ຈັບຕາ CPTPP

ປີໃໝ່ 2019, ຄໍລຳເຮົາເລີ່ມຕົ້ນດ້ວຍການສະເໜີເຂດການຄ້າທີ່ເລີ່ມປາກົດເປັນຈິງ ພາຍຫຼັງການຖອນຕົວອອກຂອງສະຫະລັດອາເມຣິກາ ນັ້ນຄື: CPTPP ( Comprehensive and Progreessive Agreement for Trans – Pacific Parne rship ).

ເຂດການຄ້າ ຫຼື ວ່າສັນຍາຄູ່ຮ່ວມມືເສດຖະກິດເຊື່ອມໂຍງສອງຝັ່ງປາຊີຟິກ ນີ້ແມ່ນສືບຕໍ່ TPP ນັ້ນແມ່ນສັນຍາຄູ່ຮ່ວມເສດຖະກິດຍຸດທະສາດຂ້າມປາຊີຟິກ ( ..Trans – Pacific Strategic Economic Partnership Agreement ..) ລວມມີ 12 ປະເທດ ແຕ່ແລ້ວກໍມາພົບທາງຕັນ ເມື່ອອາເມຣິກາ ຖອນຕົວອອກໃນວັນທີ 23 ມັງກອນ 2017 ໂດຍທ່ານ ທຣຳ ປະທານາທິບໍດີລົງນາມຖອນຕົວ ໂດຍໃຫ້ເຫດຜົນວ່າ: ອາເມຣິກາ ເສຍຜົນປະໂຫຍດ, ຂັດກັບນະໂຍບາຍຈ້າງງານ ໂດຍສະເພາະແມ່ນນະໂຍບາຍ ອາເມຣິກາ ຕ້ອງມາກ່ອນ ( The Firt AMERICA ).

 

ກຸ່ມ TPP ນີ້ ຈະເປັນເຂດການຄ້າເສລີ ກວ້າງທີ່ສຸດ ເພາະກວມເສດຖະກິດ ( GDP ) ເຖິງ 40%. ໃນນັ້ນ, ອາເມຣິກາ ເປັນຕະຫຼາດໃຫຍ່ໃນກຸ່ມມີສັດສ່ວນ GDP ເຖິງ 60%, ຫາກ ອາເມຣິກາ ບໍ່ຖອນຕົວກຸ່ມນີ້ຈະດຳເນີນການເຄື່ອນໄຫວຢ່າງເປັນທາງການ ໃນປີ 2018.

ເຖິງວ່າ ອາເມຣິກາ ຖອນອອກແຕ່ປະເທດທີ່ຍັງເຫຼືອກໍສືບຕໍ່ ໂດຍປ່ຽນຊື່ໃໝ່ເປັນ CPTPP, ສັນຍາດັ່ງກ່າວໄດ້ຮັບການລົງນາມຢ່າງເປັນທາງການຢູ່ນະຄອນຊັນຕີເອໂກ ປະເທດຈີເລ ເມື່ອເດືອນມີນາ 2018 ແລະ ສັນຍານີ້ມີຜົນສັກສິດນັບແຕ່ວັນທີ 30 ທັນວາ 2018 ເປັນຕົ້ນໄປ.

 

 

ວິທະຍຸກະຈາຍສຽງຫວຽດນາມ ( VoV World ) ສະບັບອອນລາຍລົງວັນທີ 3 ມັງກອນ 2019 ໄດ້ພິມບົດໃນຫົວ         ຂໍ້: .. CPTPP ຂົວເຊື້່ອມຕໍ່ການເຊື່ອມໂຍງເສດຖະກິດສອງຝັ່ງປາຊີຟິກ ..” ມີບາງຈຸດສຳຄັນຂຽນວ່າ:

“ … ວັນທີ 30 ທັນວາ ປີ 2018, ສັນຍາຄູ່ຮ່ວມມືຮອບດ້ານ ແລະ ກ້າວໜ້າຂ້າມປາຊີຟິກ ( CPTPP ) ເລີ່ມມີຜົນສັກສິດສ້າງເປັນເຂດການຄ້າເສລີ ລວມມີ 11 ປະເທດກວມເອົາ ທະວີບອາເມຣິກາ, ອາຊີ ແລະ ທະວີບໂອເຊອານີ, ເຫດການນີ້ແມ່ນບາດກ້າວເດີນໃຫຍ່, ຊ່ວຍໃຫ້ບັນດາພື້ນຖານເສດຖະກິດຜ່ານຜ່າສິ່ງທ້າທາຍຂອງລັດທິອາລັກຂາພວມບືນຂຶ້ນຢ່າງແຮງ.

CPTPP ແມ່ນສັນຍາການຄ້າເສລີ ລະຫວ່າງ 11 ປະເທດ ເຊິ່ງລວມມີ: ອົດສະຕຣາລີ, ບຣູໄນ, ການາດາ, ຈີເລ,       ຍີ່ປຸ່ນ, ມາເລເຊຍ, ເມັກຊິກໂກ, ນູແວນເຊລັງ, ເປຣູ, ສິງກະໂປ ແລະ ຫວຽດນາມ. ສັນຍາດັ່ງກ່າວໄດ້ຮັບການລົງນາມຢ່າງເປັນທາງການຢູ່ Santiago ປະເທດຈີເລ ເມື່ອເດືອນມີນາ ປີ 2018. ສັນຍານີ້ໄດ້ຊ່ວຍຫຼຸດຜ່ອນຮົ້ວກີດຂວາງດ້ານພາສີລະຫວ່າງບັນດາປະເທດສະມາຊິກ.

 

 

ອົດສະຕຣາລີ, ການາດາ, ຍີ່ປຸ່ນ, ເມັກຊິກໂກ, ນູແວນເຊລັງ ແລະ ສິງກະໂປ ແມ່ນ 6 ປະເທດທຳອິດ ຮັບຮອງເອົາ CPTPP ເພື່ອສ້າງເງື່ອນໄຂໃຫ້ສັນຍານີ້ມີຜົນສັກສິດ. ຢູ່ ຫວຽດນາມ ສັນຍານີ້ຈະມີຜົນສັກສິດນັບແຕ່ວັນທີ 14 ມັງກອນ ປີ 2019 ເປັນຕົ້ນໄປ… ”.

CPTPP ເປັນຕະຫຼາດໃຫຍ່ ກວມພົນລະເມືອງ 500 ລ້ານຄົນ ແລະ ກວມ GDP ປະມານ 10.100 ຕື້ໂດລາ.

ການທີ່ CPTPP ມີຜົນສັກສິດຢ່າງເປັນທາງການ ນັບແຕ່ວັນທີ 30 ທັນວາ 2018 ເປັນຕົ້ນມາ ໄດ້ເປັນຂີດໝາຍໃໝ່ຂອງການສ້າງຕັ້ງເຂດການຄ້າເສລີເປັນຄັ້ງທຳອິດຢູ່ອາຊີ – ປາຊີຟິກ, ແມ່ນກຳລັງຊຸກຍູ້ວິວັດການຫັນເປັນໂລກາພິວັດ, ກາຍເປັນການເຊື່ອມໂຍງເສດຖະກິດລະຫວ່າງສອງຝັ່ງອາຊີ – ປາຊີຟິກ… ສຳຄັນກວ່ານັ້ນແມ່ນການຕີເຂົ້າລັດທິກີດກັ້ນການຄ້າຂອງປະເທດມະຫາອຳນາດໂລກ ນຳໄປສູ່ການປ່ຽນແປງ ແລະ ເຊື່ອມໂຍງກັບທຸກປະເທດໃນໂລກ.

( ຈົບ )

[ ທິດດີ ]

%d bloggers like this: