ສິງກະໂປ ຮຽກຮ້ອງ ມາເລເຊຍ ເຊົາແລ່ນເຮືອຜ່ານນ່ານນໍ້າ

ລັດຖະບານສິງກະໂປ ເນັ້ນຢໍ້າຂໍ້ຮຽກຮ້ອງໃຫ້ ມາເລເຊຍ ຢຸດເຊົາແລ່ນເຮືອຜ່ານນ່ານນໍ້າບໍລິເວນນອກແຄມຝັ່ງທະເລ ເມືອງຕູອັດ ຫຼັງເກີດເຫດເຮືອສິນຄ້າຂອງ ເກຣັກ ຕໍາກັບເຮືອເຈົ້າໜ້າທີ່ ມາເລເຊຍ.

ຫຼັງເກີດເຫດເຮືອບັນທຸກສິນຄ້າ ຫຼື ເອັມວີພີ ພິເຣອັດ ຂອງ ເກຣັກ ຕໍາກັບເຮືອຍາມຝັ່ງຂອງທາງການ ມາເລເຊຍ ເມື່ອທ້າຍອາທິດທີ່ຜ່ານມາ ສິງກະໂປ ໄດ້ອອກຖະແຫຼງການເນັ້ນຢໍ້າຂໍ້ຮຽກຮ້ອງໃຫ້ ມາເລເຊຍ ຢຸດເຊົາແລ່ນເຮືອນອກແຄມຝັ່ງທະເລ ເມືອງຕູອັດ ທີ່ສິງກະໂປ ອ້າງເປັນເຂດອະທິປະໄຕຂອງຕົນເອງ.

ໂດຍຖະແຫຼງການຂອງກະຊວງຕ່າງປະເທດ ສິງກະໂປ ລະບຸວ່າ: ການປາກົດຂຶ້ນຢ່າງຕໍ່ເນື່ອງຂອງເຮືອ ມາເລເຊຍ ເປັນໄພຄຸກຄາມຄວາມປອດໄພຂອງການແລ່ນເຮືອໃນບໍລິເວນນີ້ ແລະ ມາເລເຊຍ ຈະຕ້ອງຮັບຜິດຊອບຕໍ່ສະຖານະການທີ່ບໍ່ເປັນຜົນດີທີ່ເກີດຂຶ້ນຈາກການທີ່ຍັງນໍາເຮືອເຂົ້າໄປໃນເຂດນ່ານນໍ້າແຫ່ງນີ້ໂດຍຖືເບົາ.

ດ້ານກະຊວງການຕ່າງປະເທດ ມາເລເຊຍ ອອກຖະແຫຼງການເຊັ່ນວ່າ: ມີນະໂຍບາຍຈະແຈ້ງມາຕະຫຼອດໃນການປົກປ້ອງອະທິປະໄຕຂອງຕົນເອງ ລວມເຖິງຜົນປະໂຫຍດຂອງປະເທດໃນການແລ່ນເຮືອບໍລິເວນນີ້ ແລະ ຢືນຢັນວ່າເຮືອທັງສອງລໍາໄດ້ສື່ສານກັນເລື່ອງການຫຼົບຫຼີກແລ້ວກ່ອນເກີດເຫດ.
ໂດຍຄົນຂັບເຮືອຂອງ ເກຣັກ ບອກວ່າຈະຖອຍໃຫ້ກ່ອນ, ແຕ່ກໍເກີດເລື່ອງຂຶ້ນຈົນໄດ້ ແລະ ມາເລເຊຍ ຈໍາເປັນຕ້ອງຈັບຕົວຄົນໃນເຮືອ ແລະ ຢຶດເຮືອຂອງ ເກຣັກ ໄວ້ກ່ອນເພື່ອການສືບສວນ.

%d bloggers like this: