ປີ 2018 ອັກຄີໄພສ້າງຄວາມເສຍຫາຍ 33 ຕື້ກວ່າກີບ

ປີ 2018 ຜ່ານມາ ທົ່ວປະເທດເກີດອັກຄີໄພ 177 ຄັ້ງ. ໃນນີ້, ເກີດຈາກໄຟຟ້າລັດວົງຈອນ 50 ກວ່າຄັ້ງ ແຂວງອຸດົມໄຊ ເສຍຫາຍຫຼາຍກວ່າໝູ່ ຮອງລົງມາແມ່ນນະຄອນຫຼວງ ດ້ານຜູ້ຮັບຜິດຊອບເຜີຍສາເຫດທີ່ພາໃຫ້ເກີດຄວາມເສຍຫາຍໜັກໜ່ວງ ຍ້ອນຄວາມສາມາດວິຊາສະເພາະຂອງພະນັກງານວິຊາການຍັງບໍ່ທັນສູງ ອີກທັງງົບປະມານລວມທັງພາຫະນະ – ອຸປະກອນຍັງບໍ່ສາມາດຕອບສະໜອງຕາມຄວາມຕ້ອງການ.

 

 

 

 

ອີງຕາມບົດສະຫຼຸບຂອງກົມຕຳຫຼວດສະກັດກັ້ນ ແລະ ຕ້ານອັກຄີໄພ ໃຫ້ຮູ້ວ່າ: ຕະຫຼອດປີຜ່ານມາ ທົ່ວປະເທດເກີດອັກຄີໄພ ທັງໝົດ 177 ຄັ້ງ ເຮັດໃຫ້ມີຜູ້ເສຍຊີວິດ 6 ຄົນ, ບາດເຈັບ 8 ຄົນ, ເຮືອນຊານບ້ານຊ່ອງ 143 ຫຼັງ, ເຮືອນຖືກໄໝ້ 23 ຫຼັງ, ເຮືອນຄົວ 7 ຫຼັງ, ໝໍ້ຄວບຄຸມໄຟຟ້າ 1 ໜ່ວຍ, ສິມ 1 ຫຼັງ, ກຸດຕິວັດ 5 ຫຼັງ, ຫ້ອງການຄູ 1 ຫ້ອງ, ຫ້ອງຄາຣາໂອເກະ 1 ຫ້ອງ, ສາງອາໄຫຼ່ລົດ 1 ຫຼັງ, ຮ້ານອາໄຫຼ່ລົດ 1 ຮ້ານ, ສາງເກັບນ້ຳມັນ 1 ຫຼັງ, ຫໍພັກ 1 ຫຼັງ, ຫ້ອງແຖວ 8 ຫ້ອງ ແລະ ລົດ – ພາຫະນະຕ່າງໆ ຕະຫຼອດຮອດທີ່ທຳມາຫາກິນຂອງປະຊາຊົນ, ຊັບສິນຕ່າງໆ ລວມມູນຄ່າປະມານ 33,8 ຕື້ກວ່າກີບ. ໃນນັ້ນ, ແຂວງທີ່ເສຍຫາຍຫຼາຍກວ່າໝູ່ແມ່ນ      ແຂວງອຸດົມໄຊ ເສຍຫາຍປະມານ 3 ຕື້ກວ່າກີບ ແລະ ນະຄອນຫຼວງວຽງຈັນ ເສຍຫາຍປະມານ 2 ຕື້ກີບ.

 

 

 

 

ສາເຫດທີ່ພາໃຫ້ເກີດອັກຄີໄພແມ່ນມີຫຼາຍປັດໄຈແຕກຕ່າງກັນ ນັບທັງຂາດສະຕິຄວາມລະມັດລະວັງໃນການດັງໄຟ, ແຕ່ງຢູ່ຄົວກິນ, ຈູດສິ່ງເສດເຫຼືອ, ໄຕ້ທູບທຽນບູຊາ, ເກີດຈາກຄວາມຜິດພາດທາງດ້ານເຕັກນິກ ແລະ ເກີດຈາກໄພທຳມະຊາດ ເຊັ່ນ: ໄຟຟ້າລັດວົງຈອນ 54 ຄັ້ງ, ຄົນຈູດ 35 ຄັ້ງ, ປະໝາດ 7 ຄັ້ງ, ດັງໄຟແຕ່ງກິນ 4 ຄັ້ງ, ກິດກອກຢາ 6 ຄັ້ງ, ຜິດພາດດ້ານເຕັກນິກ 5 ຄັ້ງ, ຈູດຂີ້ເຫຍື້ອລາມ 9 ຄັ້ງ, ຟ້າຜ່າ 1 ຄັ້ງ ແລະ ອີກຫຼາຍສາເຫດ. ນອກນັ້ນ, ສາເຫດທີ່ພາໃຫ້ເກີດຄວາມເສຍຫາຍທາງຊັບສິນເປັນຈຳນວນຫຼວງຫຼາຍແມ່ນເນື່ອງມາຈາກ ຄວາມຮູ້ – ຄວາມສາມາດວິຊາສະເພາະຂອງພະນັກງານວິຊາການຍັງບໍ່ທັນສູງ ເຊິ່ງໃຊ້ເວລາໃນການດັບມອດໄຟແກ່ຍາວ ແລະ ອີກປະການໜຶ່ງແມ່ນດ້ານງົບປະມານທຶນຮອນ ລວມທັງພາຫະນະ – ອຸປະກອນທີ່ຮັບໃຊ້ການເຄື່ອນໄຫວວຽກງານວິຊາສະເພາະ ຍັງບໍ່ທັນຕອບສະໜອງໄດ້ຕາມຄວາມຮຽກຮ້ອງຕ້ອງການ ແລະ ຈຳເປັນອີກດ້ວຍ.

 

 

 

ຂ່າວ: ກາວຊົ່ງ, ຂໍ້ມູນຈາກກົມສະກັດກັ້ນ ແລະ ຕ້ານອັກຄີໄພ

%d bloggers like this: