ຄາດມີ 4 ພັນຄົນຮ່ວມແຂ່ງແລ່ນວຽງຈັນ ຮາຟມາຣາທອນນານາຊາດ ຄັ້ງທີ 4

ສະຫະພັນແລ່ນ – ລານແຫ່ງຊາດລາວ ຮ່ວມກັບ ວິສາຫະກິດສ່ວນບຸກຄົນ ອີເວັ້ນຟໍກູດ ( Events For Good ) ກຽມຈັດການແຂ່ງຂັນແລ່ນວຽງຈັນ ຮາຟມາຣາທອນນາໆຊາດ ຄັ້ງທີ 4 ປະຈຳປີ 2019 ( 4th VientianeInternational Half Marathon 2019 ) ຂຶ້ນ ໃນວັນອາທິດທີ 3 ມີນາ 2019 ຄາດມີຜູ້ເຂົ້າຮ່ວມ 4 ພັນຄົນ.

ພິທີຖະແຫຼງຂ່າວຈັດແຂ່ງຂັນຂຶ້ນເມື່ອວັນທີ 14 ກຸມພາ 2019 ທີ່ໂຮງແຮມເລີ ທາດຫຼວງ ດໍບູຕິກ ( Le Thatluang D’or Boutique Hotel ) ໃຫ້ກຽດເຂົ້າຮ່ວມໂດຍ ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ກະຊວງສຶກສາທິການ ແລະ ກີລາ, ທ່ານ ຈັນດີ ພົມມະບຸດ ປະທານສະຫະພັນແລ່ນ – ລານແຫ່ງຊາດລາວ ພ້ອມດ້ວຍຕາງໜ້າຈາກຜູ້ສະໜັບສະໜູນຕ່າງໆ ແລະ ນັກກີລາເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ ທ່ານ ສິດທິໄຊ ສັກປະເສີດ ເລຂາທິການສະຫະພັນແລ່ນ – ລານແຫ່ງຊາດລາວ ກ່າວລາຍງານວ່າ: ສະຫະພັນແລ່ນ – ລານ ຮ່ວມກັບ ອີເວັ້ນຟໍກູດ ກຽມຈັດການແຂ່ງຂັນແລ່ນວຽງຈັນ ຮາຟມາຣາທອນນາໆຊາດ ປະຈໍາປີ 2019 ເຊິ່ງຈັດຂຶ້ນເປັນຄັ້ງທີ 4 ສືບເນື່ອງຈາກຜົນສຳເລັດການແຂ່ງຂັນ 3 ປີ ທີ່ຜ່ານມາ ເຊິ່ງມີຈຳນວນນັກແລ່ນທັງພາຍໃນ ແລະ ຕ່າງປະເທດເຂົ້າຮ່ວມເພີ່ມຂຶ້ນໃນແຕ່ລະປີ ເພື່ອເປັນການສົ່ງເສີມການອອກກຳລັງກາຍເພື່ອສຸຂະພາບ ແລະ ມິດຕະພາບລະຫວ່າງນັກແລ່ນດ້ວຍກັນ. ພ້ອມກັນນັ້ນ, ກໍເພື່ອເຮັດໃຫ້ນະຄອນຫຼວງວຽງຈັນ ກາຍເປັນນະຄອນຫຼວງທີ່ມີການຈັດການແຂ່ງຂັນກີລາມວນຊົນລະດັບນານາຊາດ. ນອກນັ້ນ, ຍັງເປັນການສົ່ງເສີມການທ່ອງທ່ຽວລາວ ໃຫ້ມີຄວາມຄຶກຄື້ນໃນປີທ່ອງທ່ຽວ ລາວ – ຈີນ 2019.

ຂະນະດຽວກັນ ທ່ານ ຈັນດີ ພົມມະບຸດ ປະທານສະຫະພັນແລ່ນ – ລານ ແຫ່ງຊາດລາວ ກ່າວວ່າ: ຈາກການຈັດ 3 ຄັ້ງທີ່ຜ່ານມາເຫັນວ່າມີນັກກີລາເຂົ້າຮ່ວມນັບມື້ເພີ່ມຂຶ້ນ ເຊິ່ງສະແດງອອກຄັ້ງທີ 1 ມີຈໍານວນນັກກີລາ 1.600 ຄົນ, ຄັ້ງທີ 2 ມີ 2.200 ຄົນ ແລະ ຄັ້ງທີ 3 ມີ 2.700 ຄົນ ແນ່ນອນໃນປີນີ້ພວກເຮົາຄາດວ່າຈະມີຜູ້ເຂົ້າຮ່ວມ 4.000 ຄົນ ເພື່ອການສົ່ງເສີມການອອກກໍາລັງກາຍ ພ້ອມທັງເປັນການສະຫຼອງປີທ່ອງທ່ຽວ ລາວ – ຈີນ ອີກດ້ວຍ.
ສໍາລັບປະເພດການແລ່ນແບ່ງອອກເປັນ 3 ປະເພດ ຄື: ຮາຟມາຣາທອນ 21 ກິໂລແມັດ, 10 ກິໂລແມັດ ແລະ ແລ່ນ – ຍ່າງ ເພື່ອສຸຂະພາບ 5 ກິໂລແມັດ ໂດຍອັນດັບທີ 1 ເຖິງອັນດັບທີ 5 ທັງເພດຍິງ ແລະ ຊາຍຂອງປະເພດ 21 ກິໂລແມັດ ແລະ ປະເພດ 10 ກິໂລແມັດ ໃນຮຸ່ນທົ່ວໄປ ແລະ ກຸ່ມຜູ້ມີອາຍຸມີເງິນລາງວັນ ແລະ ຂັນລາງວັນ ສາມາດລົງທະບຽນໄດ້ແຕ່ມື້ນີ້ເປັນຕົ້ນໄປຜ່ານເວັບໄຊ www.gotorace.com/event/Vientiane – halfmarathon – 2019.

ສ່ວນຈຸດປ່ອຍ ແລະ ເສັ້ນໄຊແມ່ນບໍລິເວນປະຕູໂຂງເດີ່ນທາດຫຼວງ ແຂ່ງຂັນມື້ດຽວທີ 3 ມີນາ 2019 ໃນການແຂ່ງຂັນແລ່ນໃນຄັ້ງນີ້ແມ່ນມີນໍ້າດື່ມກາຫົວເສືອເປັນຜູ້ສະໜັບສະໜູນຫຼັກເປັນປີທີ 4. ນອກນັ້ນ, ຍັງມີ ບໍລິສັດ ປະກັນໄພຊີວິດ ພຣູເດັນໂຊ, ບໍລິສັດ ໂຕໂຍຕ້າລາວທານີ, ໂຮງແຮມ Le ThatluangD’or Boutique hotel, ໂຮງແຮມ Crown Plaza ແລະ ບັນດາ Supporters ເຊັ່ນອົງການສະຫະປະຊາຊາດ UNFPA, Laos simply Beautiful ແລະ ອື່ນໆອີກ.

ຂ່າວ: ຄໍາສອນ, ຮູບ: ສອນໄຊ

%d bloggers like this: