ສາລະວັນ ເປີດງານວາງສະແດງ ແລະ ຈຳໜ່າຍສິນຄ້າ ລາວ – ໄທ

ທ້າຍອາທິດຜ່ານມາ ແຂວງສາລະວັນ ຮ່ວມກັບ ສອງແຂວງຈາກປະເທດໄທ ຈັດງານວາງສະແດງ ແລະ ຈຳໜ່າຍສິນຄ້າ ເພື່ອສານສາຍສຳພັນບ້ານໃກ້ເຮືອນຄຽງ ລາວ – ໄທ ທັງເປັນການຫາຊ່ອງທາງຂະຫຍາຍຕະຫຼາດສິນຄ້າໂອດ໊ອບ – ໂອທ໊ອບ 2019.

ງານດັ່ງກ່າວຈັດຂຶ້ນທີ່ເດີ່ນອະນຸສາວະລີອົງແກ້ວ ໂດຍເປັນກຽດເຂົ້າຮ່ວມຂອງ ທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ, ທ່ານ ສຸພະສິດ ກໍຈະເລີນບົດ ຮອງຜູ້ວ່າລາດຊະການຈັງຫວັດອຸບົນລາດຊະທານີ, ທ່ານ ວົງເທບ ເຂມວິລັດ ຮອງຜູ້ວ່າລາດຊະການຈັງຫວັດອຳນາດຈະເລີນ, ມີກົງສຸນໃຫຍ່ແຫ່ງຣາຊະອານາຈັກໄທ ປະຈຳແຂວງສະຫວັນນະເຂດ ພ້ອມດ້ວຍການນຳສອງແຂວງ ແລະ ຜູ້ປະກອບການ ລາວ – ໄທເຂົ້າຮ່ວມ.

ທ່ານ ພູທົງ ຄຳມະນີວົງ ຮອງເຈົ້າ ແຂວງໆສາລະວັນ ໄດ້ຂຶ້ນກ່າວວ່າ: ການຈັດງານຄັ້ງນີ້ເປັນການເຊື່ອມສາຍສຳພັນກັບບັນດາປະເທດບ້ານໃກ້ເຮືອນຄຽງ ຄຽງຄູ່ກັບການໄດ້ມີໂອກາດແລກປ່ຽນຊື້ – ຂາຍສິນຄ້າຮ່ວມກັນ, ລວມທັງເປັນການຮຽນຮູ້, ເປັນການພັດທະນາຄຸນນະພາບ ແລະ ມາດຕະຖານຂອງສິນຄ້າໃຫ້ເປັນທີ່ຍອມຮັບຂອງຕະຫຼາດພາຍໃນ ແລະ ຕ່າງປະເທດ, ພ້ອມທັງເປັນການເພີ່ມຊ່ອງທາງໃນການຂະຫຍາຍຕະຫຼາດໃຫ້ມີການຜະລິດສິນຄ້າໂອດ໊ອບ – ໂອທ໊ອບ ໂດຍສະເພາະຢູ່ແຂວງສາລະວັນ ກັບ ຈັງຫວັດອຸບົນລາດຊະທານີ ແລະ ຈັງຫວັດອຳນາດຈະເລີນ ປະເທດໄທ ແນໃສ່ສ້າງເງື່ອນໄຂໃຫ້ຜູ້ປະກອບການໄດ້ນຳເອົາສິນຄ້າມາຈຳໜ່າຍ, ນຳມາໂຄສະນາ ຍົກລະດັບສີໄມ້ລາຍມື ກໍຄືພູມປັນຍາຂອງປະຊາຊົນຢູ່ໃນທ້ອງຖິ່ນ, ເປັນການເປີດກວ້າງເຊື່ອມໂຍງດ້ານເສດຖະກິດ ລະຫວ່າງບັນດາປະເທດອາຊຽນດ້ວຍກັນ.

ສ່ວນສິນຄ້າທີ່ນຳມາສະແດງພາຍໃນງານມີສິນຄ້າເປົ້າໝາຍ ໜຶ່ງເມືອງໜຶ່ງຜະລິດຕະພັນ ຈາກ 4 ຕົວເມືອງ 5 ຫົວໜ່ວຍ ຂອງແຂວງສາລະວັນ ແລະ ສິນຄ້າໂອທ໊ອບມາຈາກຈັງຫວັດອຸບົນລາດຊະທານີ ແລະ ຈັງຫວັດອຳນາດຈະເລີນ ແຫ່ງຣາຊະອານາຈັກໄທ ປະກອບມີ: ເຄື່ອງອຸປະໂພກ, ບໍລິໂພກ, ເສື້ອຜ້າ, ແຜ່ນແພ, ເຄື່ອງຫັດຖະກຳຕ່ຳແຜ່ນ, ຫັດຖະກຳຈັກສານ, ຫັດຖະກຳເຄື່ອງເງິນ, ເຄື່ອງແກະສະຫຼັກ, ເຄື່ອງເຟີນີເຈີໄມ້ ແລະ ອື່ນໆ ລວມທັງໝົດ 120 ກວ່າຮ້ານ. ໃນນີ້, ຮ້ານສິນຄ້າໂອດ໊ອບ ຈຳນວນ 10 ຮ້ານໂອທ໊ອບຈຳນວນ 90 ຮ້ານ ແລະ ຮ້ານສິນຄ້າທົ່ວໄປ 25 ຮ້ານ ລວມມູນຄ່າທັງໝົດ 2 ຕື້ກວ່າກີບ.

ຮູບ – ຂ່າວ: ກິນດາວັນ

%d bloggers like this: