ງານມະໂຫລານສົ່ງເສີມການອ່ານ ຈະດຳເນີນເປັນເວລາ 11 ວັນ

ງານມະໂຫລານສົ່ງເສີມການອ່ານ ນະຄອນຫຼວງວຽງຈັນ ຄັ້ງທີ I ເວທີສຳຄັນໃນການສົ່ງເສີມທັງຜູ້ຂຽນ, ສຳນັກພິມ ແລະ ຜູ້ອ່ານ ໄດ້ເປີດຂຶ້ນຢ່າງເປັນທາງການ ແລະ ຈະດຳເນີນເປັນເວລາ 11 ວັນ. ໃນງານມີຜູ້ປະກອບການ 200 ກວ່າຫົວໜ່ວຍ ນຳເອົາຜົນງານຂຽນທັງພາຍໃນ ແລະ ຕ່າງປະເທດ ມາໂຮມໄວ້ບ່ອນດຽວ.

ງານດັ່ງກ່າວໄດ້ເລີ່ມເປີດສາກຂຶ້ນໃນວັນທີ 7 ມີນາ 2019 ໂດຍເຂົ້າຮ່ວມຂອງ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ, ທ່ານ ນາງ ດາລາ ກັນລະຍາ ນັກປະພັນອາວຸໂສ, ສິລະປິນແຫ່ງຊາດ ພ້ອມດ້ວຍບັນດາຜູ້ຕາງໜ້າຈາກອົງການສາກົນ, ຄູ – ອາຈານ ແລະ ນ້ອງນັກຮຽນເຂົ້າຮ່ວມ.

ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ກ່າວວ່າ: ການຈັດງານບຸນມະໂຫລານສົ່ງເສີມການອ່ານ ນະຄອນຫຼວງວຽງຈັນ ຄັ້ງທີ I ນີ້ ແມ່ນເພື່ອເລັງໃຫ້ເຫັນຄວາມສຳຄັນຂອງການອ່ານ, ສົ່ງເສີມການອ່ານ ລວມເຖິງການຊ່ວຍເຫຼືອຂອງພໍ່ – ແມ່ຜູ້ປົກຄອງ, ຄູ – ອາຈານ ແລະ ບັນນາລັກຮັບຮູ້, ມີຄວາມເຂົ້າໃຈເຕັກນິກວິທີການສົ່ງເສີມການອ່ານແກ່ເດັກ ແລະ ເຍົາວະຊົນຢ່າງເໝາະສົມ. ພ້ອມກັນນັ້ນ, ຍັງເປັນໂອກາດໃຫ້ຄົນລາວໄດ້ສຳຜັດກັບປຶ້ມຕ່າງໆຈາກນາໆຊາດ ເພື່ອເປີດໂລກາທັດ ແລະ ເບິ່ງເຫັນການພັດທະນາປຶ້ມໃນຕ່າງປະເທດ. ຂະນະດຽວກັນ, ກໍເປັນໂອກາດໃຫ້ຄົນຕ່າງປະເທດໄດ້ສຳຜັດກັບປຶ້ມຂອງລາວ ແລະ ຍັງເປັນສື່ກາງໃນການສ້າງໂອກາດໃຫ້ນັກຂຽນ, ສຳນັກພິມລາວ ໄດ້ຈຳໜ່າຍລິຂະສິດໃຫ້ກັບຕ່າງປະເທດ. ນອກນັ້ນ, ຍັງເຮັດໃຫ້ສຳນັກພິມມີຄວາມຕື່ນຕົວປັບຕົວ ແລະ ພັດທະນາການຜະລິດປຶ້ມອ່ານໃຫ້ມີຄຸນນະພາບ, ມີຫຼາຍສີສັນເປັນປະໂຫຍດຕໍ່ຜູ້ອ່ານ ແລະ ພັດທະນາເສດຖະກິດ – ສັງຄົມ.

ທ່ານ ນາງ ດາລາ ກັນລະຍາ ກ່າວວ່າ: ການຈັດບຸນມະໂຫລານສົ່ງເສີມການອ່ານຄັ້ງນີ້ ເປັນປັດໄຈສຳຄັນໜຶ່ງ ເພື່ອຊຸກຍູ້ຍົກລະດັບຄຸນນະພາບການສຶກສາໃຫ້ແກ່ເດັກນ້ອຍລາວຜູ້ທີ່ເປັນອະນາຄົດຂອງຊາດ ເຊິ່ງຄົນລາວເຮົານັ້ນມີວັດທະນະທຳການອ່ານ – ການຂຽນມາເປັນເວລາຫຼາຍສະຕະວັດ. ໃບລານຢູ່ໃນວັດຫຼາຍກວ່າແສນຜູກນັ້ນ, ມີວັນນະຄະດີລືຊື່ຫຼາຍເລື່ອງ ເຊັ່ນ: ມະຫາກາບ ທ້າວຮຸ່ງ ທ້າວເຈືອງ.

ການສົ່ງເສີ່ມການອ່ານນັ້ນ ເປັນການສ້າງຊັບພະຍາກອນມະນຸດທີ່ຕ້ອງໃຊ້ເວລາຍາວ ລົງທຶນສູງແຕ່ຜົນໄດ້ຮັບແມ່ນໜັກແໜ້ນ ແລະ ແນ່ນອນ, ການອ່ານປຶ້ມນັ້ນເຂົາເຈົ້າຈະໄດ້ເປີດໂລກກວ້າງຮຽນຮູ້ຄຳສັບອັນຫຼາກຫຼາຍ, ຮູ້ຫຼາຍສິ່ງຫຼາຍຢ່າງແຕ່ພື້ນດິນຈົນຮອດອະວະກາດ. ເດັກນ້ອຍທີ່ອ່ານຫຼາຍຈະຊ່ວຍໃຫ້ສະຫຼາດ, ເຂັ້ມແຂງ, ກ້າສະແດງອອກ, ຮູ້ຖາມ – ຮູ້ຕອບ, ຮູ້ຈັກຕັດສິນໃຈ ແລະ ຍັງຈະກາຍເປັນຜູ້ໃຫຍ່ທີ່ມີຄຸນນະພາບຂອງປະເທດຊາດ.

ງານມະໂຫລານສົ່ງເສີມການອ່ານໃນຄັ້ງນີ້ແມ່ນຈັດຂຶ້ນລະຫວ່າງວັນທີ 7 ຫາ 17 ມີນາ 2019 ທີ່ລານດ້ານໜ້າ ສູນການຄ້າສາກົນ ( World Trade Center ) ນີ້ ໂດຍມີການວາງສະແດງສື່ສິ່ງພິມຕ່າງໆ ເປັນຕົ້ນແມ່ນປຶ້ມອ່ານຈຳນວນຫຼາຍກວ່າ 200 ຮ້ານ, ມີກິດຈະກຳແຈກຢາຍປຶ້ມໃຫ້ບັນດາການນຳພັກ – ລັດ ແລະ ໂຮງຮຽນຕ່າງໆໃນທົ່ວນະຄອນຫຼວງວຽງຈັນ, ມີກິດຈະກຳຖາມ – ຕອບ ຄວາມຮູ້ຮອບຕົວສຳລັບນັກຮຽນ ແລະ ນັກກີລາຕ່າງໆ. ນອກນັ້ນ, ຍັງໄດ້ພົບປະກັບບັນດານັກຂຽນ, ນັກແຕ່ງ ແລະ ນັກເວົ້າທີ່ມີປະສົບການສູງຈາກພາຍໃນ ແລະ ຕ່າງປະເທດອີກ.

ຂ່າວ: ກາວຊົ່ງ; ຮູບ: ວິລະສັກ

%d bloggers like this: