ການສະກັດກັ້ນ, ຕ້ານການສໍ້ລາດບັງຫຼວງ ແລະ ສືບສວນ – ສອບສວນ

ການສະກັດກັ້ນ, ຕ້ານການສໍ້ລາດບັງຫຼວງ ແລະ ສືບສວນ – ສອບສວນ

 

ມີໂອກາດໄດ້ອ່ານບົດສະຫຼຸບການເຄື່ອນໄຫວວຽກງານກວດກາ ປີ 2018 ແລະ ທິດທາງແຜນການປີ 2019 ເລກທີ 61/ຄກສພ ລົງວັນທີ 12 ກຸມພາ 2019 ເຫັນວ່າຄະນະກວດກາສູນກາງພັກ ເພິ່ນໄດ້ດຳເນີນງານຕາມພາລະບົດບາດຂອງເພິ່ນມີຜົນສຳເລັດຫຼາຍຢ່າງທີ່ໜ້າຊື່ນຊົມຍິນດີ.

 

 

ຜູ້ຂຽນຂໍອະນຸຍາດນຳເອົາຈຸດທີ່ເພິ່ນສະຫຼຸບເລື່ອງການສະກັດກັ້ນ, ຕ້ານການສໍ້ລາດບັງຫຼວງ ແລະ ສືບສວນ – ສອບສວນນຳສະເໜີຍ້ອນວ່າເພື່ອນຜູ້ອ່ານປະຈຳຄໍລຳສ່ອງແສງມາວ່າຊອກຂໍ້ມູນໃນຈຸດນີ້ມາລົງເຜີຍແຜ່ໃຫ້ຊາບແດ່ ວ່າຊັ້ນ!.

ຜົນງານມີດັ່ງນີ້:

ການສະກັດກັ້ນ, ຕ້ານການສໍ້ລາດບັງຫຼວງ ແລະ ສືບສວນ – ສອບສວນ.

ພັກ – ລັດເຮົາ ຍາມໃດກໍຊີ້ໃຫ້ເຫັນເຖິງໄພອັນຕະລາຍຂອງການສໍ້ລາດບັງຫຼວງ, ທັງເອົາໃຈໃສ່ນຳພາສະກັດກັ້ນ ແລະ ແກ້ໄຂບັນຫາດັ່ງກ່າວຕະຫຼອດມາ, ການສະກັດກັ້ນຕ້ານການສໍ້ລາດບັງຫຼວງເປັນໜ້າທີ່, ຄວາມຮັບຜິດຊອບຂອງທຸກໆການຈັດຕັ້ງ ແລະ ພະນັກງານນຳພາ – ຄຸ້ມຄອງແຕ່ລະຂັ້ນ. ໃນນີ້, ຖືເອົາການສະກັດກັ້ນແຕ່ຫົວທີເປັນຕົ້ນຕໍ, ໄດ້ອອກບັນດາມະຕິ, ຄຳສັ່ງ, ກົດໝາຍ ແລະ ນິຕິກຳລຸ່ມກົດໝາຍຫຼາຍສະບັບ. ພ້ອມກັນນັ້ນ, ກໍໄດ້ຫັນເອົາຍຸດທະສາດຕ້ານການສໍ້ລາດບັງຫຼວງເຂົ້າໃນຫຼັກສູດການຮຽນ – ການສອນ, ຈັດຕັ້ງການສຶກສາອົບຮົມການເມືອງ – ແນວຄິດ, ເຜີຍແຜ່, ເຊື່ອມຊຶມໃຫ້ສະມາຊິກພັກ – ພະນັກງານຮັບຮູ້ເຂົ້າໃຈຕໍ່ຜົນຮ້າຍ ແລະ ໄພອັນຕະລາຍຂອງການສໍ້ລາດບັງຫຼວງ ໄດ້ທັງໝົດ 788 ຄັ້ງ ມີຜູ້ເຂົ້າຮ່ວມ 150.053 ຄົນ.

 

  • ກວດກາພົບເຫັນພຶດຕິກຳທີ່ເປັນການສໍ້ລາດບັງຫຼວງຂອງພະນັກງານລັດ ແລະ ຜູ້ປະກອບການທັງໝົດ 105 ເປົ້າໝາຍ, ພົບເຫັນຜົນເສຍຫາຍ 846,44 ຕື້ກີບ, 309,97 ລ້ານບາດ, 599.074 ໂດລາ, 32.000 ຢວນ; ເກັບກູ້ຄືນໄດ້ 370,29 ຕື້ກີບ, 24,25 ລ້ານບາດ, 262.000 ໂດລາ, 32.000 ຢວນ; ຍັງຄ້າງ 476,15 ຕື້ກີບ, 285,72 ລ້ານບາດ, 337.074 ໂດລາ ແລະ ວັດ   ຖຸ, ເງິນ – ຄຳຈຳນວນໜຶ່ງ.

  • ດຳເນີນການແຈ້ງຊັບສິນ ແລະ ລາຍຮັບຂອງພະນັກງານ ຮອບ II ມີທັງໝົດ 265.561 ທ່ານ ຍິງ 98.711 ທ່ານ ( ພະນັກງານຂັ້ນສູນກາງຄຸ້ມຄອງ 2.308 ທ່ານ ຍິງ 278 ທ່ານ, ຂັ້ນກະຊວງ – ອົງການ ແລະ ທ້ອງຖິ່ນຄຸ້ມຄອງ 263.253 ທ່ານ ຍິງ 98.433 ທ່ານ ); ໄດ້ມອບ – ຮັບສຳນວນເອກະສານແຈ້ງຊັບສິນແລ້ວ 227.260 ທ່ານ, ຍິງ 88.026 ທ່ານ ( ຂັ້ນສູນກາງຄຸ້ມຄອງ 2.159 ທ່ານ ຍິງ 256 ທ່ານ, ຂັ້ນກະຊວງ – ອົງການ ແລະ ທ້ອງຖິ່ນຄຸ້ມຄອງ 225.101 ທ່ານ ຍິງ 87.770 ທ່ານ ); ຄ້າງມອບ 38.301 ທ່ານ ຍິງ 10.685 ທ່ານ ( ຂັ້ນສູນກາງຄຸ້ມຄອງ 149 ທ່ານ ຍິງ 22 ທ່ານ; ຂັ້ນກະຊວງ – ອົງການ ແລະ ທ້ອງຖິ່ນຄຸ້ມຄອງ 38.152 ທ່ານ ຍິງ 10.663 ທ່ານ ).

 

 

  • ຜ່ານການຕິດຕາມ, ກວດກາ ໄດ້ພົບເຫັນພຶດຕິກຳການສໍ້ລາດບັງຫຼວງທີ່ພົ້ນເດັ່ນແມ່ນການສວຍໃຊ້ໜ້າທີ່ຕຳແໜ່ງ, ສິດອຳນາດ, ການໃຫ້ ແລະ ຮັບສິນບົນ, ການຍັກຍອກສໍ້ໂກງຊັບຂອງລັດ, ການລັກໂລບປອມແປງມາດຕະຖານເຕັກນິກກໍ່ສ້າງອອກແບບຄິດໄລ່, ການປອມແປງ ແລະ ການນຳໃຊ້ເອກະສານປອມ ແລະ ອື່ນໆ. ໄດ້ກວດກາຜູ້ມີພຶດຕິກຳສໍ້ລາດບັງຫຼວງທັງໝົດ 1.285 ຄົນ. ໃນນີ້, ພະນັກງານລັດ 970 ຄົນ, ຜູ້ປະກອບການ 315 ຄົນ; ກວດກາພົບເຫັນຜູ້ມີພຶດຕິກຳສໍ້ລາດບັງຫຼວງທັງໝົດ 1.002 ຄົນ. ໃນນີ້, ຖືກປະຕິບັດວິໄນດ້ານບໍລິຫານ 849 ຄົນ, ໄດ້ດຳເນີນການສືບສວນ – ສອບສວນ 153 ຄົນ. ໃນນີ້, ກຳລັງດຳເນີນການສືບສວນ – ສອບສວນ 40 ຄົນ, ສະຫຼຸບສຳນວນຄະດີສົ່ງໃຫ້ໄອຍະການປະຊາຊົນ 113 ຄົນ, ໄອຍະການຖະແຫຼງໃຫ້ສານ 61 ຄົນ. ໃນນີ້, ສານຕັດສິນແລ້ວ 55 ຄົນ.

 

 

ສ່ວນແຜນການປີ 2019 ມີດັ່ງນີ້:

ວຽກງານສະກັດກັ້ນ, ຕ້ານການສໍ້ລາດບັງຫຼວງ ແລະ ສືບສວນ – ສອບສວນ.

  • ການສະກັດກັ້ນຕ້ານການສໍ້ລາດບັງຫຼວງ ເປັນໜ້າທີ່ ແລະ ຄວາມຮັບຜິດຊອບຂອງທຸກການຈັດຕັ້ງ ແລະ ພະນັກງານນຳພາ – ຄຸ້ມຄອງແຕ່ລະຂັ້ນ. ໃນນີ້, ຖືເອົາການສະກັດກັ້ນແຕ່ຫົວທີເປັນຕົ້ນຕໍ ແລະ ເປັນບັນຫາພື້ນຖານຍາວນານ, ເອົາການຕ້ານ ແລະ ການແກ້ໄຂເປັນບັນຫາຈຳເປັນ, ຕ້ານ ແລະ ແກ້ໄຂສະພາບການຈົ່ງຈຽມ, ເຫັນອົກເຫັນໃຈ ແລະ ປົກປ້ອງຜູ້ທີ່ມີພຶດຕິກຳສໍ້ລາດບັງຫຼວງ.

  • ເພີ່ມທະວີການສຶກສາອົບຮົມທັດສະນະແນວຄິດ, ຄວາມຮັບຮູ້ – ເຂົ້າໃຈຕໍ່ຜົນຮ້າຍ, ຄວາມເປັນອັນຕະລາຍຂອງການສໍ້ລາດບັງຫຼວງ ຕາມທິດນຳ 3 ບໍ່ ຄື: ບໍ່ກ້າ, ບໍ່ສາມາດ ແລະ ບໍ່ຄິດຢາກສໍ້ລາດບັງຫຼວງ. ກ່ອນອື່ນໝົດຕ້ອງມີຄວາມເປັນເອກະພາບສູງແຕ່ເທິງລົງລຸ່ມ ເລີ່ມຈາກພະນັກງານການນຳຂັ້ນຍຸດທະສາດ, ພະນັກງານນຳພາ – ຄຸ້ມຄອງແຕ່ລະຂັ້ນໃນການຄົ້ນຄວ້າ, ເຊື່ອມຊຶມມະຕິຂອງຄະນະບໍລິຫານງານສູນກາງພັກ ວ່າດ້ວຍການແກ້ໄຂພະຍາດອາຍາສິດ, ສະກັດກັ້ນ ແລະ ຕ້ານການສໍ້ລາດບັງຫຼວງ, ກົດໝາຍວ່າດ້ວຍການຕ້ານການສໍ້ລາດບັງຫຼວງ, ກົດໝາຍວ່າດ້ວຍການກວດກາລັດ, ຍຸດທະສາດຕ້ານການສໍ້ລາດບັງຫຼວງ, ດຳລັດວ່າດ້ວຍການປະຢັດຕ້ານການຟຸມເຟືອຍ ແລະ ລະບຽບການອື່ນໆ.

 

 

  • ກະກຽມສະຫຼຸບ ແລະ ປະເມີນຜົນການຈັດຕັ້ງປະຕິບັດຍຸດທະສາດຕ້ານການສໍ້ລາດບັງຫຼວງ ແຕ່ນີ້ຮອດປີ 2020 ພ້ອມທັງຄົ້ນຄວ້າປະກອບຄຳເຫັນຄວນປັບປຸງບັນຫາໃດແດ່.

  • ສຸມໃສ່ຕິດຕາມ, ກວດກາຂົງເຂດທີ່ມີຄວາມສ່ຽງເກີດມີພຶດຕິກຳສໍ້ລາດບັງຫຼວງ ເຊັ່ນ: ການເກັບລາຍຮັບພາສີ – ອາກອນ, ການຄຸ້ມຄອງລາຍຮັບ – ລາຍຈ່າຍງົບປະມານ, ການລົງທຶນກໍ່ສ້າງພື້ນຖານໂຄງລ່າງ, ສຳຫຼວດ – ອອກແບບ, ການປະມູນ, ການຈັດຊື້ – ຈັດຈ້າງ, ການຄຸ້ມຄອງ – ນຳໃຊ້ທີ່ດິນ, ປ່າໄມ້, ແຮ່ທາດ; ການດຳເນີນຄະດີ, ການບໍລິການ ແລະ ອື່ນໆ.

 

 

  • ຕິດຕາມ, ກວດກາ ພະນັກງານນຳພາ – ຄຸ້ມຄອງ, ສະມາຊິກພັກ, ພະນັກງານ – ລັດຖະກອນ, ທະຫານ, ຕຳຫຼວດ, ພະນັກງານລັດວິສາຫະກິດ ແລະ ພະນັກງານບ້ານທີ່ມີພຶດຕິກຳສໍ້ລາດບັງຫຼວງ, ຮັ່ງມີຜິດປົກກະຕິ, ມີການລາຍງານ – ຮ້ອງຟ້ອງຈາກສະມາຊິກພັກ, ພະນັກງານ ແລະ ປະຊາຊົນ.

  • ດຳເນີນການແຈ້ງຊັບສິນ ແລະ ລາຍຮັບຂອງພະນັກງານ – ລັດຖະກອນ, ທະຫານ, ຕຳຫຼວດ ຕາມດຳລັດຂອງນາຍົກ ພ້ອມທັງຄຸ້ມຄອງເອກະສານແຈ້ງຊັບສິນ ແລະ ລາຍຮັບນັ້ນໃຫ້ດີ ຖືກຕ້ອງຕາມດຳລັດ ແລະ ລະບຽບການທີ່ກຳນົດໄວ້.

  • ເມື່ອກວດກາພົບເຫັນສະມາຊິກພັກ, ພະນັກງານຈະແມ່ນຢູ່ໃນຖານະຕຳແໜ່ງໃດທີ່ມີພຶດຕິກຳສໍ້ລາດບັງຫຼວງຕ້ອງໄດ້ດຳເນີນການສຶກສາອົບຮົມ, ປະຕິບັດວິໄນ, ສືບສວນ – ສອບສວນຢ່າງທັນການ, ເຂັ້ມງວດເດັດຂາດຕາມກົດໝາຍ.

ທັງໝົດນັ້ນຄືບາງເນື້ອໃນທີ່ຢາກໃຫ້ເພື່ອນຜູ້ອ່ານກຳໄດ້.

 

[ ທິດດີ ]

%d bloggers like this: