ປີໂຕຣລ້ຽມໃຈດີລົງທຶນຕື້ກວ່າກີບສ້າງຂົວອູ່ໃຫ້ສອງບ້ານໃນເມືອງນ້ຳບາກ

ແນໃສ່ອຳນວຍຄວາມສະດວກແກ່ການສັນຈອນໄປມາລະຫວ່າງປະຊາຊົນບ້ານຟ້າ ແລະບ້ານໂຄ້ງເມືອງນ້ຳບາກ ແຂວງຫຼວງພະບາງບໍລິສັດປີໂຕຣລ່ຽມເທຣດດີ່ງ ລາວມະຫາຊົນ ໃນກຸ່ມບໍລິສັດພົງສະຫວັນໄດ້ໃຫ້ທຶນສະໜັບສະໜູນມູນຄ່າຕື້ກວ່າກີບສ້າງຂົວອູ່ໃຫ້ຊາວບ້ານໄດ້ຍ່າງ ແລະຂີ່ລົດຖີບລົດຈັກໄດ້ແລ່ນຜ່ານ.

 

ພິທີມອບ-ຮັບ ແລະເປີດການນຳໃຊ້ ຂົວອູ່ຂ້າມນ້ຳບາກ ລະຫວ່າງ ບ້ານຟ້າ ແລະບ້ານໂຄ້ງເມືອງນ້ຳບາກ ໄດ້ຈັດຂື້ນໃນວັນທີ 9 ກຸມພານີ້ ທີ່ສົ້ນຂົວບ້ານໂຄ້ງ ໂດຍມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍການນຳຂອງແຂວງຫຼວງພະບາງ, ຕາງໜ້າກູ່ມບໍລິສັພົງສະຫວັນ ແລະບໍລິສັດຮັບເໝົາກໍ່ສ້າງ, ອົງການປົກຄອງເມືອງ ຕະຫຼອດຮອດປະຊາຊົນທັງ 2 ບ້ານເຂົ້າຮ່ວມ.

 

 

ພິທີ ທ່ານ ສົມພອນ ສີອຸດົມພັນ ເຈົ້າເມືອງນ້ຳບາກ ໄດ້ມີຄຳເຫັນສະແດງຄວາມຂອບໃຈເປັນຢ່າງສູງ ທີ່ໄດ້ຮັບຂອງຂັວນອັນລ້ຳຄ່າຈາກພັກ-ລັດຖະບານ ໂດຍສະເພາະແມ່ນ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ກໍ່ຄືກຸ່ມບໍລິສັດພົງສະຫວັນ ທີ່ໄດ້ມອບທືນຮອນເຂົ້າໃນການກໍ່ສ້າງຂົວອູ່ຂ້າມນ້ຳບາກ ເຮັດໃຫ້ ການໄປມາຂອງປະຊາຊົນເມືອງນ້ຳບາກ ໂດຍສະເພາະປະຊາຊົນບ້ານໂຄ້ງ ແລະບ້ານຟ້າ ໄດ້ໄປມາຫາສູ່ກັນສະດວກຫຼາຍຂື້ນ ສ້າງເງື່ອນໄຂໃຫ້ແດ່ການພັດທະນາຄອບຄົວ ແລະບ້ານໃນອະນາຄົດ.

 

ໂອກາດນີ້ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທ່ານຄຳຂັນຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍຕາງໜ້າກຸ່ມບໍລິສັດໃຫ້ທືນ ໄດ້ຮ່ວມກັນຕັດແຖບຜ້າ ແລະປ່ອຍປຸມເປົ້າ ເພື່ອມອບຮັບ ແລະເປີດການນຳໃຊ້ ຢ່າງເປັນທາງການ. ຂົວອູ່ຂ້າມນ້ຳບາກ ລະຫວ່າງບ້ານຟ້າ ຫາບ້ານໂຄ້ງ ເມືອງນ້ຳບາກ ເລີ້ມສ້າງຂື້ນໃນເດືອນເມສາປີ 2018 ຜ່ານມາ ສອງສົ້ນຕັ້ງດ້ວຍເສົາເບຕົ່ງເສີມເຫຼັກ ມີສາຍກາບຂະໜາດໃຫຍ່ຈ່ອງດືງ, ໂຕຂົວເປັນໂຄງເຫຼັກ ຂະໜາດກວ້າງ 2 ແມັດ, ຍາວ 125 ແມັດ ໂດຍອຳນວຍຄວາມສະດວກໃຫ້ແກ່ການສັນຈອນສະເພາະຄົນຍ່າງ, ລົດຖີບ ແລະລົດຈັກ.

ທືນກໍ່ສ້າງເບື້ອງຕົ້ນ 1 ຕື້ 259 ລ້ານກວ່າກີບ ແຕ່ເນື່ອງຈາກໂຄງລ້າງໄດ້ຮັບຜົນກະທົບຈາກລະດູຝົນຜ່ານມາ ແລະມີໜ້າວຽກເພີ້ມ ຈື່ງໄດ້ເພີ່ມມູນຄ່າການກໍ່ສ້າງເປັນ 1 ຕື້ 800 ລ້ານກ່ວາກີບ ເຊີ່ງເປັນທືນສະໜັບສະໜູນຈາກ ບໍລິສັດປີໂຕຣລ່ຽມເທຣດດີ່ງ ລາວມະກາຊົນ ໃນກຸ່ມບໍລິສັດພົງສະຫວັນ ແລະຮັບເໝົາກໍ່ສ້າງໂດຍບໍລິສັດ ລືໄຊ ໄຊຊະນະ.

ຂ່າວ: ອາພຸດເດດ ບຸບຜາ

%d bloggers like this: