ແຂວງໄຊຍະບູລີ ເລີ່ມລົງມືສ້ອມແປງເສັ້ນທາງ2 ເສັ້ນຍາວເກືອບ 70 ກິໂລແມັດ

ໃນຕອນບ່າຍຂອງວັນທີ 8 ມັງກອນ 2019 ນີ້ ທີ່ສະໂມສອນພະແນກໂຍທາທິການ ແລະ ຂົນສົ່ງ ແຂວງໄຊຍະບູລີ ໄດ້ຈັດພິທີເຊັນສັນຍາໂຄງການສ້ອມແປງທາງ 2 ເສັ້ນ ຢູ່ແຂວງໄຊຍະບູລີ, ເປັນກຽດເຂົ້າຮ່ວມມີ ທ່ານ ເພັງນິລັນ ຄໍາພັນເພັງ ຮອງເຈົ້າແຂວງໆໄຊຍະບູລີ, ມີ ທ່ານ ແພງຊ້ອຍ ແພງເມືອງ ຫົວໜ້າພະແນກໂຍທາທິການ ແລະ ຂົນສົ່ງແຂວງ, ມີບັນດາຄະນະກໍາມະການປະມູນ, ມີຫົວໜ້າພະແນກການທີ່ກ່ຽວຂ້ອງ, ມີຕາງໜ້າອໍານາດການປົກຄອງ 4 ເມືອງ ຄື: ເມືອງໄຊຍະບູລີ, ເມືອງພຽງ, ເມືອງປາກລາຍ, ເມືອງແກ່ນທ້າວ ແລະ ບໍລິສັດທີ່ຊະນະການປະມູນເຂົ້າຮ່ວມຢ່າງພ້ອມພຽງ.

ໂຄງການສ້ອມແປງເສັ້ນທາງໄລຍະ 2 ຂອງແຂວງໄຊຍະບູລີ ໄດ້ແບ່ງອອກເປັນ 2 ເສັ້ນ ເພື່ອສ້ອມແປງ ຄື: ເສັ້ນທີ 1 ເລີ່ມຈາກບ້ານຕາກແດດ ເມືອງປາກລາຍ ຫາ ບ້ານດອນເມນ ເມືອງແກ່ນທ້າວ ມີຄວາມຍາວ 32 ກິໂລແມັດ, ມີມູນຄ່າ 10,8 ຕື້ກວ່າກີບ ໂດຍແມ່ນ ບໍລິສັດ DLC ກໍ່ສ້າງຂົວທາງ ຈໍາກັດ ແລະ ບໍລິສັດ ພອນທອງໂຊຈະເລີນ ກໍ່ສ້າງ ຈໍາກັດຜູ້ດຽວ ເປັນຜູ້ຮັບເໝົາສ້ອມແປງ.

ເສັ້ນທີ 2 ເລີ່ມຈາກບ້ານນໍ້າຕວນ ເມືອງໄຊຍະບູລີ ຫາ ບ້ານໜອງງົວ ເມືອງພຽງ ມີ ຄວາມຍາວ 35 ກິໂລແມັດ ມີມູນຄ່າ 16,7 ຕື້ກວ່າກີບ ໂດຍແມ່ນ ບໍລິສັດ ປັນຍາທິລາດ ກໍ່ສ້າງເຄຫາຂົວທາງ ແລະ ຊົນລະປະທານ ຈໍາກັດຜູ້ດຽວ ເປັນຜູ້ຮັບເໝົາສ້ອມແປງ.

ໂຄງການສ້ອມແປງເສັ້ນທາງດັ່ງກ່າວ ແມ່ນໄດ້ຮັບທຶນຊ່ວຍເຫຼືອຈາກທະນາຄານໂລກ ມູນຄ່າທັງໝົດເກືອບ 30 ຕື້ກີບ ໂດຍຈະເລີ່ມລົງມືສ້ອມແປງພາຍໃນເດືອນກຸມພາ 2019 ເປັນຕົ້ນໄປ ແລະ ຈະໃຫ້ສໍາເລັດໃນໄລຍະເວລາ 18 ເດືອນ.

 

ໂດຍ: ອຸ່ນເຮືອນ ໂພທິລັກ

%d bloggers like this: