ທຸລະກິດອິນເຕີເນັດໂລກ ແບ່ງອອກເປັນສອງຂົ້ວ

ແຜນຍຸດທະສາດ ເມດ ອິນ ໄຊນາ 2025 ຫຼື Made in China 2025 ຂອງລັດຖະບານແຫ່ງ ສປ ຈີນ ໃນການປະຕິຮູບເສດຖະກິດ ແລະ ອຸດສາຫະກໍາຂອງປະເທດ ໂດຍເນັ້ນໜັກໄປທີ່ການໃຊ້ເຕັກໂນໂລຊີຊັ້ນສູງໃນການຜະລິດ ຄືສາເຫດສໍາຄັນທີ່ເຮັດໃຫ້ ອາເມຣິກາ ພາຍໃຕ້ການບໍລິຫານປະເທດຂອງ ທ່ານ ໂດນັນ ທຣໍາ ປະທານາທິບໍດີ ກັງວົນເຖິງຄວາມກ້າວໜ້າດ້ານເຕັກໂນໂລຊີຂອງ ຈີນ ຈໍາຕ້ອງເປີດເສິກການຄ້າດ້ວຍການຂຶ້ນພາສີສິນຄ້ານໍາເຂົ້າຈາກຈີນ ເຊິ່ງໄດ້ສ້າງຄວາມສັ່ນສະເທືອນໃນວົງການການຄ້າໂລກຈົນໝູນກັບໄປຍັງຈຸດເກົ່າ ຄືຖອຍຫ່າງຈາກໂລກາພິວັດແລ້ວກັບໄປສູ່ການສະກັດກັ້ນທາງທຸລະກິດ ເຊັ່ນ: ກໍລະນີຫົວເຫວີຍ ບໍລິສັດລາຍໃຫຍ່ດ້ານໂທລະຄົມມະນາຄົມຂອງຈີນ ທີ່ກໍາລັງຖືກຫຼິ້ນງານຢູ່ໃນຂະນະນີ້.

ຫາກສະຫຼຸບແບບຫຍໍ້ໆຂອງແຜນ ເມດ ອິນ ໄຊນາ 2025 ກໍຄືແຜນແມ່ບົດຂອງລັດຖະບານຈີນ ທີ່ມີຈຸດປະສົງຈະເປັນເຈົ້າແຫ່ງເຕັກໂນໂລຊີຂອງໂລກໃນຫຼາຍດ້ານ ດ້ວຍເຫດນັ້ນຈະເຫັນວ່າ ອາເມຣິກາ ຈຶ່ງດໍາເນີນການຫຼາຍຢ່າງເພື່ອສະກັດກັ້ນ ຈີນ ທັງທາງກົງ ແລະ ທາງອ້ອມ ຜ່ານປະເທດພັນທະມິດ ເຊັ່ນ: ອົດສະຕຣາລີ, ຍີ່ປຸ່ນ ບໍ່ຍອມໃຫ້ ບໍລິສັດ ຫົວເຫວີຍ ຂອງຈີນ ເຂົ້າຮ່ວມໂຄງການພື້ນຖານໂຄງລ່າງເຄືອຂ່າຍໂທລະສັບມືຖື 5 ຈີ.
ຄວາມເຄັ່ງຕຶງທາງການຄ້າຂອງປະເທດມະຫາອໍານາດທັງສອງ ບໍ່ພຽງສັ່ນສະເທືອນໂສມໜ້າໂລກແຫ່ງການຄ້າໂດຍລວມ ແຕ່ຍັງສັ່ນສະເທືອນໄປເຖິງໂສມໜ້າຂອງອິນເຕີເນັດໂລກນໍາອີກ.

ຜູ້ຊ່ຽວຊານ ແລະ ຜູ້ເຝົ້າສັງເກດການ ເລີ່ມມີການໂຕ້ຖຽງກັນເຖິງທ່າອ່ຽງໃນອະນາຄົດຂອງອິນເຕີເນັດໂລກວ່າຈະເປັນແນວໃດ? ຫຼ້າສຸດ, ເລື່ອງນີ້ມີການຍົກຂຶ້ນ ຫຼື ກ່າວເຖິງໃນກອງປະຊຸມສະພາທຸລະກິດລະດັບໂລກ ເວິນ ອີໂຄໂນມິກ ຟໍຣໍາ ທີ່ເມືອງດາວອສ ປະເທດສະວິດ ເມື່ອບໍ່ດົນມານີ້.
ທ່ານ ໄຄຟູ ລີ ປະທານບໍລິຫານຂອງ ໄຊໂນເວຊັນ ເວນເຈີ ຄາດຄະເນວ່າ: ໃນ 5 ປີຕໍ່ໜ້າ ໂລກຈະພົບກັບປາກົດການອິນເຕີເນັດແຍກເປັນ 2 ຂົ້ວ ໂດຍຂົ້ວໜຶ່ງນໍາໂດຍ ອາເມຣິກາ ແລະ ອີກຂົ້ວໜຶ່ງນໍາໂດຍ ຈີນ.

ໂດຍເປັນໄປໄດ້ໃນອະນາຄົດຈະໄດ້ເຫັນແອັບພລິເຄຊັນ ແລະ ບໍລິການຕ່າງໆຂອງທັງ ຈີນ ແລະ ອາເມຣິກາ ຄອບຄອງອິນເຕີເນັດໂລກຝ່າຍລະເຄິ່ງ.
ເມື່ອອິນເຕີເນັດແບ່ງອອກເປັນ 2 ຂົ້ວແບບນີ້ ປະເທດຕ່າງໆທີ່ເຫຼືອກໍຈະເລືອກໃຊ້ບໍລິການອິນເຕີເນັດໄປຕາມຂົ້ວໃຜຂົ້ວລາວ ເຊັ່ນ: ອິນເດຍ, ອາຊຽນ, ອາເມຣິກາລາຕິນ, ຕາເວັນອອກກາງ ແລະ ອາຟຣິກກາ ມີທ່າອ່ຽງຈະເລືອກໃຊ້ບໍລິການແອັບພລິເຄຊັນຂອງ ຈີນ; ສ່ວນ ອາເມຣິກາເໜືອ, ເອີຣົບ ແລະ ປະເທດທີ່ເວົ້າພາສາອັງກິດ ກໍຈະໃຊ້ແອັບພລິເຄຊັນຂອງ ອາເມຣິກາ.

ບໍລິສັດໃຫຍ່ໆຂອງຈີນ ບໍ່ວ່າຈະເປັນ ອາລີບາບາ, ເທນເຊັນ ພາກັນເລັ່ງຂະຫຍາຍການບໍລິການໄປຕ່າງປະເທດ ທັງການເຂົ້າຊື້ທຸລະກິດ ຫຼື ຮ່ວມລົງທຶນໃນບໍລິສັດທົ່ວອາຊີ ເຊັ່ນ: ອາລີບາບາ ເຂົ້າຖືຫຸ້ນໃຫຍ່ໃນບໍລິສັດ ອີຄອມເມິດ, ລາຊາດາໃນໄທ ແລະ ເທນເຊນ ລົງທຶນແອັບພລິເຄຊັນ ໂກ – ເຈັກ ໃນອິນໂດເນເຊຍ ທີ່ໃຫ້ບໍລິການຄ້າຍຄືກັນນັບຕັ້ງແຕ່ບໍລິການຮຽກລົດ, ຮັບສົ່ງເຄື່ອງ, ສົ່ງອາຫານ, ຮັບຈອງປີ້ ແລະ ອື່ນອີກຫຼາຍຢ່າງ.
ຢ່າງໃດກໍຕາມ, ບໍ່ພຽງແຕ່ ໄຄຟູ ລີ ເທົ່ານັ້ນທີ່ຄາດຄະເນເຖິງປາກົດການໂລກອິນເຕີເນັດທີ່ແຍກເປັນສາຍອາເມຣິກາ ແລະ ສາຍຈີນ ແຕ່ມີອີກຫຼາຍຄົນ ເຊັ່ນ: ເອຣິກ ສະມິດ ອະດີດປະທານບໍລິຫານຂອງ ກູເກິລ ກໍເຄີຍຄາດຄະເນໄວ້ແບບດຽວກັນ ຄື: ໂລກອິນເຕີເນັດໃນອະນາຄົດຈະມີ ຈີນ ກັບ ອາເມຣິກາ ເປັນຜູ້ນໍາ.

ຈີນ ແລະ ອາເມຣິກາ ບໍ່ໄດ້ແຂ່ງກັນພຽງແຕ່ເລື່ອງອິນເຕີເນັດເທົ່ານັ້ນ ແຕ່ຍັງແຂ່ງກັນທຸກດ້ານກ່ຽວກັບເຕັກໂນໂລຊີຕະຫຼອດຮອດປັນຍາປະດິດ ຫຼື ເອໄອ ເຊິ່ງຖືເປັນເຕັກໂນໂລຊີສໍາຄັນຫຼາຍໃນການສະໜັບສະໜູນອຸດສາຫະກໍາ ແລະ ການກໍານົດໂສມໜ້າຂອງອິນເຕີເນັດໃນອະນາຄົດ ໂດຍຜູ້ຊ່ຽວຊານຫຼາຍຄົນເຫັນວ່າ ອາເມຣິກາ ອາດຈະຕາມຫຼັງ ຫຼື ນໍາບໍ່ທັນ ຈີນ ໃນເລື່ອງ ເອໄອ.

%d bloggers like this: