ທັດສະນະມະຫາຊົນ ຕໍ່ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ

ເນື່ອງໃນໂອກາດທີ່ທົ່ວພັກ – ລັດ, ທົ່ວກອງທັບ ແລະ ທົ່ວປວງຊົນລາວທັງຊາດ ກຳລັງອອກແຮງແຂ່ງຂັນສ້າງຂະບວນການ ແລະ ກິດຈະກຳຕ່າງໆເພື່ອເປັນການປະກອບສ່ວນ ສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ( 20 ມັງກອນ 1949 ຫາ 20 ມັງກອນ 2019 ) ທີ່ຄົນລາວເຮົາຕ່າງກໍຮູ້ນຳກັນແລ້ວວ່າ ວັນທີ 20 ມັງກອນ ວັນສ້າງຕັ້ງກອງທັບປະຊາຊົນລາວ ມີຄວາມສຳຄັນແນວໃດຕໍ່ປະເທດຊາດ, ຫາກບໍ່ມີກອງທັບປະຊາຊົນລາວໃນມື້ນັ້ນປະເທດເຮົາກໍບໍ່ມີມີື້ນີ້. ດັ່ງນັ້ນ, ພວກເຮົາມາເບິ່ງບາງຄວາມຄິດເຫັນຂອງມວນຊົນຕໍ່ກັບວັນດັ່ງກ່າວ.

ທ່ານ ພັນເອກ ຄຳສາວ ແກ້ວວິເສດ ຫົວໜ້າບັນນາທິການ ໜັງສືພິມກອງທັບ ໄດ້ໃຫ້ທັດສະນະວ່າ: ໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ກໍພໍດີກັບການລະນຶກວັນສ້າງຕັ້ງໜັງສືພິມກອງທັບປະຊາຊົນລາວ ຄົບຮອບ 54 ປີ ( 20 ມັງກອນ 1965 ຫາ 20 ມັງກອນ 2019 ) ຂ້າພະເຈົ້າຕາງໜ້າພະນັກງານ – ນັກຮົບ ໜັງສືພິມກອງທັບ ຂໍສະແດງຄວາມຄຳນັບຊົມເຊີຍ ແລະ ພາກພູມໃຈເປັນຢ່າງຍິ່ງທີ່ປະເທດຊາດເຮົາມີການພັດທະນາ ແລະ ຂະຫຍາຍຕົວໃນທຸກດ້ານ ທັງດ້ານວຽກງານປ້ອງກັນຊາດ, ປ້ອງກັນຄວາມສະຫງົບ, ແນວທາງນະໂຍບາຍຂອງພັກ -ລັດ ໄດ້ຮັບການຜັນຂະຫຍາຍຢ່າງຕັ້ງໜ້າ, ປະເທດຊາດມີຄວາມໝັ້ນຄົງ, ສັງຄົມມີຄວາມສະຫງົບສຸກ, ເສດຖະກິດກໍຮັກສາໄດ້ໃນຈັງຫວະທີ່ເຕີບໂຕໄວ ແລະ ມີລັກສະນະຕໍ່ເນື່ອງ, ວັດທະນະທຳ – ສັງຄົມໄດ້ຮັບການອະນຸຮັກ – ຮັກສາ ແລະ ປັບປຸງໃຫ້ດີຂຶ້ນ, ຊີວິດການເປັນຢູ່ຂອງປະຊາຊົນນັບມື້ດີຂຶ້ນ ແລະ ປະເທດຊາດກໍມີຄວາມຈະເລີນຮຸ່ງເຮືອງຕາມລຳດັບ. ໃນໂອກາດນີ້ກໍຂໍອວຍພອນໃຫ້ບັນດາການນຳພັກ – ລັດ, ກະຊວງປ້ອງກັນປະເທດ ແລະ ຄະນະກົມໃຫຍ່ການເມືອງກອງທັບ ຈົ່ງມີສຸຂະພາບເຂັ້ມແຂງ, ມີຄວາມປີຊາສາມາດໃນການນຳພາ ແລະ ຊີ້ນຳພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນກ້າວໜ້າຂຶ້ນເລື້ອຍໆຕາມທິດສັງຄົມນິຍົມ.

ທ່ານ ພັນໂທ ຈະເລີນສຸກ ວັງເວີນໂຂງ ຫົວໜ້າອຳນວຍການ ຫໍພິພິທະພັນປະຫວັດສາດ ກອງທັບປະຊາຊົນລາວ ໃຫ້ສຳພາດວ່າ: ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ຖືວ່າເປັນບຸນປາງໃຫຍ່ຂອງປວງຊົນທັງຊາດ ຖ້າບໍ່ມີມື້ນັ້ນກໍບໍ່ມີມື້ນີ້ທີ່ມີຄວາມເຕີບໃຫຍ່ເຂັ້ມແຂງຂະຫຍາຍຕົວມາຮອດປັດຈຸບັນ ພາຍໃຕ້ການນຳພາຂອງພັກປະຊາຊົນ ປະຕິວັດລາວ ແລະ ພາຍໃຕ້ການອູ້ມຊູຂອງປະຊົນລາວບັນດາເຜົ່າ. ສະນັ້ນ, ຈຶ່ງເຮັດໃຫ້ເຮົາມີການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງຈົນຮອດປັດຈຸບັນ ພວກເຮົາພະນັກງງານນັກຮົບຖືວ່າມີຄວາມພາກພູມໃຈທີ່ໄດ້ເປັນລູກຫຼານຂອງປະຊາຊົນລາວ ແລະ ຜົນງານອັນໃຫຍ່ຫຼວງອັນນີ້ ເຮັດໃຫ້ຄົນຮຸ່ນໃໝ່ເປັນເຈົ້າການໃນການຮຽນຮູ້, ສຶກສາ ແລະ ນຳເອົາໄປຜັນຂະຫຍາຍເຂົ້າໃນການປະຕິບັດຕົວຈິງຂອງປວງຊົນລາວທັງຊາດ, ຈົ່ງນຳເອົາຜົນງານ ແລະ ໄຊຊະນະໄປປູກຈິດສຳນຶກ, ເປັນຂໍ້ມູນ ຫຼື ບົດຮຽນໃນການດຳລົງຊີວິດຂອງຕົນເອງກໍຄືຂອງຊາດ.

ທ່ານ ຄຳຫຼ້າ ດວງພະສຸກ ປະທານ ບໍລິສັດ ດວງພະສຸກ ກໍ່ສ້າງສ້ອມແປງຂົວທາງ – ເຄຫາສະຖານ ແລະ ຊົນລະປະທານ ຈຳກັດ ຜູ້ດຽວ ໄດ້ກ່າວວ່າ: ຕະຫຼອດໄລຍະ 70 ປີ ບົນເສັ້ນທາງແຫ່ງການກໍ່ຕັ້ງ, ສູ້ຮົບມີໄຊ ແລະ ເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ພາຍໃຕ້ການນຳພາຂອງພັກ, ກອງທັບເຮົາໄດ້ຜ່ານຜ່າອຸປະສັກ ຄວາມຫຍຸ້ງຍາກນາໆປະການ ທີ່ເຕັມໄປດ້ວຍຄວາມເສຍສະຫຼະອັນໃຫຍ່ຫຼວງ ໃນພາລະກິດຕໍ່ສູ້ກູ້ຊາດອັນຍືດເຍື້ອຍາວນານເປັນເວລາຫຼາຍປີ ນັບແຕ່ມື້ໄດ້ຮັບການສ້າງຕັ້ງ ( ວັນທີ 20 ມັງກອນ 1949 ) ໂດຍແມ່ນ ປະທານ ໄກສອນ ພົມວິຫານ ເປັນຜູ້ປະກາດສ້າງຕັ້ງເປັນຕົ້ນມາ ກອງທັບເຮົາໄດ້ເຕີບໃຫຍ່ເຂັ້ມແຂງເປັນກ້າວໆມາ, ສາມາດຕີຊະນະບັ້ນຮົບນີ້ໄປສູ່ບັ້ນຮົບໃໝ່, ສາມາດເຮັດສຳເລັດພາລະກິດປະຫວັດສາດທີ່ພັກ ແລະ ປະຊາຊົນມອບໝາຍໃຫ້ຢ່າງມີໄຊ, ປະເທດຊາດໄດ້ຮັບການປົດປ່ອຍຢ່າງສົມບູນ ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ຢ່າງສະຫງ່າຜ່າເຜີຍ.

ທ່ານ ນາງ ວຽງໄຊ ພິມມະແສງ ຜູ້ອຳນວຍການ ໂຮງຮຽນອະນຸບານ – ປະຖົມ – ມັດທະຍົມຕອນຕົ້ນ ແສງສະໄໝ ໃຫ້ສຳພາດ ວ່າ: ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ເພື່ອເປັນການລະນຶກເຖິງຄຸນງາມຄວາມດີຂອງບັນດານັກຮົບປະຕິວັດຜູ້ເສຍສະຫຼະເລືອດເນື້ອໃນຂະບວນການຕໍ່ສູ້ກູ້ຊາດຕ້ານພວກລ່າເມືອງຂຶ້ນຝຣັ່ງ ເຊິ່ງກຳລັງປະກອບອາວຸດເຮົາພາຍໃຕ້ການນຳພາຂອງພັກປະຊາຊົນ ປະຕິວັດລາວ ແມ່ນປະຫວັດສາດແຫ່ງການກໍ່ສ້າງສູ້ຮົບມີໄຊຂອງກອງທັບ ແລະ ປະຊາຊົນ ພ້ອມກັນຕໍ່ສູ້ຢ່າງທົນທານອາດຫານໜຽວແໜ້ນບໍ່ຍອມຈຳນົນ ແລະ ຕີຕ້ານບັນດາອິດທິພົນກຳລັງຮຸກຮານໃຫ້ປະລາໄຊລົງ ພາຍໃຕ້ຄັນທຸງຂອງພັກປະຊາຊົນ ປະຕິວັດລາວ ຈົນສາມາດຍາດໄດ້ຮັບໄຊຊະນະຄັ້ງຍິ່ງໃຫຍ່ ໃນວັນທີ 2 ທັນວາ 1975. ພ້ອມນັ້ນ, ກໍຍັງໄດ້ສືບຕໍ່ປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາປະເທດຊາດ ເຮັດໃຫ້ຕະຫຼອດໄລຍະຜ່ານມາປະເທດຊາດໄດ້ຮັບການພັດທະນາຂຶ້ນເປັນກ້າວໆ ຈົນກາຍເປັນວັນປະຫວັດສາດໃນການສ້າງຕັ້ງກອງທັບປະຊາຊົນລາວບັນດາເຜົ່າຢ່າງເປັນທາງການ ເຊິ່ງຖືເປັນບາດກ້າວກະໂດດທີ່ສຳຄັນໃນພາລະກິດຕໍ່ສູ້ຕ້ານການຮຸກຮານ ກໍຄືໃນການຂະຫຍາຍໄຊຊະນະຂອງກຳລັງປະກອບອາວຸດຂອງປະຊາຊົນລາວເຮົາ. ຂ້າພະເຈົ້າຂໍອວຍພອນໄຊອັນປະເສີດແດ່ຜູ້ນຳພັກ – ລັດ, ນາຍ ແລະ ພົນທະຫານໃນກຳລັງປະກອບອາວຸດ ຕະຫຼອດຮອດປະຊາຊົນລາວບັນດາເຜົ່າ ຈົ່ງປະສົບຜົນສຳເລັດໃນໜ້າທີ່ວຽກງານ, ມີພະລະນາໄມທີ່ເຂັ້ມແຂງ, ພ້ອມກັນປະກອບສ່ວນສ້າງສາ, ພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງ.

ນາງ ຕາມົນ ເຮືອງມີໄຊ ນັກສຶກສາພາກວິຊາສື່ສານມວນຊົນ ປີ 3 ເວົ້າວ່າ: ຂໍຄໍານັບຮັບຕ້ອນວັນສ້າງຕັ້ງກອງທັບປະຊາຊົນລາວ ທີ່ໄດ້ໝູນວຽນມາບັນຈົບຄົບຮອບອີກວາລະໜຶ່ງຢ່າງສຸດໃຈ ຖືເປັນຂີດໝາຍອັນສຳຄັນແກ່ປວງຊົນລາວທັງຊາດສະແດງໃຫ້ເຫັນຜົນງານ, ໄຊຊະນະ, ໝາກຜົນອັນເລີດລໍ້າຂອງກອງທັບ ຕະຫຼອດ 70 ປີ ທີ່ຊ່ວຍນຳພາປະຊາຊົນໃນການຕໍ່ສູ້, ສ້າງສາ ແລະ ພັດທະນາປະເທດຊາດ ນ້ອງເອງໃນນາມນັກຮຽນ – ນັກສຶກສາຂໍສະແດງຄວາມຮູ້ບຸນຄຸນອັນສູງສົ່ງຕໍ່ບັນດາພະນັກງານ, ນາຍ ແລະ ພົນທະຫານທີ່ກຳລັງປະຕິບັດໜ້າທີ່ວຽກງານໃນປັດຈຸບັນຈົ່ງມີສຸຂະພາບແຂງແຮງ, ປະສົບຜົນສຳເລັດໃນທຸກໜ້າທີ່ວຽກງານ ແລະ ຈົ່ງພ້ອມກັນສ້າງສາພັດທະນາປະເທດຊາດໃຫ້ຈະເລີນກ້າວໜ້າຍິ່ງໆຂຶ້ນໄປ.

ທ່ານ ສີພັນ ຈັນທະພິມ ອາຍຸ 68 ປີ ຢູ່ສູນເສຍອົງຄະ 489 ບ້ານຂຸດສາມບາດ ເມືອງໄຊທານີ ກ່າວວ່າ: ເນື່ອງໃນໂອກາດວັນສ້າງຕັ້ງກອງທັບ ຄົບຮອບ 70 ປີ ຂ້າພະເຈົ້າສຸດທີ່ພາກພູມໃຈຫຼາຍ ແລະ ຂໍອວຍໄຊໃຫ້ພອນເຖິງຜູ້ນຳພັກ – ລັດ ໂດຍສະເພາະແມ່ນຜູ້ນຳຂອງກະຊວງປ້ອງກັນປະເທດ, ບັນດານາຍ ແລະ ພົນທະຫານ ທີ່ຍັງເຮັດວຽກຢູ່ໃນຂອບເຂດທີ່ຫຍຸ້ງຍາກທຸລະກັນດານທຸກຄົນ ຂໍໃຫ້ມີສຸຂະພາບແຂງແຮງ, ມີອາຍຸໝັ້ນຂວັນຍືນເພື່ອຊີ້ນຳ – ນຳພາປະເທດຊາດຂອງພວກເຮົາໃຫ້ມີຄວາມພັດທະນາ ແລະ ກ້າວໜ້າຂຶ້ຶ້ນໄປເລື້ອຍໆ.

%d bloggers like this: