ມອບໃຫ້ເຖິງມືແລ້ວເງິນຊົດເຊີຍ 71 ຄົນທີ່ເສຍຊີວິດຈາກເຫດສັນເຂື່ອນແຕກ

ພາຍຫຼັງ, ຫ້ອງວ່າການສຳນັກງານນາຍົກລັດຖະມົນຕີ ຕົກລົງເຫັນດີມອບຄ່າຊົດເຊີຍໃຫ້ກັບຍາດພີ່ນ້ອງຜູ້ເສຍຊີວິດ ແລະ ຜູ້ສູນຫາຍ ຈຳນວນ 71 ຄົນ ຈາກເຫດການສັນເຂື່ອນເຊປຽນ-ເຊນໍ້ານ້ອຍ ແຕກ ທີ່ເມືອງສະໜາມໄຊ ແຂວງອັດຕະປື ຈຳນວນ 10.000 ໂດລາຕໍ່ຫົວຄົນ.


ຫຼ້າສຸດ ແຫຼ່ງຂ່າວອັດຕະປືກໍ່ໄດ້ລາຍງານວ່າ: ການມອບ-ຮັບເງິນຊົດເຊີຍໃຫ້ແກ່ຍາດພີ່ນ້ອງ ຜູ້ເສຍຊີວິດ ແລະ ສູນຫາຍ ຈຳນວນ 71 ສົບ ມີຂຶ້ນເມື່ອວັນທີ 26 ມັງກອນ 2019 ຜ່ານມາ ທີ່ເມືອງ ສະໜາມໄຊ ແຂວງ ອັດຕະປື ເຊິ່ງລວມມີ: ບ້ານໃໝ່ ມີຄອບຄົວຜູ້ເສຍຊີວິດ 10 ຄອບຄົວ, ລວມຜູ້ເສຍຊີວິດ 11 ຄົນ, ບ້ານ ທ່າຫີນ ມີຄອບຄົວຜູ້ເສຍຊີວິດມີ 6 ຄອບຄົວ ລວມຜູ້ເສຍຊີວິດ 8 ຄົນ, ບ້ານສະໝອງ ມີຄອບຄົວຜູ້ເສຍຊີວິດມີ 1 ຄອບຄົວ ລວມຜູ້ເສຍຊີວິດ 1 ຄົນ, ບ້ານຫີນລາດ ມີຄອບຄົວຜູ້ເສຍຊີວິດ 20 ຄອບຄົວ ລວມຜູ້ເສຍຊີວິດ 31 ຄົນ, ບ້ານ ທ່າແສງຈັນ ມີຄອບຄົວຜູ້ເສຍຊີວິດ 12 ຄອບຄົວ ລວມຜູ້ເສຍຊີວິດ 18 ຄົນ ແລະ ບ້ານແທ ມີຄອບຄົວຜູ້ເສຍຊີວິດ 2 ຄອບຄົວ ລວມຜູ້ເສຍຊີວິດ 2 ຄົນ.

ເຊິ່ງທັງໝົດນັ້ນແມ່ນໄດ້ຮັບເງິນຊົດເຊີຍເປັນທີ່ຮຽບຮ້ອຍແລ້ວ ໃນຈຳນວນ 10.000 ໂດລາ ຫຼື ເທົ່າກັບ 85.000.000 ກີບຕໍ່ຜູ້ເສຍຊີວິດໜຶ່ງຄົນ ໂດຍຖືກຕ້ອງຕາມແຈ້ງການ ເລກທີ 138/ຫສນຍ ລົງວັນທີ 23 ມັງກອນ 2019 ຈຳນວນ 10.000 ໂດລາ ຕໍ່ຫົວຄົນ ຫຼື ເທົ່າກັບ 85.000.000 ຕາມຈໍານວນຜູ້ເສຍຊີວິດ ແລະ ສູນຫາຍທີ່ລັດຖະບານຮັບຮອງ (71ຄົນ) ແລະ ໃນຕໍ່ໜ້າຖ້າຫາກພົບເຫັນຜູ້ເສຍຊີວິດຕື່ມ ບໍລິສັດກໍ່ສ້າງຕ້ອງສືບຕໍ່ຮັບຜິດຊອບຊົດເຊີຍຕື່ມອີກ.

 

ເຊິ່ງກ່ອນໜ້ານີ້ ແຫຼ່ງຂ່າວອັດຕະປືກໍລາຍງານວ່າ: ເມື່ອວັນທີ 25 – 26 ມັງກອນ 2019 ຜ່ານມາ ຄະນະອົງການຈັດຕັ້ງຂັ້ນສູນກາງ ພ້ອມດ້ວຍຄະນະອົງການຈັດຕັ້ງຂອງແຂວງອັດຕະປື ແລະ ພາກສ່ວນກ່ຽວຂ້ອງໄດ້ຮ່ວມກັນຈັດຕັ້ງກອງອັດຖະບັງສະກຸນ ( ກອງບຸນ ) ອຸທິດເຖິງດວງວິນຍານໃຫ້ລູກຫຼານພີ່ນ້ອງຜູ້ເສຍຊີວິດຈາກເຫດການເຂື່ອນແຕກທີ່ເມືອງສະໜາມໄຊ ແຂວງອັດຕະປື ລວມທັງໝົດ 75 ກອງ. ໃນນີ້, ມີກອງບຸນອຸທິດໃຫ້ເຈົ້າຖິ່ນເຈົ້າຖານ ແລະ ເຈົ້າກຳນາຍເວນ 4 ກອງ.

 


ການເຮັດບຸນໃນຄັ້ງນີ້ກໍເພື່ອເປັນການອຸທິດສ່ວນບຸນກຸສົນໄປໃຫ້ດວງວິນຍານຂອງຜູ້ເສຍຊີວິດຈາກເຫດການສັນຄູຕັນນ້ຳຂອງເຂື່ອນແຕກພັງ ໃນຈຳນວນ 6 ບ້ານ ໄດ້ຮັບຜົນກະທົບໜັກ ລວມມີຜູ້ເສຍຊີວິດ ແລະ ສູນຫາຍ 71 ສົບ.

%d bloggers like this: