ບັງກລາເທດ ໄລ່ແຮງງານທີ່ເຂົ້າຮ່ວມການປະທ້ວງ ເກືອບ 5 ພັນຄົນ

ແຮງງານຄ່າຈ້າງຕ່ຳບັງກລາເທດ ຂອງບໍລິສັດຕັດຫຍິບ ສິນຄ້າທີ່ມີຊື່ສຽງຂອງໂລກ ຖືກນາຍຈ້າງໄລ່ອອກເກືອບ 5 ພັນຄົນ ໂທດຖານທີ່ເຂົ້າຮ່ວມການປະທ້ວງ ເພື່ອຮຽກຮ້ອງຂຶ້ນຄ່າແຮງຈົນກາຍເປັນຄວາມຮຸນແຮງ ໃນເດືອນນີ້.

ສໍານັກຂ່າວເອເອັຟພີລາຍງານຈາກນະຄອນຫຼວງທາກາ ປະເທດບັງກລາເທດ ເມື່ອວັນອັງຄານ ທີ 29 ມັງກອນ ວ່າ ແຮງງານຫຼາຍສິບພັນຄົນ ໃນບັງກລາເທດຍ່າງອອກຈາກໂຮງງານຕັດຫຍິບ ເພື່ອເຂົ້າຮ່ວມການປະທ້ວງແກ່ຍາວຫຼາຍວັນ ສ້າງຄວາມວຸ້ນວາຍຕໍ່ອຸດສາຫະກຳຕັດຫຍິບເຄື່ອງນຸ່ງ ມູນຄ່າ 30 ພັນລ້ານໂດລາ (ກວ່າ 2,5 ແສນຕື້ກີບ) ແລະ ເຈົ້າໜ້າທີ່ຕຳຫຼວດປ້ອງກັນຄວາມສະຫງົບ ໃຊ້ລູກປືນຢາງ ແລະ ແກ໊ສນ້ຳຕາ ສະກັດກັ້ນກຸ່ມຜູ້ປະທ້ວງ.

ມີແຮງງານເສຍຊີວິດ 1 ຄົນ ແລະ ບາດເຈັບອີກ ກວ່າ 50 ຄົນ ຈາກການປະທະກັບເຈົ້າໜ້າທີ່ຕໍາຫຼວດ ໃນເມືອງອັດຊູເລຍ ເມືອງອຸດສາຫະກໍາສໍາຄັນນອກເມືອງຂອງນະຄອນຫຼວງທາກາ ເຊິ່ງບັນດາໂຮງງານຮັບຕັດຫຍິບເຄື່ອງນຸ່ງໃຫ້ຫ້າງຮ້ານຄ້າປີກລາຍໃຫຍ່ຫຼາຍບໍລິສັດ ເຊັ່ນ: ເອັຈ໌ແອນເອັມ (H&M), ວອລມາດ (Walmart) ແລະ ອື່ນໆ

ເຈົ້າໜ້າທີ່ຕຳຫຼວດ ເຜີຍວ່າ ແຮງງານໂຮງງານຫຼາຍພັນຄົນທີ່ຖືກກ່າວຫາວ່າບຸກປຸ້ນສະດົມ ແລະ ທຳລາຍຊັບສິນສິ່ງຂອງໃນອາຄານຮ້ານຄ້າ ຖືກນາຍຈ້າງຊາວໄຕ້ຫວັນໄລ່ອອກ ແຕ່ສະຫະພາບແຮງງານ ກ່າວຫານາຍຈ້າງເປັນຝ່າຍຂົ່ມຂູ່ຄຸກຄາມ. ທາງດ້ານ ນາຍຕໍາຫຼວດຜູ້ອາວຸໂສນະຄອນຫຼວງທາກາ ເຜີຍວ່າ ເຖິງວັນອັງຄານ ທີ 29 ມັງກອນ ມີແຮງງານໂຮງງານຕັດຫຍິບ ຖືກນາຍຈ້າງໄລ່ອອກແລ້ວ 4.899 ຄົນ ໂດຍກວ່າ 1.200 ຄົນ ໃນຈໍານວນດັງກ່າວເປັນແຮງງານໃນໂຮງງານດຽວກັນ ແລະ ໄດ້ຮັບຄ່າຈ້າງຂັ້ນຕົ້ນເດືອນລະ 95 ໂດລາ ຫຼື ປະມານ 814.000 ກີບ.

ແຕ່ຕົວແທນສະຫະພາບແຮງງານກ່າວວ່າຈໍານວນແຮງງານທີ່ຖືກໄລ່ອອກຈຳນວນຈິງແມ່ນສູງກວ່າທີ່ລະບຸຫຼາຍເກືອບ 7 ພັນຄົນ ແລະ ເກືອບ 100 ຄົນ ຖືກຕໍາຫຼວດຈັບ.

ປະເທດບັງກລາເທດ ມີໂຮງງານຕັດຫຍບ ໃນປະເທດປະມານ 4.500 ແຫ່ງ ຈ້າງແຮງງານ ປະມານ 41 ລ້ານຄົນ ແລະ ເປັນປະເທດຜູ້ສົ່ງອອກສິນຄ້າເຄື່ອງນຸ່ງຫົ່ມຫຍິບທັກລາຍໃຫຍ່ອັນດັບ 2 ຂອງໂລກຮອງຈາກຈີນ.

%d bloggers like this: