ການກໍ່ສ້າງສູນຢັ້ງຢືນມາດຕະຖານອຸປະກອນພິເສດ ຈະໃຫ້ສໍາເລັດພາຍໃນ 6 ເດືອນ

ຄວາມຄືບໜ້າຂອງໂຄງການກໍ່ສ້າງຫ້ອງກວດສອບມາດຕະຖານ ແລະ ຢັ້ງຢືນມາດຕະຖານ ອຸປະກອນພິເສດ ໃນ ສປປ ລາວ ນັ້ນຜູ້ລົງທຶນເປີດເຜີຍຈະເລັ່ງມືກໍ່ສ້າງໃຫ້ສໍາເລັດບໍ່ເກີນ 6 ເດືອນ ໃນເນື້ອທີ່ 2,25 ເຮັກຕາ ແລະ ຈະສຸມໃສ່ກວດກາປະເພດເຄື່ອງໃຊ້ໄຟຟ້າເປັນອັນດັບທໍາອິດ ຄາດວ່າຈະສາມາດບໍລິການໄດ້ 10 ພັນລາຍການຕໍ່ປີ ດ້ວຍມູນຄ່າການລົງທຶນທັງໝົດ 5 ລ້ານໂດລາ.

ທ່ານ ເສິນ ຫົງ ຫ້າຍ ປະທານ ບໍລິສັດ ດີແລ້ວ ຈຳກັດຜູ້ດຽວ ໃຫ້ສໍາພາດວ່າ: ພາຍຫຼັງທີ່ບໍລິສັດ ໄດ້ເຊັນບົດບັນທຶກ ຄວາມເຂົ້າໃຈ ( MOU ) ຮ່ວມກັບສູນຢັ້ງຢືນມາດຕະຖານ ແລະ ກວດກາຄຸນນະພາບແຫ່ງຊາດ, ກົມມາດຕະຖານ ແລະ ວັດແທກ ໃນເດືອນພະຈິກ 2018 ຜ່ານມານັ້ນ ກໍໄດ້ສຸມໃສ່ປະຕິບັດຕາມລະບຽບຫຼັກການທີ່ກ່ຽວຂ້ອງຂອງການລົງທຶນຢູ່ລາວຢ່າງຄົບຖ້ວນສົມບູນ ແລະ ມາເຖິງວັນທີ 28 ມັງກອນ 2019 ກໍໄດ້ມີພິທີເຊັນສັນຍາເລີ່ມລົງມືຈັດຕັ້ງປະຕິບັດຢ່າງເປັນທາງການ. ໃນນີ້, ປະກອບມີໜ້າວຽກຫຼັກ ເຊັ່ນ: ກໍ່ສ້າງຫ້ອງການ, ປະກອບການຕິດຕັ້ງເຄື່ອງຈັກ, ອຸປະກອນໃນຫ້ອງທົດສອບຄົບຊຸດທີ່ໄດ້ຮັບການຮັບຮອງດ້ານລະບົບມາດຕະຖານສາກົນ ISO/IEC 17025 ລວມທັງສົ່ງພະນັກງານວິຊາການທີ່ເປັນຄົນລາວໄປຝຶກອົບຮົມຢູ່ ສປ ຈີນ ເພື່ອມາຮັບໃຊ້ແກ່ວຽກງານດັ່ງກ່າວ ພ້ອມທັງມີຜູ້ຊ່ຽວຊານສະເພາະທີ່ເປັນຄົນຈີນມາປະຈໍາເປັນແຕ່ລະໄລຍະ.

ທ່ານອະທິບາຍວ່າ: ໂຄງການດັ່ງກ່າວມີເນື້ອທີ່ທັງໝົດ 2,25 ເຮັກຕາ ຕັ້ງຢູ່ໃກ້ກັບກົມມາດຕະຖານ ແລະ ວັດແທກ ເຊິ່ງຈະກໍ່ສ້າງໃຫ້ສໍາເລັດບໍ່ເກີນພາຍໃນ 6 ເດືອນ ພ້ອມຕັ້ງເປົ້າຈະເປີດໃຫ້ບໍລິການພາຍໃນປີນີ້ ຫຼັງຈາກທີ່ພະນັກງານວິຊາການສໍາເລັດການຝຶກອົບຮົມມາຈາກ     ສປ ຈີນ ພ້ອມດ້ວຍຊ່ຽວຊານ. ສໍາລັບການກວດສອບມາດຕະຖານ ແລະ ຢັ້ງຢືນມາດຕະຖານອຸປະກອນພິເສດແມ່ນເນັ້ນໃສ່ 6 ປະເພດສິນຄ້າ ເຊັ່ນ: 1). ເຄື່ອງບັນຈຸແຮງດັນ: ຖັງແກ໊ສ ລວມໄປເຖິງຖັງບັນຈຸສານເຄມີ; 2). ໝໍ້ຕົ້ມ: ທີ່ໃຊ້ໃນໂຮງງານອຸດສາຫະກໍາ ຫຼື ໂຮງງານຂະໜາດໃຫຍ່; 3). ທໍ່ສົ່ງແຮງດັນ: ແກ໊ສທໍາມະຊາດ, ໄຮໂຕຣເຈນ, ວັດຖຸໄວໄຟ ແລະ ສານພິດອື່ນໆ; 4). ລິບ: ປະກອບມີລິບຂະໜາດນ້ອຍຈົນໄປເຖິງຂະໜາດໃຫຍ່ຕ່າງໆ; 5). ກົນຈັກໜັກຍົກ ( ເຄນ ): ລົດເຄນນໍ້າໜັກຫຼາຍກວ່າ 500 ກິໂລກຣາມ ແລະ ມີຄວາມສູງ 2 ແມັດຂຶ້ນໄປ; 6). ພາຫະນະທີ່ໃຊ້ສະເພາະປະກອບມີສອງປະເພດຍ່ອຍ ຄື: 1. ພາຫະນະທີ່ໃຊ້ສະເພາະໂຮງງານ, ລົດຟົກລິບ, ລົດໄຟຟ້າໃນສະໜາມບິນ, ເດີ່ນກ໊ອຟ ແລະ ລົດຍູ້ຍົນ, 2. ພາຫະນະທີ່ໃຊ້ເພື່ອການທ່ອງທ່ຽວ ເຊັ່ນ: ລົດໄຟຟ້າຢູ່ສວນສະໜຸກ, ກະຕ່າລອຍຟ້າ, ສະລິງຂົນສົ່ງ ແລະ ອຸປະກອນພິເສດອື່ນໆທີ່ໄດ້ກຳນົດໃນລະບຽບກົດໝາຍ ເຊິ່ງມີໄລຍະດຳເນີນກິດຈະການ 15 ປີ ແລະ ສາມາດຕໍ່ໄດ້ອີກ 15 ປີ.

ທ່ານ ເສິນ ຫົງ ຫ້າຍ ຍັງໃຫ້ເຫດຜົນທີ່ເຂົ້າມາລົງທຶນໃນຂະແໜງການນີ້ ວ່າ: ເນື່ອງຈາກບໍລິສັດພວກເຮົາໄດ້ມີປະສົບການດ້ານນີ້ມາໄດ້ 14 ປີຢູ່ ຈຶ່ງຢາກເປັນສ່ວນໜຶ່ງໃນການກວດສອບອຸປະກອນພິເສດດັ່ງກ່າວໃຫ້ໄດ້ມາດຖານ ສໍາລັບເປົ້າໝາຍພາຍຫຼັງສໍາເລັດການກໍ່ສ້າງ, ຕິດຕັ້ງ ແລະ ຄວາມພ້ອມຂອງບຸກຄະລາກອນ ເຊິ່ງໃນໄລຍະເບື້ອງຕົ້ນແມ່ນຈະສຸມໃສ່ກວດປະເພດເຄື່ອງໄຟຟ້າກ່ອນ ແລ້ວຈຶ່ງທະຍອຍກວດສິນຄ້າປະເພດອື່ນ, ເຖິງແມ່ນວ່າຕະຫຼາດໃນລາວຈະມີສິນຄ້າໜ້ອຍກໍຕາມ ແຕ່ຄາດວ່າເຮົາຈະສາມາດກວດໄດ້ 10 ພັນລາຍການຕໍ່ປີ.

ເມື່ອເວົ້າເຖິງການລົງທຶນທັງໝົດ 5 ລ້ານໂດລານັ້ນ ຄາດວ່າຈະໄດ້ທຶນຄືນຢູ່ໃນໄລຍະປີທີ 8 ຫາປີທີ 11 ເຊິ່ງຖືວ່າເປັນການລົງທຶນທີ່ສ້າງຄວາມໝັ້ນຄົງໃນອະນາຄົດ ເພື່ອການຕອບສະໜອງໃຫ້ກັບສັງຄົມໃນການກວດກາບັນດາເຄື່ອງມືອຸປະກອນພິເສດທີ່ຜູ້ນໍາເຂົ້າ – ສົ່ງອອກ ແລະ ຈັດຈຳໜ່າຍຢູ່ ສປປ ລາວ ທັງເປັນການສ້າງຄວາມໝັ້ນໃຈ, ຮັບປະກັນ ຄວາມປອດໄພ, ຮັບປະກັນຄຸນນະພາບຂອງຜະລິດຕະພັນ ແລະ ສ້າງຄວາມຍຸຕິທຳໃຫ້ແກ່ຜູ້ຊົມໃຊ້ຖືກຕ້ອງຕາມມາດຕະຖານແຫ່ງຊາດ ແລະ ມາດຕະຖານສາກົນ, “ ທ່ານກ່າວ ”.

ຂ່າວ: ສົມສະຫວິນ

%d bloggers like this: