ເຊື່ອມຊຶມມະຕິ 7 ສະໄໝທີ X

ເຊື່ອມຊຶມມະຕິ 7 ສະໄໝທີ X

ໄປຄຽງຄູ່ກັບການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ທີ່ຫາກໍສິ້ນສຸດລົງດ້ວຍຜົນສຳເລັດອັນຈົບງາມນັ້ນ ທົ່ວພັກ, ທົ່ວກອງທັບ ແລະ ທົ່ວປວງຊົນເຮົາກໍສືບຕໍ່ເຊື່ອມຊຶມມະຕິ 7 ສະໄໝທີ X ຂອງພັກເຮົາຢ່າງເປັນຂະບວນຟົດຟື້ນ.

 

 

ກອງປະຊຸມຄົບຄະນະ ຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ X ເຊິ່ງດຳເນີນແຕ່ວັນທີ 22 – 30 ຕຸລາ 2018 ໄດ້ຄົ້ນຄວ້າປຶກສາຫາລື ແລະ ມີຄວາມເປັນເອກະພາບກັນໃຫ້ທິດຊີ້ນຳຕໍ່ບັນຫາສຳຄັນກ່ຽວກັບແຜນພັດທະນາເສດຖະກິດ – ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາປີ 2019. ພ້ອມນັ້ນ, ຍັງໄດ້ຮັບຮອງເອົາມະຕິວ່າດ້ວຍການເພີ່ມທະວີການນຳພາແກ້ໄຂຄວາມຫຍຸ້ງຍາກດ້ານເສດຖະກິດ – ການເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກ, ມະຕິວ່າດ້ວຍການປັບປຸງຮາກຖານການເມືອງຂອງລະບອບປະຊາທິປະໄຕ ປະຊາຊົນ ໃຫ້ເຂັ້ມແຂງ ແລະ ໜັກແໜ້ນ.

 

 

ເພື່ອເຮັດໃຫ້ເອກະສານສຳຄັນເຫຼົ່ານີ້ໄດ້ຮັບການຜັນຂະຫຍາຍເຂົ້າສູ່ຊີວິດຕົວຈິງຢ່າງຖືກຕ້ອງ, ທັນການ ແລະ ມີປະສິດທິຜົນສູງນັ້ນ ຄະນະເລຂາທິການສູນກາງພັກຈຶ່ງໄດ້ອອກຄຳສັ່ງ ເລກທີ 13/ຄລສພ ລົງວັນທີ 17 ທັນວາ 2018 ເຊິ່ງມີບາງຈຸດສຳຄັນ ດັ່ງນີ້:

ຈຸດປະສົງ ແລະ ລະດັບຄາດໝາຍ

  • ເຮັດໃຫ້ພະນັກງານນຳພາ – ຄຸ້ມຄອງທຸກຂັ້ນ, ພະນັກງານສະມາຊິກພັກ, ລັດຖະກອນ, ທະຫານ, ຕຳຫຼວດ ຕະຫຼອດຮອດປະຊາຊົນບັນດາເຜົ່າໄດ້ຮັບຮູ້ເຂົ້າໃຈແຈ້ງ ກ່ຽວກັບສະພາບຄວາມຫຍຸ້ງຍາກທາງດ້ານເສດຖະກິດ – ການເງິນຂອງປະເທດເຮົາທີ່ຜ່ານມາ ແລະ ຜົນສະທ້ອນໃນສະເພາະໜ້າ ແລະ ຍາວນານ, ກຳແໜ້ນ, ເຊື່ອມຊຶມ ແລະ ເປັນເອກະພາບຢ່າງສູງກັບທັດສະນະ, ທິດທາງ, ວິທີການ ແລະ ມາດຕະການທີ່ສູນກາງພັກວາງອອກ, ສ້າງຄວາມຕັດສິນໃຈເດັດດ່ຽວ ແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນໃນຕໍ່ໜ້າ.

  • ຄົ້ນຄວ້າກຳນົດບັນດາມາດຕະການແທດຕົວຈິງ ແລະ ມີປະສິດທິຜົນສູງເພື່ອແກ້ໄຂສະພາບດັ່ງກ່າວ ສ້າງຂະບວນການຈັດຕັ້ງປະຕິບັດຢ່າງແຂງແຮງ, ທົ່ວເຖິງກໍ່ໃຫ້ເກີດມີການຫັນປ່ຽນຕົວຈິງທີ່ມີລັກສະນະບຸກທະລຸໃນທຸກຂົງເຂດວຽກງານ ເພື່ອຍູ້ແຮງການພັດທະນາໃນດ້ານຕ່າງໆໃຫ້ບັນລຸຄາດໝາຍທີ່ກອງປະຊຸມໃຫຍ່ ຄັ້ງທີ X ຂອງພັກວາງອອກ.

 

 

  • ການຈັດຕັ້ງເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ແມ່ນຄວາມຮັບຜິດຊອບຂອງຄະນະພັກແຕ່ລະຂັ້ນ ໂດຍສະຫາຍເລຂາຄະນະພັກເປັນຜູ້ຊີ້ນຳ – ນຳພາໂດຍກົງ, ຕ້ອງເຮັດຢ່າງເລິກເຊິ່ງ, ທົ່ວເຖິງ, ສົມທົບແໜ້ນລະຫວ່າງການເຊື່ອມຊຶມກັບການປຶກສາຫາລື, ຄົ້ນຄວ້າເພື່ອຊອກຫາວິທີການ, ມາດຕະການແທດຕົວຈິງເຂົ້າໃສ່ການແກ້ໄຂບັນຫາຢ່າງມີປະສິດທິຜົນ ຖືເອົາການແກ້ໄຂຄວາມຫຍຸ້ງຍາກທາງດ້ານເສດຖະກິດຕິດພັນກັບການປັບປຸງຮາກຖານໃຫ້ປອດໃສ, ເຂັ້ມແຂງ, ໜັກແໜ້ນ, ກະກຽມເງື່ອນໄຂດ້ານຕ່າງໆເພື່ອດຳເນີນກອງປະຊຸມໃຫຍ່ 3 ຂັ້ນຂອງພັກ.

 

ໃນຄຳສັ່ງຍັງເວົ້າເຖິງຮູບແບບໃນການຈັດຕັ້ງເຊື່ອມຊຶມ ແລະ ເນື້ອໃນເອກະສານຮັບໃຊ້ການຈັດຕັ້ງເຊື່ອມຊຶມ. ພາກສ່ວນອື່ນໆໃນສັງຄົມແມ່ນໃຫ້ອີງໃສ່ພາຫະນະສື່ມວນຊົນເປັນສຳຄັນ ແລະ ການຈັດຕັ້ງເວທີພົບປະໃນລະດັບຕ່າງໆທີ່ເໝາະສົມ.

 

[ ທິດດີ ]

%d bloggers like this: