ເປັນທາງການ! ບາເຊໂລນາ ຄວ້າ ເຟຣງກີ້ ເດິ ຢອງ 75 ລ້ານເອີໂຣ ຈາກ ອາແຈັກ ເຊັນຍາວ 5ປີ

ບາເຊໂລນາ ຄອນເຟີມແລ້ວ ບັນລຸຂໍ້ຕົກລົງດຶງຕົວ ເຟຣງກີ້ ເດີ ຍອງ ກອງກາງດາວເດັ່ນຂອງ ອາແຈັກ ອໍາສະເຕີດຳ ມາຮ່ວມທີມຮຽບຮ້ອຍ ໂດຍຈະຍ້າຍມາຮ່ວມທີມຫຼັງຈົບລະດູການນີ້.

ບາເຊໂລນາ ຍອດສະໂມສອນ ໃນເວທີລາລີກາ ສະເປນ ປະກາດຢືນຢັນຢ່າງເປັນທາງການ ເມື່ອວັນພຸດທີ 23 ມັງກອນ ທີ່ຜ່ານມາ ວ່າ ພວກເຂົາໄດ້ບັນລຸຂໍ້ຕົກລົງກັບອາແຈັກ ອໍາສະເຕີດຳ ສະໂມສອນຈອມປັ້ນດາວເດັ່ນ ຈາກປະເທດໂຮງລັງ ມາຮ່ວມທີມເປັນທີ່ຮຽບຮ້ອຍ ສໍາລັບການຄວ້າຕົວ ເຟຣງກີ້ ເດີ ຍອງ ກອງກາງດາວເດົ່ນຊາວດັັດມາເສີມທີມ.

ສໍາລັບຄ່າຕົວໃນການຍ້າຍທີມຄັ້ງນີ້ ປະມານ 75 ລ້ານເອີໂຣ (ປະມານ 730 ຕື້ກີບ) ບວກກັບໂບນັສອີກ 11 ລ້ານເອີໂຣ (ປະມານ 107 ຕື້ກີບ) ໂດຍດາວເຕະທີມຊາດໂຮນລັງ ອາຍຸ 21 ປີ ຈະຍ້າຍມາສົມທົບທີມ ໃນຖິ່ນຄຳນູ ຕັ້ງແຕ່ວັນທີ 1 ກໍລະກົດ ເປັນຕົ້ນໄປ ດ້ວຍສັນຍາໄລຍະຍາວເຖິງປີ 2024.

ສໍາລັບຜົນງານໃນລະດູການນີ້ ເດີ ຍອງ ເຊິ່ງເຄີຍມີຂ່າວໄດ້ຮັບຄວາມສົນໃຈຈາກທັງ ເຣອັລ ມາດຣິດ, ປາຣີສແຊັງແຊັກແມັງ ແລະ ແມນເຊັສເຕີ ຊິຕີ້ ລົງສະໜາມໃຫ້ ອາແຈັກ ໄປແລ້ວທັງໝົດ 28 ​​ນັດ ຍິງໄດ້ 4 ປະຕູ.

%d bloggers like this: