ອີຊູຊຸ ລາວ ບໍລິການ ແຈກໂຊກ 100 ລາງວັນໃຫ້ລູກຄ້າ

ໃນວັນທີ 9 ກຸມພາ 2019 ບໍລິສັດ ອີຊູຊຸ ລາວ ບໍລິການ ຈໍາກັດຜູ້ດຽວ ໄດ້ຈັດກິດຈະກໍາ ອີຊູຊຸ ລາວ ບໍລິການ ແຈກໂຊກ 100 ລາງວັນໃຫ້ລູກຄ້າ ຂຶ້ນທີ່ຫ້ອງຂາຍລົດ ອີຊູຊຸ ລາວ ບໍລິການ ບ້ານນາເລົ່າ ເມືອງສີໂຄດຕະບອງ ນະຄອນຫຼວງວຽງຈັນ.

■ ໂອກາດດັ່ງກ່າວ ທ່ານ ວິຣະໄຊຄໍາ    ພິລາພັນເດຊ ປະທານ ບໍລິສັດ ອີຊູຊຸ ລາວ ບໍລິການ ຈໍາກັດຜູ້ດຽວ ໄດ້ກ່າວວ່າ: ຈຸດປະສົງຂອງການຈັດງານກໍເພື່ອຕອບແທນລູກຄ້າທີ່ໄດ້ມາຊື້ລົດ ແລະ ໃຊ້ບໍລິການນໍາ ບໍລິສັດ ອີຊູຊຸ ລາວ ບໍລິການ ຈໍາກັດຜູ້ດຽວ ໃນໄລຍະຫຼາຍໆປີຜ່ານມາ. ການຈັດງານຄັ້ງນີ້ເປັນຄັ້ງທີ 6 ເຊິ່ງໃນແຕ່ລະປີຈະຈັດໃນໄລຍະເດືອນກຸມພາ ພາຍໃຕ້ຄໍາຂວັນເດີມກໍຄື ອີຊູຊຸ ລາວ ບໍລິການ ແຈກໂຊກ 100 ລາງວັນ.

 

■ ທ່ານກ່າວຕື່ມວ່າ: ໃນການຈັດງານຕົວຈິງພວກເຮົາໄດ້ແຈກໂຊກໃຫ້ລູກຄ້າຜູ້ເຂົ້າຮ່ວມນັ້ນຖ້າລວມແລ້ວກໍຫຼາຍກວ່າ 100 ລາງວັນ ເປັນຕົ້ນແມ່ນໃນງານຄັ້ງນີ້ ຖ້າລູກຄ້າມາລົງທະບຽນກ່ອນໝູ່ 100 ຄົນທໍາອິດ ຈະໄດ້ຮັບບັດຊີງໂຊກ ເພື່ອເຂົ້າມາປ່ຽນນໍ້າມັນເຄື່ອງບໍ່ເສຍຄ່າ 1 ຄັ້ງ. ພ້ອມນັ້ນ, ຈະມີລາງວັນເລກໄມຂອງລົດລຸ້ນດີແມັກ, ມິວເອັກ ແລະ ລົດບັນທຸກ ອີຊູຊຸ ເຊິ່ງຈະກໍານົດເອົາເລກໄມ ສູງສຸດ ແລະ ຍັງມີລາງວັນ ອີຊູຊຸ ອິນໄຊສ ເປັນລະບົບຄອມພິວເຕີວິເຄາະອອກມາວ່າການຂັບລົດປະພຶດແນວໃດ ເປັນຕົ້ນແມ່ນ ເບຣກກະທັນຫັນ ຫຼື ບໍ່, ການອອກຕົວລົດແນວໃດ? ແລະ ຜົນຂອງຄ່າວັດຕ່າງໆ ເຊິ່ງລະບົບຄອມພິວເຕີຈະເປັນຜູ້ລາຍງານລົດຂອງລູກຄ້າມາຍັງຫ້ອງຂາຍ ພະນັກງານເຮົາຈະເລືອກເອົາຜົນຄະແນນດີທີ່ສຸດ.

■ ສ່ວນພິເສດສຸດໃນປີນີ້ ຖ້າຈອງລົດໃນງານຄັ້ງນີ້ຈະໄດ້ລຸ້ນໂຊກຮັບຄໍາ 3 ລາງວັນ ຄື: ລາງວັນທີ 1 ຄໍາ 2 ບາດ; ລາງວັນທີ 2 ຄໍາ 1 ບາດ ແລະ ລາງວັນທີ 3 ຄໍາ 2 ສະຫຼຶງ. ນອກຈາກມອບໂຊກໃຫ້ລູກຄ້າແລ້ວ ບໍລິສັດ ອີຊູຊຸ ລາວ ບໍລິການ ຍັງມີກິດຈະກໍາຊ່ວຍເຫຼືອສັງຄົມ ເຊິ່ງໃນງານເຮົາກໍມີການນໍາສະເໜີປະຫວັດຂອງແຄນລາວ, ມີການລໍາປະສົມປະສານສຽງແຄນລາວໃຫ້ລູກຄ້າໄດ້ຮັບຊົມ ເນື່ອງຈາກໃນປີ 2018 ສຽງແຄນລາວເຮົາກໍໄດ້ຮັບຂຶ້ນເປັນມໍລະດົກໂລກ. ນອກຈາກນັ້ນ, ກໍໄດ້ຈັດກິດຈະກໍາແຂ່ງເຕັ້ນຂອງນ້ອງນັກຮຽນປະຖົມ ຊີງທຶນການສຶກສາສູງສຸດ 2 ລ້ານກີບ.

■ ສ່ວນໃນປີ 2019 ກິດຈະກໍາຂອງພວກເຮົາຈະເປີດກ່ອງບໍລິຈາກທີ່ເຮົາໄດ້ຮ່ວມກັບອົງການກາແດງລາວ ໃນການເປີດຕູ້ບໍລິຈາກ ເຊິ່ງຄາດວ່າໃນເດືອນມິຖຸນາທີ່ຈະມາເຖິງ ຈະໄດ້ເປີດຕູ້ວ່າໄດ້ມູນຄ່າເທົ່າໃດ ແລະ ຈະນໍາໄປຊ່ວຍເຫຼືອເດັກນ້ອຍ ຫຼື ໂຮງຮຽນໃນເຂດໃດ. ສ່ວນກິດຈະກໍາອື່ນອີກແມ່ນວັນເດັກນ້ອຍສາກົນ ເຊິ່ງເຮົາຈະໄດ້ຈັດຢູ່ຫໍພິພິທະພັນກອງທັບ ຄືໃນປີຜ່ານມາ.

■ ພາຍໃນງານ ບໍລິສັດ ອີຊູຊຸ ລາວ ບໍລິການ ຈໍາກັດຜູ້ດຽວ ໄດ້ມອບລາງວັນພິເສດ ຄືລາງວັນໃຫ້ຜູ້ໃຊ້ອີຊູຊຸ ແລ້ວບອກຕໍ່ໝູ່ເພື່ອມາຊື້ລົດ, ມອບລາງວັນເລກໄມສູງສຸດມີ 3 ລຸ້ນ 3 ລາງວັນ ໄດ້ແກ່: 1. All New Isuzu D – max ທ່ານ ອິນແປງ ແກ້ວແກ່ນຈັນ ເລກໄມລົດແມ່ນ 169.765 km; 2. Isuzu Mu – x ທ່ານ ທອງພັນ ເພັດລໍາພັນ ເລກໄມລົດ 75.611 km ແລະ 3. ລົດບັນທຸກອີຊູຊຸ ແມ່ນບໍລິສັດ ສະແຕນເລ້ ເລກໄມລົດແມ່ນ 215.143 km. ສ່ວນລາງວັນ Isuzu Insight ທ່ານ ນາງ ວຽງຄໍາ ພຽນນຸວົງ ນໍາໃຊ້ລົດ Isuzu Mu – x ແລະ ຈັບລາງວັນລູກຄ້າທີ່ຊື້ລົດບັນທຸກ ປີ 2018 ລຸ້ນຮັບສາຍຄໍຄໍາ 1 ບາດ 5 ລາງວັນ.

■ ພ້ອມນັ້ນ, ຍັງໄດ້ຈົກສະຫຼາກຜູ້ໂຊກດີ 100 ລາງວັນ ຄື: ລາງວັນທີ 1 ເຄື່ອງຊັກຜ້າ 1 ລາງວັນ; ລາງວັນທີ 2  ໂທລະພາບສີ 32 ນິ້ວ 1 ລາງວັນ; ລາງວັນທີ 3 ຕູ້ເຢັນ 2 ລາງວັນ; ລາງວັນທີ 4 ພັດລົມ 6 ລາງວັນ; ລາງວັນທີ 5 ກະຕິກນໍ້າຮ້ອນ 6 ລາງວັນ; ລາງວັນທີ 6 ໝໍ້ແດງໄຟຟ້າ 6 ລາງວັນ; ລາງວັນທີ 7 ເຄື່ອງປັ່ນໝາກໄມ້ 20 ລາງວັນ; ລາງວັນທີ 8 ໝໍ້ຫູງເຂົ້າ 29 ລາງວັນ ແລະ ລາງວັນທີ 9 ແມ່ນລໍາໂພງ ບລູທູດ 29 ລາງວັນ.

%d bloggers like this: