ທ່າແຮງເຟີນີເຈີລາວ ກັບໂອກາດສູ່ຕະຫຼາດນອກ

ຄວາມຫວັງຂອງການຈັດງານວາງສະແດງສິນຄ້າເຟີນີເຈີລາວ ແຕ່ລະຄັ້ງແມ່ນຫວັງໃຫ້ສັດສ່ວນກໍາລັງຈໍາໜ່າຍພາຍໃນ ແລະ ການສົ່ງອອກໄປຕ່າງປະເທດໃກ້ຄຽງກັນຫຼາຍທີ່ສຸດ ເພື່ອດຶງເງິນຕາເຂົ້າໃນປະເທດ ຫວັງປັບປຸງໂຮງງານໃຫ້ທັນສະໄໝ ຍົກກໍາລັງການຜະລິດເຈາະຕະຫຼາດຕ່າງປະເທດໃຫ້ກວ້າງຂຶ້ນ.

ທ່ານ ກອງມາລາ ພົມມາໄລ ຮອງປະທານສະມາຄົມເຟີນີເຈີລາວ ໄດ້ກ່າວວ່າ: ງານວາງສະແດງສິນຄ້າເຟີນີເຈີ ວຽງຈັນ ຄັ້ງທີ 4 ປີ 2019 ເຫັນວ່າມີຫົວໜ່ວຍທຸລະກິດຈັບຈອງຫ້ອງວາງສະແດງສິນຄ້າຫຼາຍສົມຄວນ 80 ຫົວໜ່ວຍທຸລະກິດ ຈາກ 10 ແຂວງໃນປະເທດ ເຊິ່ງສະແດງໃຫ້ເຫັນຄວາມກະຕືລືລົ້ນຂອງຫົວໜ່ວຍຜູ້ປະກອບການເຟີນີເຈີ ຢາກປະກອບສ່ວນຢ່າງຕັ້ງໜ້າໃນການຈັດຕັ້ງປະຕິບັດຄໍາສັ່ງເລກທີ 15/ນຍ ໃຫ້ປາກົດຜົນເປັນຈິງເທື່ອລະກ້າວ ໂດຍຜ່ານເວທີການວາງສະແດງຜະລິດຕະພັນຂອງແຕ່ລະໂຮງງານ ເພື່ອຈະໄດ້ມີການປຶກສາຫາລືລະຫວ່າງຜູ້ປະກອບການດ້ວຍກັນ ແລະ ຜູ້ປະກອບການກັບຜູ້ຊົມໃຊ້ທັງພາຍໃນ ແລະ ຕ່າງປະເທດ ເຊິ່ງພິເສດສຸດການຈັດງານປີ 2019 ນີ້ ລັດຖະບານລາວ ກໍໄດ້ມີການເປີດປີທ່ອງທ່ຽວ ລາວ – ຈີນ. ສະນັ້ນ, ສະມາຄົມເຟີນີເຈີ ຈຶ່ງເລັງເຫັນໂອກາດ ໂດຍຈະເຊີນນັກທຸລະກິດຈີນມາຮ່ວມຊື້ – ຮ່ວມຂາຍ ເພື່ອສາມາດສົ່ງອອກໄປປະເທດຈີນໃຫ້ໄດ້ ເຊິ່ງຈະເປັນການປະກອບສ່ວນສ້າງສີສັນປີທ່ອງທ່ຽວ ລາວ – ຈີນ ໃຫ້ມີບັນຍາກາດຄຶກຄືນກະຕຸ້ນເສດຖະກິດຂະຫຍາຍຕົວໄປພ້ອມ.

ທ່ານກ່າວວ່າ: ສະມາຄົມເຟີນີເຈີລາວ ຍັງຫວ່ງບັນຫາການສົ່ງອອກສິນຄ້າເຟີນີເຈີລາວບໍ່ໄດ້ ຕົວຢ່າງ: ຜະລິດຕະພັນສໍາເລັດຮູບບາງຢ່າງ ອາດຈະໃຫຍ່ ຫຼື ນ້ອຍກໍຢາກໃຫ້ຂະແໜງການກ່ຽວຂອງລົງມາຕິດຕາມນໍາກັນຕົວຈິງ ເຊິ່ງປັດຈຸບັນຜູ້ປະກອບການເຟີນີເຈີຜະລິດມາໄດ້ສາມາດສົ່ງອອກໄດ້ພຽງ 30% ສ່ວນ 70% ແມ່ນຈໍລະຈອນພາຍໃນ ( ຕະຫຼາດມີຈໍາກັດ ) ເຊິ່ງເປັນສິ່ງທ້າທາຍ ແຕ່ຖ້າຫາກມີການຮ່ວມມືກັນຈິງຈັງລະ ຫວ່າງຜູ້ປະກອບການ ແລະ ພາກລັດ ກໍຈະຊ່ວຍຊຸກຍູ້ສັດສ່ວນການສົ່ງອອກ ແລະ ຈໍລະຈອນພາຍໃນໃຫ້ໃກ້ຄຽງກັນ. ທັງນີ້, ເພື່ອນໍາເງິນຕາເຂົ້າມາ ຜູ້ປະກອບການກໍສາມາດຍົກລະດັບໂຮງງານຜະລິດໃຫ້ໄດ້ມາດຖານເທື່ອລະກ້າວ.

ທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ກ່າວວ່າ: ເພື່ອຮອງຮັບໂອກາດເປີດປີທ່ອງທ່ຽວ ລາວ – ຈີນ. ສະນັ້ນ, ສະເໜີໃຫ້ຜູ້ປະກອບການເຟີນີເຈີລາວ ທີ່ເຂົ້າຮ່ວມງານວາງສະແດງເຟີເນີເຈີວຽງຈັນ ຄັ້ງທີ 4 ໃຫ້ມີພະນັກງານປະຈໍາໃນຫ້ອງຂາຍຂອງຕົນເອງ ເວລານັກທ່ອງທ່ຽວ ຫຼື ນັກທຸລະກິດຈີນເຂົາເຈົ້າມີຄວາມສົນໃຈ ບາງທີອາດມີການຕິດຕໍ່ຄ້າຂາຍສິນຄ້າຮ່ວມກັນໃນຕໍ່ໜ້າ ເຊິ່ງຝ່າຍຈີນເອງກໍມີງານວາງສະແດງສິນຄ້າຢູ່ຄຸນໝິງ ແລະ ໜານໜິງ ເຊິ່ງຈະຈັດຂຶ້ນປະມານເດືອນມິຖຸນາ ແລະ ເດືອນກັນຍາຂອງທຸກໆປີ ຖ້າຫາກມີການພົວພັນໃນງານວາງສະແດງເຟີນີເຈີວຽງຈັນ ຄັ້ງທີ 4 ແລ້ວ ຈະເປັນໂອກາດດີທີ່ຈະນໍາເອົາສິນຄ້າໄປວາງສະແດງ ແລະ ຂາຍຢູ່ຄຸນໝິງ ແລະ ໜານໜິງ.

ຂ່າວ: ພຸດຕີ້

%d bloggers like this: