ທົ່ວປະເທດມີເນື້ອທີ່ປູກຢາງພາລາ 3 ແສນເຮັກຕາ

ຢາງພາລາ ໄດ້ກາຍເປັນພືດເສດຖະກິດໃໝ່ທີ່ມີທ່າແຮງສູງໃນການຍົກລະດັບຊີວິດການເປັນຢູ່ຂອງປະຊາຊົນ ເຊິ່ງນັບແຕ່ຊຸມປີ 2000 ເປັນຕົ້ນມາທີ່ຢາງພາລາໄດ້ເລີ່ມເຂົ້າມາໃນດິນແດນລາວຢ່າງເຕັມຕົວ ມາຮອດປັດຈຸບັນມີເນື້ອທີ່ປູກທົ່ວປະເທດ 3 ແສນເຮັກຕາ. ໃນນັ້ນ, 50% ແມ່ນສາມາດປາດນໍ້າຢາງໄດ້ແລ້ວ.

ທ່ານ ວິໄລວັນ ພົມເຂ ປະທານສະມາຄົມຢາງພາລາລາວໄດ້ໃຫ້ສໍາພາດກັບທີມຂ່າວໜັງສືພິມ ເສດຖະກິດ – ການຄ້າ ວ່າ: ຢາງພາລາໄດ້ປະກອບສ່ວນສໍາຄັນເຂົ້າໃນວຽກງານພັດທະນາເສດຖະກິດ – ສັງຄົມຂອງລາວເຮົາ ໃນ 4 ແຜນງານ ຄື: ການຜະລິດເປັນສິນຄ້າ ເອີ້ນໄດ້ວ່າຢາງພາລາເປັນແຫຼ່ງລາຍໄດ້ແຫ່ງຊາດ ເຮັດໃຫ້ປະເທດລາວເຮົາມີສິນຄ້າສົ່ງອອກ; ແຜນງານຢຸດຕິການຖາງປ່າເຮັດໄຮ່ ແລະ ຈັດສັນອາຊີບຄົງທີ່ ເຮັດໃຫ້ປະຊາຊົນມີອາຊີບທີ່ໝັ້ນຄົງຫັນມາປູກໄມ້ແທນການຖາງປ່າເຮັດໄຮ່; ແກ້ໄຂບັນຫາສິ່ງແວດລ້ອມຊ່ວຍໃນການປັບສະພາບດິນຟ້າອາກາດໃຫ້ມີ ຄວາມສົມດຸນ; ແກ້ໄຂຄວາມທຸກຍາກ, ສ້າງວຽກເຮັດງານທໍາໃຫ້ກັບປະຊາຊົນໄດ້ມີຢູ່ມີກິນ ເຊິ່ງສະເລ່ຍແລ້ວປະຊາຊົນທີ່ປູກຢາງພາລາ ກວມ 80% ຍັງມີຄວາມພໍໃຈຕໍ່ກັບການປະກອບອາຊີບປູກຢາງພາລາ ເນື່ອງຈາກໃຊ້ທຶນຕົນເອງໃນການປູກ ສ່ວນອີກ 20% ແມ່ນໄດ້ກູ້ຢືມເງິນມາລົງທຶນ ເຊິ່ງອາດຈະມີຄວາມຫຍຸ້ງຍາກແດ່ ເພາະລາຄາຢາງມີການເໜັງຕີງຕາມລາຄາຕະຫຼາດໂລກ.

ທ່ານໃຫ້ຮູ້ຕື່ມວ່າ: ຢາງພາລາໄດ້ຖືກນໍາເຂົ້າມາ ສປປ ລາວ ຄັ້ງທໍາອິດຕັ້ງແຕ່ປີ 1930 ຢູ່ພາກໃຕ້ຂອງລາວ ໂດຍແມ່ນຄົນຝຣັ່ງ ເປັນຜູ້ນໍາເຂົ້າມາປູກເພື່ອປະດັບ ໃນເນື້ອທີ່ປະມານ 2 ເຮັກຕາເທົ່ານັ້ນ. ຫຼັງຈາກນັ້ນ, ກໍເລີ່ມທະຍອຍເຂົ້າມາເລື້ອຍໆດ້ວຍຮູບການຕ່າງໆ ແລະ ເລີີ່ມກາຍເປັນສິນຄ້າ, ຈົນມາຮອດຊຸມປີ 2000 ຢາງພາລາເລີ່ມມີບົດບາດເດັ່ນຂຶ້ນ, ມີລາຄາສູງເຖິງ 18 ພັນກີບຕໍ່ກິໂລ ໃນໄລຍະນັ້ນເອີ້ນໄດ້ວ່າເຮັດໃຫ້ຊາວສວນຜູ້ປະກອບອາຊີບນີ້ມີລາຍຮັບດີ, ມາໃນໄລຍະປີ 2015 ລັດຖະບານໄດ້ໂຈະຊົ່ວຄາວສໍາລັບການອະນຸຍາດສໍາປະທານປູກຢາງພາລາ ເພື່ອສໍາຫຼວດຄືນເນື້ອທີ່ປູກຕົວຈິງ ສົ່ງຜົນໃຫ້ປັດຈຸບັນມີເນື້ອທີ່ປູກທັງໝົດ 3 ແສນເຮັກຕາ. ໃນນັ້ນ, ເນື້ອທີ່ໆສາມາດປາດນໍ້າຢາງໄດ້ມີ 1,5 ແສນເຮັກຕາ ນອນຢູ່ໃນອັນດັບ 6 ຂອງການປູກຢາງພາລາໃນອາຊຽນ, ຂະນະທີ່ອັນດັບ1 ແມ່ນໄທ, ອັນດັບ 2 ອິນໂດເນເຊຍ, ອັນດັບ 3 ຫວຽດນາມ, ອັນດັບ 4 ມາເລເຊຍ ແລະ ອັນດັບ 5 ມຽນມາ.
ສໍາລັບລາຄາຂາຍຢາງພາລາໃນປັດຈຸບັນສູງສຸດຢູ່ທີ່ 8 ພັນກີບຕໍ່ກິໂລ, ລາຄາຕໍ່າສຸດບໍ່ຫຼຸດ 3.500 ກີບຕໍ່ກິໂລ.

%d bloggers like this: