວນໜຶ່ງເສື່ອມຖອຍດ້ານຄຸນທາດການເມືອງ, ຄຸນສົມບັດສິນທຳປະຕິວັດ ແລະ ແບບແຜນດຳລົງຊີວິດ, ຂາດຄວາມເປັນແບບຢ່າງທີ່ດີ, ເກີດມີປາກົດການອາຍາສິດ, ເອກະຊົນ ແລະ ສໍ້ລາດບັງຫຼວງ, ລະເມີດກົດລະບຽບຂອງພັກ, ກົດໝາຍຂອງລັດ ເຊິ່ງສະແດງອອກມີກຳມະການຄະນະພັກ ແລະ ສະມາຊິກພັກ ຖືກປະຕິບັດວິໄນດ້ວຍຮູບການຕ່າງໆທັງໝົດ 845 ສະຫາຍ ຍິງ 110 ສະຫາຍ. ໃນນີ້, ກ່າວເຕືອນ ຄວາມຜິດ 186 ສະຫາຍ, ປົດຕຳແໜ່ງ 30 ສະຫາຍ, ໂຈະການຮ່ວມຊີວິດພັກ 154 ສະຫາຍ ແລະ ເອົາອອກຈາກພັກ 475 ສະຫາຍ. ເຫດຜົນທີ່ຖືກປະຕິບັດວິໄນຍ້ອນມີການລະເມີດກົດລະບຽບຂອງພັກ, ກົດໝາຍຂອງລັດ, ຂາດການຮ່ວມຊີວິດພັກ, ປະລະໜ້າທີ່, ພົວພັນສິ່ງເສບຕິດ, ພົວພັນສັງຄົມທີ່ບໍ່ຖືກຕ້ອງ, ສໍ້ລາດບັງຫຼວງ ແລະ ອື່ນໆ.

 

 

  1. ການຕິດຕາມ, ກວດກາການບໍລິຫານລັດ.

ກະຊວງ – ອົງການ ແລະ ທ້ອງຖິ່ນຈຳນວນໜຶ່ງ ການຄົ້ນຄວ້າອອກນິຕິກຳລຸ່ມກົດໝາຍທີ່ຂຶ້ນກັບຄວາມຮັບຜິດຊອບຂອງຕົນຍັງຊັກຊ້າ, ການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ບໍ່ໄດ້ຕາມຄາດໝາຍ, ການຄຸ້ມຄອງລັດ, ຄຸ້ມຄອງສັງຄົມບໍ່ເຂັ້ມງວດຕາມກົດໝາຍ, ມີສະພາບຫຍໍ້ທໍ້ຈຳນວນໜຶ່ງເກີດຂຶ້ນໃນຄວາມຮັບຜິດຊອບຂອງຕົນ ແຕ່ການປັບປຸງແກ້ໄຂຊັກຊ້າ ແລະ ບໍ່ຂາດຕົວ; ການປະຕິບັດວິໄນແຜນການ – ການເງິນບໍ່ເຂັ້ມງວດ, ມີຫຼາຍກໍລະນີຍັງມີການລະເມີດກົດໝາຍ ແລະ ລະບຽບການຕ່າງໆຂອງລັດ; ການປັບປຸງກົງຈັກການຈັດຕັ້ງຂອງລັດຢູ່ບາງບ່ອນບໍ່ໄດ້ຕາມທິດກະທັດຮັດ – ສົມເຫດສົມຜົນ, ເຄື່ອນໄຫວບໍ່ມີປະສິດທິຜົນ, ພາລະບົດບາດຂອງຂະແໜງການຍັງກ້າວກ່າຍ, ຊ້ຳຊ້ອນ, ຄຸມເຄືອ, ຫຼາຍຂັ້ນຫຼາຍຂອດ, ບໍ່ມີຄວາມໂປ່ງໃສ, ການກຳນົດຕຳແໜ່ງງານບໍ່ທັນລະອຽດ, ການປະເມີນຜົນພະນັກງານ – ລັດຖະກອນບໍ່ເປັນປົກກະຕິ ແລະ ບໍ່ຖືກກັບຕົວຈິງ; ສະພາບພະນັກງານເຫຼືອບໍ່ພໍບໍ່ໄດ້ຮັບການແກ້ໄຂ.

 

]

 

  • ການຄຸ້ມຄອງ ແລະ ນຳໃຊ້ຊັບພະຍາກອນທຳມະຊາດ ເປັນຕົ້ນ: ທີ່ດິນ, ປ່າໄມ້, ແຮ່ທາດ ແລະ ອື່ນໆບໍ່ເຂັ້ມງວດຕາມກົດໝາຍ ເປັນຕົ້ນແມ່ນການສຳປະທານ ແລະ ເຊົ່າທີ່ດິນຈຳນວນໜຶ່ງ ບໍ່ໄດ້ຈັດຕັ້ງປະຕິບັດ, ເປັນພຽງແຕ່ການຈັບຈອງທີ່ດິນໄວ້ເທົ່ານັ້ນ ເຊິ່ງເຮັດໃຫ້ລັດເສຍຜົນປະໂຫຍດເປັນຈຳນວນຫຼວງຫຼາຍ; ການຄຸ້ມຄອງໂຄງການລົງທຶນກໍ່ສ້າງພື້ນຖານໂຄງລ່າງມີມູນຄ່າສູງ ແຕ່ຄຸນນະພາບຕໍ່າ, ເກີດມີໜີ້ສິນຄຸມເຄືອ; ການຄົ້ນຄວ້າເອົາໂຄງການເຂົ້າແຜນໃຫ້ສະພາຮັບຮອງ ແລະ ການປະຕິບັດແຜນຊຳລະມູນຄ່າໂຄງການຈຳນວນໜຶ່ງ ຍັງຂາດການປະສານສົມທົບລະຫວ່າງສູນກາງ ແລະ ທ້ອງຖິ່ນ ເຊິ່ງພາໃຫ້ເກີດມີການຊຳລະເກີນ ແລະ ຊ້ຳຊ້ອນ ເຮັດໃຫ້ທຶນຮອນຂອງລັດເສຍຫາຍຢ່າງຫຼວງຫຼາຍ; ການຄຸ້ມຄອງໂຄງການກໍ່ສ້າງເຂື່ອນໄຟຟ້າ, ຂົວທາງ ແລະ ດັດສົມໂຮງງານອຸດສາຫະກຳປະເພດຕ່າງໆຈຳນວນໜຶ່ງບໍ່ທັນດີ ເຮັດໃຫ້ເກີດມີການຂຸດຄົ້ນໄມ້, ແຮ່ທາດຊະຊາຍ, ສ້າງຜົນກະທົບດ້ານສິ່ງແວດລ້ອມທຳມະຊາດ ແລະ ສັງຄົມຢ່າງຮ້າຍແຮງ.
  1. ການສະກັດກັ້ນ, ຕ້ານການສໍ້ລາດບັງຫຼວງ ແລະ ສືບສວນ – ສອບສວນ.
  • ການຄົ້ນຄວ້າຜັນຂະຫຍາຍມະຕິ ເລກທີ 022/ຄບສພ ຂອງຄະນະບໍລິຫານງານສູນກາງພັກ, ກົດໝາຍວ່າດ້ວຍການຕ້ານການສໍ້ລາດບັງຫຼວງ ແລະ ຍຸດທະສາດຕ້ານການສໍ້ລາດບັງຫຼວງ ຮອດປີ 2020 ເປັນນິຕິກຳອັນລະອຽດຍັງຊັກຊ້າ; ການເຜີຍແຜ່ເຊື່ອມຊຶມນິຕິກຳກ່ຽວກັບວຽກງານສະກັດກັ້ນຕ້ານການສໍ້ລາດບັງຫຼວງຍັງບໍ່ທັນເລິກເຊິ່ງ ແລະ ທົ່ວເຖິງທຸກເປົ້າໝາຍ, ຄວາມຮັບຮູ້ເຂົ້າໃຈຕໍ່ຜົນຮ້າຍ ແລະ ຄວາມເປັນອັນຕະລາຍຂອງການສໍ້ລາດບັງຫຼວງບໍ່ທັນເລິກເຊິ່ງ, ພະນັກງານນຳພາ – ຄຸ້ມຄອງແຕ່ລະຂັ້ນຈຳນວນໜຶ່ງ ຍັງຂາດຄວາມເປັນແບບຢ່າງທີ່ດີ, ມີການສວຍໃຊ້ໜ້າທີ່ຕຳແໜ່ງ ເພື່ອຜົນປະໂຫຍດສ່ວນຕົວ; ຢູ່ຫຼາຍບ່ອນການນຳພາແກ້ໄຂຕໍ່ພະນັກງານຜູ້ທີ່ມີພຶດຕິກຳສໍ້ລາດບັງຫຼວງບໍ່ທັນເຂັ້ມງວດເດັດຂາດ, ຜູ້ສໍ້ລາດບັງຫຼວງຈຳນວນໜຶ່ງບໍ່ໄດ້ຖືກປະຕິບັດວິໄນ ແລະ ດຳເນີນຄະດີຕາມກົດໝາຍ, ຍັງມີປາກົດການເຫັນອົກເຫັນໃຈ ແລະ ປົກປ້ອງຜູ້ກະທຳຜິດ, ການສືບສວນ – ສອບສວນ ແລະ ດຳເນີນຄະດີສໍ້ລາດບັງຫຼວງຍັງຊັກຊ້າ, ແກ່ຍາວ, ການຈັດຕັ້ງປະຕິບັດຄຳຕັດສິນຂອງສານກ່ຽວກັບຄະດີສໍ້ລາດບັງຫຼວງບໍ່ເຂັ້ມງວດຕາມກົດໝາຍ; ການເກັບກູ້ຊັບສິນທີ່ຖືກເສຍຫາຍຈາກການສໍ້ລາດບັງຫຼວງຍັງບໍ່ຄົບຖ້ວນ, ພະນັກງານຈຳນວນໜຶ່ງ ( ນັບທັງພະນັກງານທີ່ເປັນການນຳຂັ້ນສູງ ) ຍັງບໍ່ທັນຕື່ນຕົວແຈ້ງຊັບສິນ ແລະ ລາຍຮັບຂອງຕົນຕາມລະບຽບການທີ່ໄດ້ກຳນົດ.

 

 

  1. ຄະນະພັກ, ອົງການປົກຄອງ ແລະ ຄະນະກວດກາຈຳນວນໜຶ່ງ ການຄົ້ນຄວ້າພິຈາລະນາແກ້ໄຂຄຳຮ້ອງ – ຄຳສະເໜີຍັງຊັກຊ້າ, ແກ່ຍາວ; ການເກັບກຳຂໍ້ມູນບາງກໍລະນີບໍ່ຄົບຖ້ວນ, ບໍ່ຊັດເຈນ ແລະ ການຕົກລົງແກ້ໄຂບໍ່ເອກະພາບກັນ; ຄຳຮ້ອງດຽວມີຫຼາຍພາກສ່ວນຮັບຄົ້ນຄວ້າແກ້ໄຂ, ການປະສານສົມທົບລະຫວ່າງພາກສ່ວນທີ່ກ່ຽວຂ້ອງໃນການຄົ້ນຄວ້າຄຳຮ້ອງ – ຄຳສະເໜີ ມີບາງເລື່ອງຍັງບໍ່ກົມກຽວກັນ ແລະ ບໍ່ຖືກຕາມພາລະບົດບາດຂອງຕົນ.
  2. ຄວາມຮັບຜິດຊອບຂອງຄະນະພັກ, ອົງການປົກຄອງຈຳນວນໜຶ່ງ ໃນການຕົກລົງ ແລະ ແກ້ໄຂຜົນການກວດກາບໍ່ທັນສູງ, ຊັກຊ້າ, ແກ່ຍາວ ແລະ ເມີນເສີຍ; ການປະຕິບັດວິໄນ ແລະ ດຳເນີນຄະດີຕໍ່ຜູ້ກະທຳຜິດ ບໍ່ເຂັ້ມງວດຕາມກົດໝາຍ, ການເກັບກູ້ຊັບສິນ, ເງິນຄຳທີ່ກວດກາພົບເຫັນຍັງເຮັດໄດ້ໜ້ອຍ.
  3. ການແລກປ່ຽນບົດຮຽນກ່ຽວກັບວຽກງານກວດກາ, ສະກັດກັ້ນຕ້ານການສໍ້ລາດບັງຫຼວງຢູ່ບັນດາປະເທດພາກພື້ນ ແລະ ສາກົນມີຫຼາຍ ແຕ່ການຄົ້ນຄວ້າໝູນໃຊ້ເຂົ້າໃນສະພາບຕົວຈິງຍັງມີໜ້ອຍ; ການຍາດແຍ່ງຮັບເອົາການຊ່ວຍເຫຼືອດ້ານທຶນຮອນຈາກບັນດາປະເທດເພື່ອນມິດ ແລະ ອົງການຈັດຕັ້ງສາກົນຍັງບໍ່ທັນໄດ້ຫຼາຍ, ຄວາມຮູ້ – ຄວາມສາມາດຂອງພະນັກງານດ້ານພາສາ ແລະ ງົບປະມານການເຄື່ອນໄຫວຕ່າງປະເທດຍັງຈຳກັດ.
  4. ກົງຈັກການຈັດຕັ້ງ ແລະ ພາລະບົດບາດຂອງຄະນະກວດກາກະຊວງ – ອົງການ ແລະ ທ້ອງຖິ່ນຈຳນວນໜຶ່ງຍັງບໍ່ທັນໄດ້ຮັບການປັບປຸງຕາມກົດລະບຽບຂອງພັກ ແລະ ກົດໝາຍວ່າດ້ວຍການກວດກາລັດ, ການປະກອບພະນັກງານຢູ່ຄະນະກວດກາແຕ່ລະຂັ້ນຍັງບໍ່ທັນພຽງພໍ, ການກຳນົດຕຳແໜ່ງງານບໍ່ທັນລະອຽດຈະແຈ້ງ, ການຝຶກອົບຮົມ, ບຳລຸງກໍ່ສ້າງພະນັກງານກວດກາຍັງບໍ່ທັນຕອບສະໜອງກັບໜ້າທີ່ການເມືອງ, ຄວາມຮູ້ – ຄວາມສາມາດປະສົບການໃນວຽກງານກວດກາຕົວຈິງຍັງຈຳກັດ, ຄວາມຮັບຜິດຊອບຕໍ່ການປະຕິບັດພາລະບົດບາດ, ໜ້າທີ່ຂອງຄະນະກວດກາ ແລະ ພະນັກງານກວດກາຈຳນວນໜຶ່ງບໍ່ທັນສູງ, ບໍ່ກ້າຫານ, ເອື່ອຍອີງ, ລໍຖ້າຄຳສັ່ງ; ສະຕິຕໍ່ການຈັດຕັ້ງ, ຕໍ່ລະບຽບວິໄນບໍ່ທັນສູງ ຍັງມີການສວຍໃຊ້ໜ້າທີ່ເພື່ອຜົນປະໂຫຍດສ່ວນຕົວ.

 

 

▶ ສາເຫດທີ່ພາໃຫ້ມີດ້ານອ່ອນ ແລະ ຂໍ້ຄົງຄ້າງ:

  • ນິຕິກຳເປັນບ່ອນອີງແກ່ການປະຕິບັດວຽກງານກວດກາຍັງບໍ່ທັນຄົບຖ້ວນ, ອັນທີ່ມີແລ້ວຈຳນວນໜຶ່ງການຄົ້ນຄວ້າເຊື່ອມຊຶມບໍ່ທັນເລິກເຊິ່ງ ແລະ ການຈັດຕັ້ງປະຕິບັດບໍ່ເຂັ້ມງວດ.

  • ຄວາມຮັບຮູ້ເຂົ້າໃຈ ແລະ ການເຂົ້າຮ່ວມວຽກງານກວດກາຂອງພະນັກງານ, ສະມາຊິກພັກ ແລະ ການຈັດຕັ້ງໃນສັງຄົມບໍ່ທັນກວ້າງຂວາງ.

  • ຄະນະພັກ, ອົງການປົກຄອງຈຳນວນໜຶ່ງຍັງບໍ່ທັນເອົາໃຈໃສ່ນຳພາ – ຊີ້ນຳ ແລະ ປະຕິບັດວຽກງານກວດກາ, ບໍ່ທັນເປັນເຈົ້າການດຳເນີນການຕິດຕາມ, ກວດກາປົກກະຕິຕໍ່ການຈັດຕັ້ງ, ພະນັກງານ – ສະມາຊິກພັກທີ່ຂຶ້ນກັບຄວາມຮັບຜິດຊອບຂອງຕົນ ແລະ ການແກ້ໄຂຜົນຂອງການກວດກາ, ບໍ່ເດັດຂາດເຂັ້ມງວດ.

  • ຄວາມເປັນເຈົ້າການຂອງຄະນະກວດກາ ແລະ ພະນັກງານກວດກາຈຳນວນໜຶ່ງໃນການປະຕິບັດພາລະບົດບາດໜ້າທີ່, ຂອບເຂດສິດຂອງຕົນບໍ່ທັນແຂງແຮງ, ຍັງເອື່ອຍອີງ, ລໍຖ້າຄຳສັ່ງ, ວິທີການກວດກາຊັກຊ້າແກ່ຍາວ, ຄວາມຮູ້ – ຄວາມສາມາດ, ບົດຮຽນ ແລະ ປະສົບການໃນວຽກງານຕົວຈິງຍັງຈຳກັດ.

  • ພະນັກງານທີ່ປະກອບເຂົ້າກົງຈັກຄະນະກວດກາຢູ່ຂັ້ນເມືອງ ແລະ ຮາກຖານຍັງບໍ່ທັນພຽງພໍ, ງົບປະມານ, ພາຫະນະ, ສະຖານທີ່ເຮັດວຽກ ແລະ ວັດຖຸອຸປະກອນຮັບໃຊ້ທີ່ຈຳເປັນຍັງບໍ່ທັນຕອບສະໜອງຕາມຄວາມຕ້ອງການຕົວຈິງ, ນະໂຍບາຍອຸດໜູນເພື່ອກະຕຸກຊຸກຍູ້ພະນັກງານກວດກາ ແລະ ຜູ້ເຂົ້າຮ່ວມການກວດກາບໍ່ທັນໄດ້ກຳນົດອອກເປັນອັນລະອຽດ.

▶ ບາງບົດຮຽນທີ່ຖອດຖອນໄດ້:

  1. ຕ້ອງມີນິຕິກຳ, ກົນໄກ, ລະບຽບການທີ່ລະອຽດຈະແຈ້ງເປັນບ່ອນອີງໃຫ້ແກ່ການເຄື່ອນໄຫວວຽກງານ, ຕິດຕາມ – ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ພ້ອມທັງຈັດຕັ້ງເຜີຍແຜ່, ຄົ້ນຄວ້າເຊື່ອມຊຶມໃຫ້ແກ່ການນຳ, ສະມາຊິກພັກ, ພະນັກງານໃນທຸກການຈັດຕັ້ງ ແລະ ທົ່ວສັງຄົມຮັບຮູ້ເຂົ້າໃຈຢ່າງກວ້າງຂວາງ ແລະ ເລິກເຊິ່ງ ຕ້ອງສຶກສາອົບຮົມໃຫ້ທຸກຄົນປະຕິບັດທິດນຳ 3 ບໍ່ ຄື: ບໍ່ກ້າ, ບໍ່ສາມາດ ແລະ ບໍ່ຄິດຢາກສໍ້ລາດບັງຫຼວງ.
  2. ຢູ່ບ່ອນໃດຄະນະພັກ, ຄະນະນຳ ແລະ ຜູ້ເຮັດວຽກງານກວດກາມີຄວາມຮັບຮູ້ເຂົ້າໃຈ, ເປັນເອກະພາບສູງຕໍ່ກັບວຽກງານກວດກາ, ຢູ່ບ່ອນນັ້ນການຈັດຕັ້ງປະຕິບັດມີປະສິດທິຜົນ.
  3. ການຕິດຕາມ, ກວດກາຕ້ອງປຸກລະດົມທຸກພາກສ່ວນໃນສັງຄົມເຂົ້າຮ່ວມ, ເສີມຂະຫຍາຍປະຊາທິປະໄຕພາຍໃນການຈັດຕັ້ງ, ຖັນແຖວສະມາຊິກພັກ, ພະນັກງານ ແລະ ປະຊາຊົນ; ການກວດກາຕ້ອງຮັບປະກັນຄວາມຖືກຕ້ອງ, ຊັດເຈນ, ຄົບຖ້ວນ, ພາວະວິໄສ, ຍຸຕິທຳ, ທັນການ, ແກ້ໄຂເຂັ້ມງວດຕາມກົດລະບຽບຂອງພັກ ແລະ ກົດໝາຍຂອງລັດ.
  4. ເມື່ອກວດກາເຫັນການຈັດຕັ້ງ ແລະ ບຸກຄົນກະທຳຜິດ, ຄະນະພັກ ແລະ ອົງການປົກຄອງຕ້ອງໃຊ້ມາດຕະການສຶກສາອົບຮົມ, ລົງວິໄນ ແລະ ດຳເນີນຄະດີຢ່າງເຂັ້ມງວດຕາມກົດລະບຽບຂອງພັກ ແລະ ກົດໝາຍຂອງລັດ, ຊັບສິນທີ່ເສຍຫາຍຕ້ອງເກັບກູ້ຄືນໃຫ້ລັດ ຈຶ່ງເຮັດໃຫ້ການກວດກາມີຄວາມສັກສິດ.
  5. ບ່ອນໃດກົງຈັກການຈັດຕັ້ງຂອງຄະນະກວດກາໄດ້ຮັບການປັບປຸງດີ, ມີພະນັກງານພຽງພໍດ້ານຈຳນວນ, ມີ ຄວາມຮູ້ – ຄວາມສາມາດ, ປະສົບການຕົວຈິງ, ສັດຊື່ບໍລິສຸດ, ມີການປະດິດສ້າງ, ກ້າຫານ, ມີງົບປະມານ, ວັດຖຸອຸປະກອນ, ພາຫະນະ, ສະຖານທີ່ເຮັດວຽກທີ່ຈຳເປັນຢູ່ບ່ອນນັ້ນການປະຕິບັດວຽກງານກວດກາມີປະສິດທິຜົນ ແລະ ໄດ້ຮັບຄວາມເຊື່ອຖືຈາກສັງຄົມ.

ຖືວ່າເປັນບົດສຸດທ້າຍທີ່ຜູ້ຂຽນຂໍອະນຸຍາດນຳສະເໜີ ເພື່ອໃຫ້ເພື່ອນຜູ້ອ່ານກຳໄດ້ ແລະ ເຂົ້າໃຈການດຳເນີນງານຂອງວຽກງານກວດກາຂອງຄະນະກວດກາສູນກາງພັກໃນປີ 2018 ທີ່ຜ່ານມາ.

 

[ ທິດດີ ]

%d bloggers like this: