ລົງທຶນ 500 ລ້ານໂດລາ ສ້າງສູນການຄ້າຄົບວົງຈອນຢູ່ ຂພສ ທ່າແຂກ

ບໍລິສັດ ໂຈ້ບຸນມີ ກຣຸບ ເຫັນໂອກາດໃນເຂດເສດຖະກິດສະເພາະທ່າແຂກ ( ຂພສ ທ່າແຂກ ) ແຂວງຄຳມ່ວນ ຈຶ່ງໄດ້ຕັດສິນໃຈສືບຕໍ່ລົງທຶນໃນຂະແໜງການຕ່າງໆ. ຫຼ້າສຸດໄດ້ມີພິທີວາງສີລາລືກເປີດການກໍ່ສ້າງສູນການຄ້າ – ຮ້ານຊັບພະສິນຄ້າ, ຜະລິດຕະພັນສິນຄ້າ, ປຸງແຕ່ງ – ຫຸ້ມຫໍ່, ປະກອບຊິ້ນສ່ວນຕ່າງໆເພື່ອຜະລິດຊົມໃຊ້ພາຍໃນ ແລະ ສົ່ງອອກຕ່າງປະເທດ ໃນເນື້ອທີ່ 100 ກວ່າເຮັກຕາ ດ້ວຍມູນຄ່າການລົງທຶນຫຼາຍເຖິງ 500 ລ້ານໂດລາ.

ທ່ານ ນົງສະຫວັນ ທຳມະວົງ ຮອງປະທານສະພາບໍລິຫານເຂດເສດຖະກິດສະເພາະທ່າແຂກ ກ່າວວ່າ: ໄລຍະຜ່ານມາ ບໍລິສັດ ໂຈ້ບຸນມີ ກຣຸບ ໄດ້ເຊັນບົດບັນທຶກຄວາມເຂົ້າໃຈກັບເຂດພວກເຮົາໃນການສຳປະທານເນື້ອທີ່ດິນ 114 ເຮັກຕາຢູ່ ເຊິ່ງຕາມແຜນຂອງບໍລິສັດແບ່ງອອກເປັນສອງໄລຍະ ດ້ວຍມູນຄ່າການລົງທຶນທັງໝົດ 2 ຕື້ໂດລາ. ໃນນີ້, ໄລຍະທີ່ໜຶ່ງແມ່ນລົງທຶນສ້າງສະຖານີຂົນສົ່ງຄ່ຽນຖ່າຍຕູ້ຄອນເທັນເນີສິນຄ້າ ເນື້ອທີ່ 45 ເຮັກຕາ ມູນຄ່າ 100 ລ້ານໂດລາ ໃນປີ 2015 ແລະ ເປີດນຳໃຊ້ສະຖານີບໍລິການເມື່ອປີ 2017; ແຕ່ມາຮອດປັດຈຸບັນ, ຕາມການຕົກລົງເຫັນດີຂອງລັດຖະບານ ບໍລິສັດ ຈຶ່ງໄດ້ສືບຕໍ່ລົງທຶນໃນໄລຍະທີ່ສອງດ້ວຍການສຸມໃສ່ພັດທະນາເປັນການກໍ່ສ້າງສູນການຄ້າ – ຮ້ານຊັບພະສິນຄ້າ, ຜະລິດຕະພັນສິນຄ້າ, ປຸງແຕ່ງ – ຫຸ້ມຫໍ່, ປະກອບຊິ້ນສ່ວນຕ່າງໆເພື່ອຜະລິດຊົມໃຊ້ພາຍໃນ ແລະ ສົ່ງອອກຕ່າງປະເທດ ໃນເນື້ອທີ່ທັງໝົດ 100,88 ເຮັກຕາ ດ້ວຍມູນຄ່າການລົງທຶນ 500 ລ້ານໂດລາ, ມີອາຍຸການສຳປະທານ 68 ປີ ແລະ ສາມາດຕໍ່ໄດ້ຕາມລະບຽບກົດໝາຍທີ່ກຳນົດໄວ້.

ທ່ານ ສຸກກະເສີມ ເຕໂຊ ທີ່ປຶກສາ ບໍລິສັດ ໂຈ້ບຸນມີ ພັດທະນາເຕັກໂນໂລຊີ ຈໍາກັດຜູ້ດຽວ ເຊິ່ງເປັນ ບໍລິສັດໃນເຄືອຂອງ ໂຈ້ບຸນມີ ກຣຸບ ໃຫ້ຮູ້ຕື່ມອີກວ່າ: ບໍລິສັດຂອງພວກເຮົາດຳເນີນທຸລະກິດມາຫຼາຍກວ່າ 30 ປີແລ້ວ, ຜ່ານການຕົກລົງເຫັນດີຂອງລັດຖະບານທີ່ໄດ້ກ່າວມາຂ້າງເທິງ ບໍລິສັດ ໂຈ້ບຸນມີ ກຣຸບ ຈຶ່ງໄດ້ສືບຕໍ່ລົງທຶນໃນໄລຍະສອງ ໂດຍຈະສຸມໃສ່ການພັດທະນາເປັນສູນການຄ້າ, ຮ້ານຊັບພະສິນຄ້າຜະລິດສິນຄ້າ, ປຸງແຕ່ງຫຸ້ມຫໍ່, ປະກອບຊິ້ນສ່ວນຕ່າງໆ ເພື່ອຊົມໃຊ້ພາຍໃນ ແລະ ຈໍາໜ່າຍອອກໄປຕ່າງປະເທດມີແຜນລົງທຶນໃນໄລຍະທໍາອິດ 500 ລ້ານໂດລາ ປະກອບມີ 18 ກິດຈະການ ເປັນຕົ້ນແມ່ນ: 1). ໂຮງງານປະກອບລົດໃຫຍ່; 2). ໂຮງງານປະກອບລົດຈັກທຸກຊະນິດ; 3). ໂຮງງານປະກອບເຄື່ອງໄຟຟ້າ. 4). ໂຮງງານປະກອບເຄື່ອງເອເລັກໂຕຣນິກທຸກຊະນິດ; 5). ບໍລິສັດເຄືອຂ່າຍເຕັກໂນໂລຊີຄົບວົງຈອນ; 6). ໂຮງງານຕັດຫຍິບ; 7). ໂຮງງານຊໍາຊຸງຜະລິດເຄື່ອງດື່ມໂສມເກົາຫຼີບໍາລຸງຮ່າງກາຍ; 8). ໂຮງງານແປຮູບໝາກເຜັດແຊ່ແຂງ; 9). ໂຮງງານຜະລິດເສັ້ນເຝີ ແລະ ເສັ້ນໝີ່; 10). ໂຮງງານຜະລິດໜໍ່ໄມ້ແຫ້ງ; 11). ໂຮງງານຜະລິດກະດາດຊາຍ; 12). ໂຮງງານຜະລິດຫົວອາຫານໝູ; 13). ໂຮງງານຜະລິດກະເປົ໋າ; 14). ໂຮງງານຜະລິດເກີບທຸກຊະນິດ; 15). ສາງເກັບສິນຄ້າທົ່ວໄປ; 16). ສາງເກັບສິນຄ້າສະເພາະ; 17). ໂທລະຄົມມະນາຄົມ; 18). ບໍລິການຈໍາໜ່າຍນໍ້າມັນເຊື້ອໄຟ.

ພິທີວາງສີລາລືກເປີດການກໍ່ສ້າງສູນການຄ້າ – ຮ້ານຊັບພະສິນຄ້າ, ຜະລິດຕະພັນສິນຄ້າ, ປຸງແຕ່ງ – ຫຸ້ມຫໍ່, ປະກອບຊິ້ນສ່ວນຕ່າງໆຂອງ ບໍລິສັດ ໂຈ້ບຸນມີ ພັດທະນາເຕັກໂນໂລຊີ ຈໍາກັດຜູ້ດຽວ ຈັດຂຶ້ນໃນວັນທີ 4 ມີນາ 2019 ທີ່ ຂພສ ທ່າແຂກ ແຂວງຄຳມ່ວນ; ໃຫ້ກຽດຕັດແຖບຜ້າຂອງ ທ່ານ ອາລຸນແກ້ວ ກິດຕິຄຸນ ລັດຖະມົນຕີປະຈຳສຳນັກງານນາຍົກລັດຖະມົນຕີ, ທ່ານ ພົນຕີ ອ່ອນສີ ແສນສຸກ ຮອງລັດຖະມົນຕີກະຊວງປ້ອງກັນປະເທດ, ທ່ານ ບຸນມີ ພິມມະສອນ ຮອງເຈົ້າແຂວງໆຄຳມ່ວນ, ທ່ານ ນາງ ບຸນມີ ບັງອອນແສງເດດ ປະທານ ບໍລິສັດ ໂຈ້ບຸນມີ ພັດທະນາເຕັກໂນໂລຊີ ຈໍາກັດຜູ້ດຽວ, ມີບັນດາຜູ້ຕາງໜ້າຈາກກະຊວງແຜນການ ແລະ ການລົງທຶນ, ກະຊວງການເງິນ, ເຂດເສດຖະກິດສະເພາະທ່າແຂກ ພ້ອມດ້ວຍແຂກຖືກເຊີນເຂົ້າຮ່ວມ.

ຂ່າວ – ຮູບ: ສົມສະຫວິນ

%d bloggers like this: