ຄໍາມ່ວນ ຄັດເລືອກຕົວແທນ ເຂົ້າຮ່ວມສອບເສັງນັກຮຽນເກັ່ງທົ່ວປະເທດ

ທ້າຍເດືອນຜ່ານມາ ແຂວງຄໍາມ່ວນ ໄດ້ຈັດພິທີສະຫຼຸບຜົນຂອງການສອບເສັງຄັດເລືອກນັກຮຽນເກັ່ງສາຍສາມັນສຶກສາ       ( ປ 5, ມ 4 ແລະ ມ 7 ) ຂັ້ນແຂວງປະຈໍາສົກຮຽນ 2018 – 2019 ຂຶ້ນ ໂດຍການເປັນປະທານຂອງ ທ່ານ ນັນຕະໄຊ ອິນທະສອນ ຮອງຫົວໜ້າພະແນກສຶກສາທິການ ແລະ ກີລາແຂວງ, ມີບັນດາຕາງໜ້າຂະແໜງ, ພະນັກງານວິຊາການ, ຕາງໜ້າຄູ – ອາຈານແຕ່ລະໂຮງຮຽນຕະຫຼອດເຖິງນ້ອງນັກຮຽນເຂົ້າຮ່ວມ.

Image result for ນັກຮຽນ

ພາບປະກອບຂ່າວ ບໍ່ມີສ່ວນກ່ຽວຂ້ອງກັບເນື້ອຂ່າວ

 

ທ່ານ ອຸດຕະມະ ຈັນນີຍະວົງ ຮອງຫົວໜ້າຂະແໜງສາມັນສຶກສາ ໄດ້ຜ່ານບົດສະຫຼຸບຜົນຂອງການສອບເສັງຄັດເລືອກນັກຮຽນທົ່ວແຂວງ ເຊິ່ງລວມມີຕົວແທນຈາກ 10 ຕົວເມືອງເຂົ້າຮ່ວມ ແລະ ໂຮງຮຽນທີ່ຂຶ້ນກັບ ເຊິ່ງໄດ້ຈັດການສອບເສັງຄັດເລືອກໃນວັນທີ 27 – 28 ກຸມພາ 2019 ທີ່ສູນ ໄອຊີທີ ພະແນກສຶກສາທິການ ແລະ ກີລາແຂວງ ວ່າ: ໂຮງຮຽນມັດທະຍົມທີ່ເຂົ້າຮ່ວມການສອບເສັງຄັດເລືອກ ມີ 37 ແຫ່ງ. ໃນນັ້ນ, ມ.ປາຍ 03 ແຫ່ງ, ມສ 16 ແຫ່ງ ແລະ ມ.ຕົ້ນ 18 ແຫ່ງ ຈາກໂຮງຮຽນມັດທະຍົມທັງໝົດທົ່ວແຂວງ 137 ແຫ່ງ. ໃນນັ້ນ, ມ.ປາຍ 04 ແຫ່ງ, ມສ 59 ແຫ່ງ ແລະ ມ.ຕົ້ນ 74 ແຫ່ງ, ນັກສອບເສັງຊັ້ນມັດທະຍົມສຶກສາທັງໝົດ 67 ຄົນ ຍິງ 42 ຄົນ. ໃນນັ້ນ, ມ 4 ມີ 32 ຄົນ ຍິງ 20 ຄົນ; ມ 7 ມີ 35 ຄົນ ຍິງ 22 ຄົນ, ແບ່ງເປັນ 02 ຫ້ອງສອບເສັງ, ປະກອບມີ 05 ວິຊາສອບເສັງ ຄື: ພາສາລາວ, ຄະນິດສາດ, ເຄມີສາດ, ຟີຊິກສາດ ແລະ ພາສາອັງກິດ.

Image result for ນັກຮຽນ

ພາບປະກອບຂ່າວ ບໍ່ມີສ່ວນກ່ຽວຂ້ອງກັບເນື້ອຂ່າວ

 

ສໍາລັບໂຮງຮຽນປະຖົມ ໄດ້ເຂົ້າຮ່ວມການສອບເສັງ 25 ແຫ່ງ ຈາກໂຮງຮຽນປະຖົມ ທັງໝົດ 646 ແຫ່ງໃນທົ່ວແຂວງ, ນັກສອບເສັງຊັ້ນປະຖົມສຶກສາ ( ປ 5 ) ຈໍານວນ 31 ຄົນ ຍິງ 21 ຄົນ, ມີ 01 ຫ້ອງສອບເສັງ, ປະກອບມີ 03 ວິຊາສອບເສັງ ຄື: ພາສາລາວ, ຄະນິດສາດ ແລະ ໂລກອ້ອມຕົວ.

ສະຫຼຸບແລ້ວນັກຮຽນເກັ່ງຂັ້ນ ມ 4 ທີ່ຈະເຂົ້າຮ່ວມການສອບເສັງລະດັບປະເທດທີ່ນະຄອນຫຼວງວຽງຈັນ ລວມມີ 04 ຄົນ ຍິງ 02 ຄົນ ຈາກ ມສ ເທີນຫີນບູນ ເມືອງຄູນຄໍາ, ມສ ປົ່ງກິ່ວ – ຍາງໃຫຍ່ ແລະ ມສ ເຊບັ້ງໄຟ ເມືອງເຊບັ້ງໄຟ ໂດຍຈະເສັງວິຊາພາສາລາວ – ວັນນະຄະດີ, ຄະນິດສາດ ແລະ ວິຊາເຄມີສາດ; ສ່ວນ ມ 7 ມີ 04 ຄົນ ຍິງ 03 ຄົນ ຈາກ ມສ ຍົມມະລາດ ເມືອງຍົມມະລາດ ແລະ ມ.ປາຍ ທ່າແຂກ; ສ່ວນວິຊາທີ່ຈະສອບເສັງ ມີ: ວິຊາພາສາລາວ – ວັນນະຄະ ດີ, ວິຊາຄະນິດສາດ, ວິຊາຟີຊິກສາດ ແລະ ວິຊາເຄມີສາດ.

Related image

ພາບປະກອບຂ່າວ ບໍ່ມີສ່ວນກ່ຽວຂ້ອງກັບເນື້ອຂ່າວ

 

ທ່ານ ນັນຕະໄຊ ອິນທະສອນ ຮອງຫົວໜ້າພະແນກສຶກສາທິການ ແລະ ກີລາແຂວງ ໄດ້ກ່າວຕື່ມວ່າ: ພາຍຫຼັງສໍາເລັດການສອບເສັງນັກຮຽນເກັ່ງໃນຂັ້ນແຂວງແລ້ວ ແມ່ນຈະໃຊ້ເວລາທີ່ຍັງເຫຼືອປະມານ 20 ກວ່າວັນ ເພື່ອຊຸກຍູ້ປຸກລະດົມໃຫ້ຜູ້ປົກຄອງນັກຮຽນລວມເຖິງຄູ – ອາຈານທີ່ຮັບຜິດຊອບການສອນໃນແຕ່ລະວິຊາໃຫ້ຈັດການສອນເພີ່ມ ເພື່ອເພີ່ມທັກສະຄວາມສາມາດ ແລະ ຄວາມຮູ້ໃຫ້ໜັກແໜ້ນຂຶ້ນຕື່ມ ກ່ອນຈະໄປເສັງລະດັບປະເທດ.

Image result for ນັກຮຽນ

ພາບປະກອບຂ່າວ ບໍ່ມີສ່ວນກ່ຽວຂ້ອງກັບເນື້ອຂ່າວ

 

[ ຂ່າວ : ແດງສະຫວັດ ແສນພານິດ ]

 

%d bloggers like this: