ຫຼວງພະບາງ ໄດ້ຮັບລາງວັນເມືອງທ່ອງທ່ຽວຍອດນິຍົມອີກຄັ້ງ

ປີ 2018 ແຂວງຫຼວງພະບາງ ມີນັກທ່ອງທ່ຽວເຂົ້າມາທ່ຽວຊົມ 7 ແສນກວ່າຄົນ, ຂະນະທີ່ປີນີ້ໄດ້ຮັບລາງວັນເປັນເມືອງທ່ອງທ່ຽວຍອດນິຍົມອີກຄັ້ງ.

ກອງປະຊຸມວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ທົ່ວ     ແຂວງຫຼວງພະບາງ ປະຈໍາປີ 2018 – 2019 ໄດ້ອັດລົງດ້ວຍຜົນສໍາເລັດອັນຈົບງາມໃນຕອນແລງຂອງວັນທີ 8 ກຸມພານີ້ ພາຍຫຼັງທີ່ດໍາເນີນມາເປັນເວລາ 02 ວັນ ໂດຍໄດ້ສຸມໃສ່ການສະຫຼຸບຄືນການປະຕິບັດໜ້າທີ່ວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໃນ 01 ປີຜ່ານມາ, ພ້ອມທັງວາງທິດທາງແຜນການໃນປີຕໍ່ໜ້າ.

ໃນກອງປະຊຸມໄດ້ມີການປະກອບ ຄວາມເຫັນຈາກຫຼາຍພາກສ່ວນໃນຫຼາຍບັນຫາທີ່ມີຄຸນຄ່າ ດ້ວຍແນວຄິດທີ່ສ້າງສັນ. ໃນນັ້ນ, ວຽກງານຖະແຫຼງຂ່າວໄດ້ພັດທະນາດ້ານວິທີການ ແລະ ຮູບແບບການນໍາສະເໜີຂໍ້ມູນ – ຂ່າວສານ, ສາລະໜ້າຮູ້ ແລະ ຄວາມບັນເທີງຜ່ານສື່ຕ່າງໆ ເປັນຕົ້ນແມ່ນ: ວິທະຍຸ, ໂທລະພາບ ແລະ ໜັງສືພິມເຮັດໃຫ້ສັງຄົມໄດ້ຮັບຂໍ້ມູນ – ຂ່າວສານດ້ານຕ່າງໆຊັດເຈນ ແລະ ວ່ອງໄວກວ່າເກົ່າ, ວຽກງານວັດທະນະທໍາໄດ້ຢຶດໝັ້ນທິດນໍາ; ປົກປັກຮັກສາ ແລະ ເສີມຂະຫຍາຍຮີດຄອງປະເພນີ, ວັດທະນະທໍາອັນເປັນມູນເຊື້ອຂອງຊາດ, ຂອງທ້ອງຖິ່ນກໍຄືເອກະລັກສະເພາະຂອງເຜົ່າຕ່າງໆພາຍໃນແຂວງໄດ້ເປັນຢ່າງດີ, ປົກປັກຮັກສາມໍລະດົກໃຫ້ຊົງຄຸນຄ່າ ແລະ ຍືນຍົງ, ຂະບວນການສິລະປະ, ວັນນະຄະດີຢູ່ແຕ່ລະໂຮງຮຽນ ແລະທ້ອງຖິ່ນຮາກຖານບ້ານໄດ້ເຄື່ອນໄຫວຮັບໃຊ້ວັນສໍາຄັນຕ່າງໆຂອງຊາດ, ຂອງພັກ ແລະ ການສະເຫຼີມສະຫຼອງປີທ່ອງທ່ຽວລາວ 2018; ສຳລັບວຽກງານທ່ອງທ່ຽວໄດ້ເອົາໃຈໃສ່ໃນການພັດທະນາ ແລະ ສົ່ງເສີມການທ່ອງທ່ຽວຕິດພັນກັບການອະນຸລັກປົກປັກຮັກສາມໍລະດົກທາງດ້ານທຳມະຊາດ, ປະຫວັດສາດ ແລະ ວັດທະນະທຳ, ເສີມຂະຫຍາຍໃຫ້ຍືນຍົງ ແລະ ສົ່ງເສີມການທ່ອງທ່ຽວດ້ວຍຫຼາຍຮູບ, ຫຼາຍແບບ ແລະ ຫຼາຍສີສັນ, ພິເສດໄດ້ເຮັດສໍາເລັດບັນດາກິດຈະກໍາໃນການສະເຫຼີມສະຫຼອງປີທ່ອງທ່ຽວລາວ 2018 ສາມາດດຶງດູດນັກທ່ອງທ່ຽວມາທ່ຽວຫຼວງພະບາງ ມີເຖິງ 755.019 ຄົນ ເພີ່ມຂຶ້ນ 15,19 ສ່ວນຮ້ອຍ.

ກອງປະຊຸມຄັ້ງນີ້ໄດ້ໃຫ້ກຽດຮັບ       ຟັງການໂອ້ລົມຂອງ ທ່ານ ບໍ່ແສງຄໍາ      ວົງດາລາ ລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເຊິ່ງທ່ານໄດ້ເນັ້ນໜັກຫຼາຍບັນຫາເພື່ອເປັນເຂັມຊີ້ທິດເຍືອງທາງໃຫ້ແກ່ການຈັດ      ຕັ້ງເຄື່ອນໄຫວວຽກງານຖະແຫຼງຂ່າວ,     ວັດທະນະທຳ ແລະ ທ່ອງທ່ຽວ ຂອງ    ແຂວງຫຼວງພະບາງ ເປັນຕົ້ນທ່ານໄດ້ເນັ້ນໃຫ້ຄະນະນຳພະແນກ ສືບຕໍ່ປະຕິບັດວຽກງານສຶກສາອົບຮົມການເມືອງແນວຄິດເປັນກົກ, ເຕົ້າໂຮມຄວາມສາມັກຄີໃຫ້ເປັນປຶກແຜ່ນ ຖືເປັນພັນທະໜ້າທີ່ ແລະ ຄວາມຮັບຜິດຊອບການເມືອງຂອງຕົນ, ຄຽງຄູ່ກັບການປັບປຸງຂອດທີ່ຄົງຄ້າງຂອງວຽກງານທຸກດ້ານ ຄຽງຄູ່ກັບການສ້າງເງື່ອນໄຂອຳນວຍຄວາມສະດວກໃຫ້ແກ່ປີທ່ອງທ່ຽວ ລາວ – ຈີນ 2019 ແລະ ການຮັກສານາມມະຍົດເມືອງຍອດນິຍົມແຫ່ງການທ່ອງທ່ຽວຈາກວາລະສານ ວັນເດີລັດ ທີ່ໄດ້ມອບໃຫ້ແກ່ແຂວງຫຼວງພະບາງອີກຄັ້ງ ໃນປີ 2019. ກອງປະຊຸມຄັ້ງນີ້ໄດ້ມີການມອບໃບຍ້ອງຍໍຂອງທ່ານເຈົ້າແຂວງໃຫ້ແກ່ກົມກອງ ແລະ ບຸກຄົນທີ່ມີສ່ວນຮ່ວມຜະລິດສາລະຄະດີ ມະຫັດສະຈັນເມືອງງອຍ ສາມາດຍາດໄດ້ອັນດັບທີ 1 ໃນທົ່ວປະເທດ ແລະ ຜູ້ທີ່ປະກອບສ່ວນພັດທະນາວຽກງານ ຖວທ ຂອງແຂວງຫຼວງພະບາງ, ພ້ອມທັງມອບໃບຍ້ອງຍໍຂອງຫົວໜ້າພະແນກ ຖວທ ແຂວງໃຫ້ແກ່ກົມກອງ ແລະ ບຸກຄົນທີ່ປະກອບສ່ວນວຽກງານວິຊາສະເພາະຕື່ມອີກ.

ເຂົ້າຮ່ວມກອງປະຊຸມຄັ້ງນີ້ມີ ທ່ານ    ວົງສະຫວັນ ເທບພະຈັນ ຮອງເຈົ້າ       ແຂວງໆຫຼວງພະບາງ ພ້ອມດ້ວຍຜູ້ຕາງໜ້າພະແນກການ, ກົມກອງກ່ຽວຂ້ອງ ແລະ ພະນັກງານທົ່ວພະແນກ, ຕະຫຼອດຮອດຫົວໜ້າ, ຮອງຫົວໜ້າຫ້ອງການ ຖວທ 11 ເມືອງ ແລະ 1 ນະຄອນ.

 

[ ຂ່າວ: ອາພຸດເດດ ບຸບຜາ ]

%d bloggers like this: