ເຈິນກວັກ ວັດສັກສິດເກົ່າແກ່ທີ່ສວຍງາມ ໃນໃຈກາງນະຄອນຫຼວງຮາໂນ້ຍ

ວັດເຈິນກວັກ ( Chua Tran Quoc ) ເປັນວັດທີ່ສວຍງາມ ແລະ ມີປະຫວັດຄວາມເປັນມາຍາວນານ ປະມານ 1.500 ປີ, ເປັນວັດທາງພຸດທະສາສະໜານິກາຍມະຫາຍານ ໃນສະໄໝທັງລອງ – ຮາໂນ້ຍ ແຫ່ງລາດຊະວົງລີ ຂອງຫວຽດນາມ, ເປັນວັດທີ່ສັກສິດທາງສາສະໜາພຸດໃນຫວຽດນາມ, ເປັນສະຖານທີ່ ທີ່ໄດ້ຮັບຄວາມສົນໃຈ ແລະ ເຄົາລົບບູຊາ ບໍ່ວ່າຈະເປັນນັກບວດທີ່ຢາກສຶກສາທາງພຸດທະສາສະໜາໃນຫວຽດນາມ ກໍຄືນັກທ່ອງທ່ຽວຈາກພາຍໃນ ແລະ ຕ່າງປະເທດ.

ในภาพอาจจะมี สถานที่กลางแจ้ง, น้ำ และธรรมชาติ

ວັດຕັ້ງຢູ່ເທິງເກາະກາງທະເລສາບຕາເວັນຕົກ ( West Lake ) ກັບ ໜອງຈຸກເບກ ( Truc Bach) ເຊິ່ງຂຶ້ນກັບຖະໜົນແທັງນຽນ ເມືອງໄຕໂຮ່ ນະຄອນຫຼວງຮາໂນ້ຍ ໂດຍຖະໜົນແທັງນຽນ ແມ່ນຜ່ານລະ ຫວ່າງກາງຂອງທະເລສາບ ແລະ ໜອງຈຸກເບກ; ວັດເຈິນກວັກ ເປັນໜຶ່ງໃນສະຖາປັດຕະຍະກຳທາງພຸດທະສາສະໜາທີ່ສວຍງາມເກົ່າແກ່, ບໍລິເວນອ້ອມຂ້າງວັດເປັນທິວທັດທຳມະຊາດອັນສວຍງາມ ແລະ ນ້ຳໃນທະເລສາບທີ່ງຽບສະຫງົບ ເຊິ່ງໃນສະໄໝລາດຊະວົງລີ ແລະ ລາດຊະວົງເຈິນ ແລະ ວັດແຫ່ງນີ້ເປັນສູນກາງທາງພຸດທະສາສະໜາຂອງຊາວຫວຽດນາມ.

ในภาพอาจจะมี ต้นไม้, ท้องฟ้า และสถานที่กลางแจ้ง

ในภาพอาจจะมี หนึ่งคนขึ้นไป, ผู้คนกำลังยืน, ต้นไม้ และสถานที่กลางแจ้ง

ວັດແຫ່ງນີ້ສ້າງຂຶ້ນໃນປີ ຄ.ສ 541 – 547 ສະໄໝເຈົ້າຊີວິດລີນາມເດ ເຊິ່ງເປັນສະໄໝທີ່ພຸດທະສາສະໜາແຜ່ລາມ ແລະ ຂະຫຍາຍຕົວທີ່ສຸດຍຸກໜຶ່ງຂອງຫວຽດນາມ, ທາງເຂົ້າວັດຈຶ່ງມີແຕ່ທາງດຽວ, ປະຕູໂຂງວັດປະກອບມີ 3 ປະຕູເຂົ້າ – ອອກ, ວັດປະກອບມີສອງຫໍ ຄື: ຫໍຕຽນເດືອງ ( Tien Duong ) ແລະ ຫໍທິວກົງ ( Thieu Cong ) ໜ້າຫໍມີຖັງທູບວາງໄວ້ ແລະ ໜຶ່ງພະທາດ ເຊິ່ງຫໍ ແລະ ພະທາດຕັ້ງຢ່າງເປັນລະບຽບຕາມຜັງວັດ ຫາກເບິ່ງມາແຕ່ມູມສູງຈະເຫັນເໝືອນຄຳວ່າ ກົງ ( cong ) ໃນພາສາຈີນ ເຊິ່ງພະທາດມີຄວາມສູງປະມານ 15 ແມັດ, ມີທັງໝົດ 11 ຊັ້ນ, ແຕ່ລະຊັ້ນມີປະຕູ 6 ປະຕູ ທີ່ມີພະພຸດທະຮູບສີຂາວເຮັດດ້ວຍຫີນມີຄ່າແກະສະຫຼັກຢ່າງສວຍງາມ 6 ອົງ ວາງໄວ້ປົກປ້ອງປະຕູທັງ 6; ໃນວັດຍັງເກັບຮັກສາບັນດາເຄື່ອງໃຊ້ບູຊາແຕ່ສະໄໝກ່ອນ ແລະ ພະພຸດທະຮູບທີ່ສັກສິດຫຼາຍອົງ ເປັນຕົ້ນແມ່ນ: ເຈົ້າແມ່ກວນອີນ ແລະ ພະສາຍາມຸນີ ພະພຸດທະເຈົ້າທີ່ຫຼໍ່ດ້ວຍທອງຄຳ.

ในภาพอาจจะมี 3 คน, ผู้คนกำลังยืน, ต้นไม้ และสถานที่กลางแจ้ง

ດ້ວຍຄວາມເກົ່າແກ່ທີ່ມີອາຍຸຫຼາຍສະຕະວັດ ເຊິ່ງວັດແຫ່ງນີ້ໃນເບື້ອງຕົ້ນມີຊື່ວ່າ ຄາຍກວັກ ( Khai Quoc ) ມີຄວາມໝາຍວ່າເປີດປະເທດຊາດ ຈົນເຖິງສະໄໝລາດຊະວົງເຈິນ, ວັດແຫ່ງນີ້ໄດ້ຮັບການບູລະນະປະຕິສັງຂອນໃໝ່ໃນຕົ້ນລາດຊະວົງຫງວຽນ ປະມານປີ 1821 ໂດຍເຈົ້າຊີວິດ ມິນມັ໋ງ ( Vua Minh Mang ) ໄດ້ບູລະນະໃໝ່ອີກຄັ້ງ ແລະ ຫຼອມລະຄັງ, ປີ 1842 ເຈົ້າຊີວິດທຽວຈິ໋ ( Thieu Tri ) ໄດ້ມາສັກກາລະທີ່ວັດແຫ່ງນີ້ ແລະ ໄດ້ມອບທອງຄຳ ແລະ ເງິນຈຳນວນ 200 ຫຼຽນໃຫ້ວັດ ແລະ ໄດ້ປ່ຽນຊື່ມາເປັນ “ ວັດເຈິນກວັກ ” ເຊິ່ງມີ ຄວາມໝາຍວ່າປົກປັກຮັກສາປະເທດຊາດ.

ในภาพอาจจะมี 1 คน, ท้องฟ้า และสถานที่กลางแจ้ง

ລັກສະນະຂອງພະທາດມີ ຄວາມງົດງາມພິເສດ ແລະ ສ້າງຕາມຂະໜົບທຳນຽມແບບພຸດທະສາສະໜາທຸກປະການ, ໃນວັດຍັງມີແທ່ນບູຊາ ແລະ ບັນດາແຜ່ນຈາລຶກແຫ່ງກຽດຕິຄຸນທີ່ມີຄຸນຄ່າທາງປະຫວັດສາດ, ວັດທະນະທຳ ແລະ ສິລະປະຕ່າງໆ ເຊິ່ງຂຽນ ແລະ ຈາລຶກໄວ້ໃນປີ 1639 ໂດຍບັນດິດ ຫງວຽນ ສວນ ຈິງ ສະໄໝລາດຊະວົງເຈິນ ມີຈຳນວນທັງໝົດ 14 ແຜ່ນ ເຊິ່ງແຕ່ລະແຜ່ນແກະສະຫຼັກດ້ວຍຕົວອັກສອນພາສາຈີນ. ນອກນັ້ນ, ໃນວັດຍັງມີຕົ້ນໂພ ຫຼື ຕົ້ນສີມະຫາໂພ ທີ່ລັດຖະມົນຕີ ຣາເຈນດຣາ ພຣາສາດ ( Rajendra Prasad ) ແຫ່ງອິນເດຍ ໄດ້ມອບໃຫ້ວັດແຫ່ງນີ້ໃນປີ ຄ.ສ 1959 ເຊື່ອກັນວ່າເປັນຕົ້ນທີ່ແຍກຈາກຕົ້ນໂພສັກສິດ ມອບໃຫ້ວັດແຫ່ງນີ້ເພື່ອເປັນໜຶ່ງໃນສັນຍະລັກໃຫ້ນັກທ່ອງທ່ຽວ, ນັກບວດ ແລະ ນັກສະແຫວງຫາບຸນທົ່ວໂລກ ມາວັດທີ່ນີ້ເພື່ອສັກກາລະບູຊາ.

ในภาพอาจจะมี ท้องฟ้า และสถานที่กลางแจ้ง

ວັດແຫ່ງນີ້ເປັນວັດທີ່ມີຄວາມສວຍງາມ ເໝາະສຳລັບການພັກຜ່ອນທ່າມກາງບັນຍາກາດທີ່ງຽບສະຫງົບ, ເປັນວັດທີ່ເໝືອນຫໍພິພິທະພັນນ້ອຍທີ່ເກັບຮັກສາວັດຖຸສິ່ງຂອງເກົ່າແກ່ທາງພຸດທະສາສະໜາ ຫາກມາທ່ຽວຊົມທີ່ນີ້ທ່ານຈະເພິ່ງພໍໃຈ ແລະ ຮູ້ສຶກກຸ້ມຄ່າ ເພາະໄດ້ມາແວ່ຊົມວັດຖຸບູຮານທີ່ໜ້າຕື່ນຕາຕື່ນໃຈທີ່ມີອາຍຸຫຼາຍຮ້ອຍປີ ແລະ ພິເສດແມ່ນມາທ່ຽວທີ່ນີ້ໃນຍາມແລງທີ່ຕາເວັນໃກ້ລັບຂອບຟ້າ ນັກທ່ອງທ່ຽວຈະສາມາດເຫັນທິວທັດອັນສວຍງາມ ບໍ່ວ່າທິວທັດອັນກວ້າງໃຫຍ່ງາມສະດຸດຕາຂອງທະເລສາບຕາເວັນຕົກ ຫຼື ທ້ອງຟ້າທີ່ມີສີບົວ ແລະ ເຫຼືອງທີ່ປະດັບຈາກນ້ຳໃນທະເລສາບກັບສີວັດ ແລະ ພະທາດທີ່ງົດງາມສະເພາະທີ່ແຫ່ງນີ້.

ในภาพอาจจะมี 1 คน, ท้องฟ้า และสถานที่กลางแจ้ง

ແວ່ທີ່ວັດແຫ່ງນີ້ທ່ານຍັງສາມາດນັ່ງຈິບນ້ຳຊາໄປນຳຊົມວິວໄປນຳ ເຊິ່ງການພັກຜ່ອນຢ່ອນອາລົມທີ່ໜ້າຕື່ນຕາຕື່ນໃຈຈົນບໍ່ຢາກກັບເລີຍກໍວ່າໄດ້ ເຊິ່ງຕາມແຄມທະເລສາບຈະມີແມ່ຄ້າທັງຫຼາຍທີ່ມານັ່ງຂາຍເຄື່ອງທີ່ລະນຶກ ແລະ ເຄື່ອງດື່ມນ້ຳຊາຕ່າງໆ ເຊິ່ງແມ່ຄ້າທັງຫຼາຍລ້ວນແຕ່ໃຈດີຍິນດີຕ້ອນຮັບນັກທ່ອງທ່ຽວນັ່ງຈິບນ້ຳຊາໄປນຳລົມໄປນຳ ທັງຊົມທິວທັດທຳມະຊາດອັນສວຍງາມສຸດຂອບຟ້າຂອງທະເລສາບຕາເວັນຕົກອັນກວ້າງໃຫຍ່. ຄໍາວ່າ “ ທະເລສາບຕາເວັນຕົກ ” ໝາຍເຖິງຄວາມງົດງາມຂອງທຳມະຊາດທີ່ນີ້ໃນຍາມຕາເວັນໃກ້ລັບຂອບຟ້າ ບໍ່ວ່າທ້ອງຟ້າ ຫຼື ນ້ຳໃນທະເລສາບກໍຈະປ່ຽນສີ, ບໍລິເວນໃກ້ວັດເຈິນກວັກ ຍັງມີໂຮງແຮມທີ່ທັນສະໄໝ ແລະ ບໍລິການເປັນຢ່າງດີ, ມີທັງລາຄາຖືກ ແລະ ແພງຕາມ ຄວາມຕ້ອງການຂອງນັກທ່ອງທ່ຽວ.

ในภาพอาจจะมี ท้องฟ้า, เมฆ, ต้นไม้, มหาสมุทร, สถานที่กลางแจ้ง และธรรมชาติ

ປັດຈຸບັນ ວັດເຈິນກວັກ ເປັນໜຶ່ງໃນສະຖາປັດຕະຍະກຳທາງສາສະໜາ ທີ່ຊາວຫວຽດນາມ ກໍຄືຊາວນະຄອນຫຼວງຮາໂນ້ຍ ພາກພູມໃຈ ບໍ່ວ່າທາງສະຖະປັດຕະຍະກຳ, ຄວາມເຊື່ອຖືສິ່ງສັກສິດ ແລະ ໄດ້ຖືກຮັບຮອງເປັນ 1 ໃນ 16 ວັດ ທີ່ສວຍງາມທີ່ສຸດຂອງໂລກ ໂດຍສຳນັກຂ່າວລາຍວັນ ເດຍລີ່ ເມລ ( Daily Mail ) ຂອງອັງກິດ ແລະ ເປັນວັດທີ່ງາມທີ່ສຸດຂອງຫວຽດນາມ ເຊິ່ງເປັນສະຖານທີ່ທ່ອງທ່ຽວທີ່ມີນັກທ່ອງທ່ຽວຈາກຕ່າງປະເທດເຂົ້າມາແວ່ຊົມ, ສຶກສາຄົ້ນຄວ້າຊອກຮູ້ທາງປະຫວັດສາດ, ວັດທະນະທຳ ແລະ ຮີດຄອງປະເພນີອັນດີງາມຂອງຊາວຫວຽດນາມ ແລະ ຍັງເປັນສະຖານທີ່ທີ່ມີນັກທ່ອງທ່ຽວເຂົ້າແວ່ຫຼາຍທີ່ສຸດໃນນະຄອນຫຼວງຮາໂນ້ຍ ອີກດ້ວຍ.

%d bloggers like this: