ຊີເອັນພີ ທຸ່ມ 3 ຕື້ກີບ ພັດທະນາແຄມຂອງຕ້ອນຮັບປີໃໝ່ລາວ

ສົມກັບການທຸ່ມເທຕະຫຼອດ 4 ປີຜ່ານມາ ສໍາລັບ ບໍລິສັດ ຊີເອັນພີ ( CNP ) ຂາອອກ – ຂາເຂົ້າ ຈຳກັດ ທີ່ມຸ່ງເນັ້ນພັດທະນາຫາດຊາຍແຄມຂອງ ໃຫ້ເປັນແຫຼ່ງທ່ອງທ່ຽວໃນໄລຍະປີໃໝ່ລາວຕະຫຼອດ 4 ປີຊ້ອນ. ສໍາລັບປີນີ້ບໍລິສັດວາງງົບ 3 ຕື້ກີບ ເພື່ອເນລະມິດຫາດຊາຍແຄມຂອງ ໃຫ້ເປັນແຫຼ່ງທອງທ່ຽວໃນໄລຍະປີໃໝ່ລາວ ວາງເປົ້ານັກທ່ອງທ່ຽວໃຫ້ໄດ້ 5 ແສນຄົນ.

ທ່ານ ນາງ ຈັນນະພາ ວົງສະໝໍລະພູມ ປະທານ ກຸ່ມບໍລິສັດ ຊີເອັນພີ ( CNP ) ຂາອອກ – ຂາເຂົ້າ ຈຳກັດ ໄດ້ກ່າວວ່າ: ເພື່ອຕ້ອນຮັບການສະເຫຼີມສະຫຼອງບຸນປີໃໝ່ລາວ 2019 ທີ່ຈະມາເຖິງ ລວມທັງເປັນການສ້າງບັນຍາກາດປີທ່ອງທ່ຽວ ລາວ – ຈີນ ໃນປີ 2019 ນີ້ ບໍລິສັດໄດ້ທຸ່ມງົບປະມານ 3 ຕື້ກີບ ເພື່ອປັບປຸງພື້ນຖານໂຄງລ່າງ, ປະດັບປະດາ, ຕົກແຕ່ງຫ້າງຮ້ານ, ນໍາຕົ້ນໄມ້ມາປູກ, ຕິດຕັ້ງລະບົບໄຟຟ້າ, ນໍ້າ, ສ້າງສະນໍ້າຂະໜາດໃຫຍ່ຢູ່ເທິງຫາດຊາຍ ແລະ ວຽກອື່ນໆ ເຊິ່ງປັດຈຸບັນມີຄວາມຄືບໜ້າແລ້ວ 50%.

ສໍາລັບຈຸດເດັ່ນຂອງງານປີນີ້ ພວກເຮົາໄດ້ເນັ້ນການສ້າງສະນໍ້າສະອາດຢູ່ເທິງຫາດຊາຍ ເພື່ອຮອງຮັບປະຊາຊົນທີ່ມາທ່ຽວຫຼິ້ນ. ພ້ອມນັ້ນ, ຍັງມີກິດຈະກໍາກາງແຈ້ງ ເປັນຕົ້ນແມ່ນວົງດົນຕີຈາກນັກຮ້ອງທັງພາຍໃນ ແລະ ຕ່າງປະເທດ. ພິເສດໄປກວ່ານັ້ນກໍຈະໄດ້ເຊີນເອົານັກຮ້ອງຈາກປະເທດເພື່ອນບ້ານ ( ເຈົ້າຂອງເພງ ໝາກແຕງໂມ ) ມາຮ່ວມສ້າງສີສັນໃນງານຄັ້ງນີ້ ຄາດວ່າຈະມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາບໍ່ຫຼຸດ 5 ແສນຄົນ.

ທ່ານ ນາງ ຈັນນະພາ ວົງສະໝໍລະພູມ ໄດ້ກ່າວວ່າ: ເຖິງວ່າຫາດຊາຍແຄມຂອງຈະພັດທະນາໃຫ້ເປັນແຫຼ່ງທ່ອງທ່ຽວແຕ່ກິດຈະກໍາແຂ່ງຂັນກີລາຫາດຊາຍໃນປີນີ້ກໍຍັງຈະຮັກສາໄວ້ຄືເກົ່າ ໂດຍຈະສົມທົບກັບ ພະແນກສຶກສາທິການ ແລະ ກີລາ ນະຄອນຫຼວງວຽງຈັນ ໃນການຈັດກິດຈະກໍາ, ສ່ວນວຽກຮັກສາຄວາມສະອາດ ປີນີ້ກໍຈະມີຄວາມຮັດກຸມຂຶ້ນ ພວກເຮົາຈະມີຖັງສໍາລັບເກັບມ້ຽນຂີ້ເຫຍື້ອໃນແຕ່ລະຈຸດ. ພ້ອມນັ້ນ, ຈະມີພະນັກງານອະນາໄມທຸກໆມື້ ໝາຍວ່າໃນແຕ່ລະມື້ກ່ອນຮອດ 10:00 ໂມງ ຈະໃຫ້ສໍາເລັດໃນການເກັບມ້ຽນຂີ້ເຫຍື້ອ.

ໃນນີ້ແມ່ນຈະແບ່ງເປັນຫຼາຍເຂດດ້ວຍກັນ ເຊັ່ນວ່າ: ເຂດປະຕິມາກຳຫາດຊາຍ, ເຂດຕົບພະຊາຍ, ເຂດຈັດງານແຂ່ງຂັນກີລາຫາດຊາຍ, ເຂດສວນດອກໄມ້, ເຂດທະເລວຽງຈັນສຳລັບພັກຜ່ອນ ແລະ ຮ້ານອາຫານ. ນອກຈາກນີ້, ຍັງມີການປັບປຸງສຳລັບການຫຼິ້ນກີລາທາງນໍ້າ ແລະ ທາງບົກ ສໍາລັບເສັ້ນທາງຈະສ້າງໃຫ້ມີມາດຕະຖານມີທາງຂຶ້ນ – ລົງເພື່ອອໍານວຍຄວາມສະດວກໃຫ້ນັກທ່ອງທ່ຽວ.
ຢ່າງໃດກໍຕາມ, ນອກຈາກບໍລິການແຫຼ່ງທ່ອງທ່ຽວຢູ່ຫາດດອນຈັນແລ້ວ ບໍລິສັດ ຊີເອັນພີ ຍັງເປັນຜູ້ພັດທະນາໝູ່ບ້ານເຮືອນລາວ ຢູ່ຫຼັງພະທາດຫຼວງວຽງຈັນ ເຊິ່ງຈະມີກິດຈະກຳຫຼາກຫຼາຍໃນໄລຍະປີໃໝ່ລາວເປັນ ຕົ້ນແມ່ນການອະນຸຮັກປະເພນີລາວ.

ຂ່າວ: ພຸດຕີ້; ຮູບ ສຸກສະຫວັນ

%d bloggers like this: