ມີຄວາມສຸກກັບການເຮັດວຽກທຸກວັນຍ້ອນເດີນຕາມຮອຍແມ່

ຜູ້ປະສົບຄວາມສຳເລັດ ໂດຍສ່ວນໃຫຍ່ຈະຮູ້ຈັກຕົນເອງດີວ່າຕົນເອງຕ້ອງການເຮັດຫຍັງຕັ້ງແຕ່ສະໄໝຕອນຮຽນ ຫຼື ໄວກຳລັງສຶກສາຢູ່ແລ້ວ ຈະພະຍາຍາມເລັ່ງເປົ້າໄປທີ່ຈຸດທີ່ຕົນເອງມັກໃນອາຊີບນັ້ນ ໃຜຈະໄປຮູ້ວ່າ ຮ້ານຄຳ ສີດາ     ລາດຊະວົງ ຈາກແຕ່ກ່ອນເປັນຮ້ານຂາຍຄຳທີ່ບໍ່ຄ່ອຍຈະມີຊື່ສຽງໃນວົງການຮ້ານຂາຍຄຳ ປັດຈຸບັນດ້ວຍຄຸນນະພາບຂອງສິນຄ້າ, ການອອກແບບທີ່ທັນສະໄໝ ແລະ ການບໍລິການທີ່ດີ ຄົງຈະບໍ່ມີໃຜທີ່ບໍ່ຮູ້ຈັກ ຮ້ານຄຳ ສີດາ. ໃນເວລານີ້, ທຸກຄວາມສຳເລັດຕ້ອງເກີດມາຈາກດ້ານໃນຈິດໃຈ, ພຽນພະຍາຍາມ, ໝັ່ນຮຽນຮູ້ ແລະ ລົງມືປະຕິບັດຕົວຈິງ.

ສະບັບນີ້ເຮົາຈະພາໄປຮູ້ຈັກກັບເຈົ້າຂອງທຸລະກິດ ຮ້ານຄຳ ສີດາ ລາດຊະວົງ ຕັ້ງຢູ່ຕະຫຼາດເຊົ້າມໍ ຊັ້ນ 2 ປັດຈຸບັນກຳລັງມີແຜນຈະຂະຫຍາຍສາຂາຕື່ມອີກ 2 ແຫ່ງໃນໄວໆນີ້ ເພື່ອໃຫ້ລູກຄ້າສາມາດເຂົ້າຫາສະດວກສະບາຍຂຶ້ນ, ຮ້ານຄຳ  ສີດາ ລາດຊະວົງ ບໍ່ໄດ້ຕ້ອງການແຂ່ງຂັນກັບຮ້ານໃດ ແຕ່ຕ້ອງຍົກລະດັບຕົນເອງຂຶ້ນມາເພື່ອຄວາມຢູ່ໄດ້ຂອງກິດຈະການ, ສ້າງຫຼາຍທາງເລືອກໃຫ້ກັບລູກຄ້າໃຫ້ທັນຍຸກທັນສະໄໝ.

ທ່ານ ນາງ ວຽງສອນ ທິບຸນມາ ຜູ້ບໍລິຫານຮ້ານຄຳ ສີດາ ລາດຊະວົງ ກ່າວວ່າ: ຮ້ານຄຳ ສີດາ ລາດຊະວົງ ເປັນທຸລະກິດຂອງແມ່ທີ່ດຳເນີນມາດົນນານພໍສົມຄວນ ໂດຍມີພໍ່ເປັນພະນັກງານສັງກັດຂອງລັດ ຫາກຢ້ອນກັບໄປສະໄໝມີອາຍຸໄດ້ 10 ກວ່າປີ ຕົນເອງກໍໄດ້ມາຊ່ວຍແມ່ຂາຍເປັນປະຈຳໃນເວລາຫຼັງເລີກຮຽນ ແລະ ວັນພັກ ພໍໄລຍະຮຽນຢູ່ມັດທະຍົມຕອນຕົ້ນກໍຮູ້ສຶກວ່າຕົນເອງມັກອາຊີບຄ້າຂາຍຢ່າງເຕັມຕົວ ກໍຄືຄິດຈະເດີນຕາມຮອຍແມ່ເປີດຮ້ານຂາຍຄຳ ແຕ່ດ້ວຍຄວາມແນມບໍ່ເຫັນອະນາຄົດ ແລະ ປ້ອງກັນຄວາມສ່ຽງຈົບມັດທະຍົມປາຍກໍເຂົ້າສຶກສາຂະແໜງຄົມມະນາຄົມ ແລະ ມະນຸດສາດ ຢູ່ບ້ານເຮົາໃນລະດັບປະລິນຍາຕີ ແຕ່ກໍເລືອກທີ່ຈະເຮັດທຸລະກິດສ່ວນຕົວຕັ້ງແຕ່ຕົ້ນ. ຈາກນັ້ນ, ກໍເລີຍໄດ້ປຶກສາເລື່ອງທຸລະກິດກັບຄູ່ຊີວິດ ຈຶ່ງເລືອກທຸລະກິດກໍ່ສ້າງຕາມທີ່ຫົວໜ້າຄອບຄົວມັກ ແລະ ໄດ້ສຶກສາມາປາກົດວ່າ ທຸລະກິດເດີນໜ້າໄດ້ດີ ແຕ່ເພື່ອກະຈາຍ ຄວາມສ່ຽງນັກສຶກສາທີ່ມີ 2 ໃບປະກາດໃນເວລານັ້ນບວກກັບຄວາມຕັ້ງໃຈຂອງຕົນເອງແຕ່ຕົ້ນຢູ່ແລ້ວ ຈຶ່ງໄດ້ເຂົ້າມາຊ່ວຍເປັນຜູ້ບໍລິຫານໃນຮ້ານຂອງແມ່ຢ່າງເຕັມທີ່ເມື່ອປີ 2007.

 

ດ້ວຍຄວາມທີ່ມັກ ແລະ ລຶ້ງເຄີຍກັບອາຊີບນີ້ຢູ່ແລ້ວຈຶ່ງໄດ້ມີຄວາມພະຍາຍາມສຶກສາຕະຫຼາດ, ຄິດຄົ້ນລາຍມາໃໝ່ຢູ່ຕະຫຼອດຕາມນິດໄສຂອງຮ້ານຂາຍຄຳແຕ່ລະຮ້ານທີ່ຕ້ອງໄດ້ຄິດ, ຮຽນຮູ້ໃນການໄຈ້ແຍກຄຸນນະພາບສິນຄ້າທຸກຢ່າງຈົນເຂົ້າໃຈລະອຽດ ຈຶ່ງມາລົງເລິກຂອງການຕະຫຼາດ ແລະ ການຂາຍທ່າມກາງການຂະຫຍາຍຕົວຂອງກິດຈະການຮ້ານຂາຍຄຳທີ່ນັບມື້ເພີ່ມຂຶ້ນ ຈຶ່ງສະຫຼຸບໄດ້ວ່າ ຮ້ານຂອງເຮົາຕ້ອງແມ່ນຄຳ 99,99% ຊື້ງ່າຍ – ຂາຍສະດວກສະບາຍ, ທ້າຍປີກໍມີກິດຈະກຳແຈກຄືນກຳໄລໃຫ້ລູກຄ້າ, ດ້ວຍການບໍລິການແບບເປັນກັນເອງທີ່ມີເຈົ້າຂອງຮ້ານມາບໍລິການຢູ່ຮ້ານທຸກວັນ ເຮັດໃຫ້ລູກຄ້າເກີດມີຄວາມເຊື່ອໝັ້ນ, ຮັກແພງ ລູກຄ້າທີ່ເຫັນກັນມາຫຼາຍປີກໍປຽບເໝືອນກັບເປັນອ້າຍ, ນ້ອງ, ໝູ່, ຄູ່, ພໍ່, ແມ່ຮັກແພງ ມີລູກຄ້າຢູ່ເໜືອສຸດ ແລະ ໃຕ້ສຸດຂອງລາວຂຶ້ນເຮືອ, ນັ່ງລົດ, ຂີ່ຍົນມາຊື້ຄຳຈາກຮ້ານເຮົາໄປໄວ້ເປັນຊັບສິນ.

ດ້ວຍການບໍລິການທີ່ຮູ້ສຶກໄດ້ເຖິງ ຄວາມອົບອຸ່ນ ແລະ ເຊື່ອໝັ້ນເຮັດໃຫ້ຮ້ານຄຳ ສີດາ ລາດຊະວົງ ເປັນທີ່ຮູ້ຈັກສັງຄົມໃນວົງກວ້າງຕາມເພຈ໌ຂອງຮ້ານທີ່ມີຊື່ວ່າ ຮ້ານຄຳ ສີດາ ລາດຊະວົງ ລູກຄ້າສາມາດຊື້ເປັນເງິນສົດ, ເງິນຜ່ອນ ມີໃຫ້ເລືອກຫຼາຍຮູບແບບ ເຊັ່ນ: ແບບທຳມະດາ, ອອກງານ ຫຼື ຕາມລູກຄ້າສັ່ງ, ທຸລະກິດທຸກຢ່າງຈະຢູ່ໄດ້ກໍຍ້ອນລູກຄ້າ, ລູກຄ້າຄືເສັ້ນເລືອດ  ໃຫຍ່ທີ່ຫຼໍ່ລ້ຽງຮ່າງກາຍໃຫ້ເຮົາຢູ່ລອດໄດ້ ຂໍຂອບໃຈລູກຄ້າເກົ່າທີ່ໃຫ້ຄວາມເຊື່ອໝັ້ນ ແລະ ທ່ານໃດທີ່ກຳລັງຢາກໄດ້ຄຳໄວ້ເປັນຂອງໝັ້ນ, ຂອງຂວັນ ແລະ ຄອບຄົວກໍມາລອງໃຊ້ບໍລິການໄດ້, ຫາກລູກຄ້າທ່ານໃດຕ້ອງການຕິຊົມກໍສາມາດເຂົ້າໄປສະແດງຄວາມຄິດເຫັນໄດ້ເພື່ອຈະໄດ້ປັບປຸງໃຫ້ດີຂຶ້ນ.

( ໂດຍ: ສຸລິນ, ຮູບ: ວຽງຈັນທາມ )

 

%d bloggers like this: