ປີນີ້ເມືອງຮຸນ ຈະສູ້ຊົນໃຫ້ລາຍຮັບຕໍ່ຫົວຄົນບັນລຸ 1.500 ໂດລາ

ປີຜ່ານມາເສດຖະກິດ ເມືອງຮຸນ ແຂວງອຸດົມໄຊ ຂະຫຍາຍຕົວຢູ່ທີ່ລະດັບ 8% ແຕ່ລາຍຮັບຕໍ່ຫົວຄົນຫຼຸດປີກ່ອນປະມານ 42 ໂດລາ ຂະນະທີ່ປີ 2019 ທາງເມືອງຈະສູ້ຊົນໃຫ້ລາຍຮັບຕໍ່ຫົວຄົນຢູ່ທີ່ 1.500 ໂດລາ.

ທ່ານ ບຸນຕຽມ ສຸພັນທອງ ຮັກສາການເຈົ້າເມືອງໆຮຸນ ແຂວງອຸດົມໄຊ ກ່າວວ່າ: ການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມຂອງເມືອງ ໄລຍະຜ່ານມາມີທັງຂໍ້ສະດວກ ແລະ ຂໍ້ຫຍຸ້ງຍາກ, ມີທັງຜົນສຳເລັດ ແລະ ຂໍ້ຄົງຄ້າງ. ແຕ່ເຖິງຢ່າງໃດກໍຕາມ, ພາຍໃນການຊີ້ນຳ – ນໍາພາຂອງຄະນະພັກ, ຄະນະນຳຂອງເມືອງ ຈຶ່ງເຮັດໃຫ້ດ້ານເສດຖະກິດມະຫາພາກຂະຫຍາຍຕົວຢູ່ໃນລະດັບ 8%, ລວມຍອດມູນຄ່າຜະລິດຕະພັນ ແລະ ການບໍລິການພາຍໃນໄດ້ 821,98 ຕື້ກີບ, ສະເລ່ຍລາຍຮັບຕໍ່ຫົວຄົນໄດ້ 9,6 ລ້ານກີບ ເທົ່າກັບ 1.212 ໂດລາສະຫະລັດຕໍ່ຄົນຕໍ່ປີ ທຽບໃສ່ປີຜ່ານມາ ຫຼຸດລົງ 42 ໂດລາສະຫະລັດ. ໃນນັ້ນ, ຂະແໜງກະສິກຳ ແລະ ປ່າໄມ້ບັນລຸ 380,82 ຕື້ກີບ ກວມ 46,33% ທຽບໃສ່ປີຜ່ານມາເພີ່ມຂຶ້ນ 8,24%, ຂະແໜງອຸດສາຫະກຳການຄ້າ ບັນລຸ 179,06 ຕື້ກີບ ກວມ 21,79% ທຽບໃສ່ປີຜ່ານມາເພີ່ມຂຶ້ນ 3,15% ແລະ ຂະແໜງການບໍລິການ ບັນລຸ 262,09 ຕື້ກີບ ກວມ 31,89% ທຽບໃສ່ປີຜ່ານມາຫຼຸດລົງ 11,39%.

ທ່ານ ບຸນຕຽມ ສຸພັນທອງ ກ່າວຕື່ມອີກວ່າ: ໃນປີ 2019 ນີ້ທາງເມືອງຈະສູ້ຊົນເຮັດໃຫ້ເສດຖະກິດຂອງເມືອງມີການຂະຫຍາຍຕົວຢ່າງຕໍ່ເນື່ອງ ສະເລ່ຍບໍ່ໃຫ້ຫຼຸດ 8%. ໃນນັ້ນ, ລວມຍອດຜະລິດຕະພັນ ( GDP ) ໃຫ້ບັນລຸ 971,88 ຕື້ກີບ ສະເລ່ຍຕໍ່ຫົວຄົນໃຫ້ໄດ້ 12,27 ລ້ານກີບ ເທົ່າກັບ 1.500 ໂດລາສະຫະລັດຕໍ່ຄົນຕໍ່ປີ.

ຂ່າວ: ຄານມະນີ ຮຽນດໍຈັນ

%d bloggers like this: