ຂ່າວດີຕ້ອນຮັບ 2019 ນາຍທະຫານໄດ້ຮັບການເລື່ອນຊັ້ນຫຼາຍຕຳແໜ່ງ

ນັບວ່າເປັນຂ່າວດີເລີ່ມຕົ້ນປີ 2019 ເລີຍກໍ່ວ່າໄດ້ ເນື່ອງຈາກມີຫຼາຍໆເຫດການເກີດຂຶ້ນ ທີ່ສົ່ງຜົນດີໂດຍທາງກົງ ແລະ ທາງອ້ອມ ໂດຍສະເພາະແມ່ນບັນດາອ້າຍນ້ອງທະຫານ, ຕຳຫຼວດເກືອບທົ່ວປະເທດທີ່ໄດ້ຮັບການເລື່ອນຊັ້ນ ທັງນີ້, ເພື່ອເປັນການຊົມເຊີຍຜົນງານຂອງບັນດາອ້າຍນ້ອງໃນການປະກອບສ່ວນກຳລັງກາຍ, ກຳລັງໃຈເຂົ້າໃນການສ້າງສາ ແລະ ພັດທະນາປະເທດຊາດໃຫ້ຈະເລີນຮຸ່ງເຮືອງ ແລະ ເຂັ້ມແຂງຍິ່ງຂຶ້ນ.

 

ພາບປະກອບຂ່າວ (ບໍ່ມີສ່ວນກ່ຽວຂ້ອງກັບເນື້ອໃນ)

ຫຼ້າສຸດ ໃນວັນທີ 11 ມັງກອນ 2019 ຜ່ານມາ ທີ່ຫ້ອງວ່າການ ກະຊວງປ້ອງກັນປະເທດ ໄດ້ຈັດພິທີປະກາດເລື່ອນຊັ້ນໃຫ້ນາຍທະຫານຂັ້ນສູງທົ່ວກອງທັບ ໃນນັ້ນ ໄດ້ເລື່ອນຊັ້ນຈາກພົນຈັດຕະວາ ຂຶ້ນເປັນພົນຕີ ຈໍານວນ 4 ສະຫາຍ, ຈາກພັນເອກ ຂຶ້ນເປັນພົນຈັດຕະວາ ຈໍານວນ 12 ສະຫາຍ ແລະ ຈາກ ພັນໂທ ຂຶ້ນເປັນພັນເອກ ຈໍານວນ 45 ສະຫາຍ ໂດຍການເປັນປະທານຂອງ ທ່ານ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ, ມີບັນດາການນຳກະຊວງປ້ອງກັນປະເທດ, ຕາງໜ້າຄະນະຈັດຕັ້ງສູນກາງພັກ ຂອງພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

 

ພາບປະກອບຂ່າວ (ບໍ່ມີສ່ວນກ່ຽວຂ້ອງກັບເນື້ອໃນ)

 

ທ່ານ ພົນຈັດຕະວາ ວົງສອນ ອິນປານພິມ ກຳມະການຄະນະພັກກະຊວງ, ຮອງຫົວໜ້າກົມໃຫຍ່ການເມືອງກອງທັບ ໄດ້ຂຶ້ນຜ່ານລັດຖະດຳລັດຂອງປະທານປະເທດ ວ່າດ້ວຍການເລື່ອນຊັ້ນນາຍທະຫານຈາກພົນຈັດຕະວາຂຶ້ນເປັນພົນຕີ ແລະ ຈາກພັນເອກຂຶ້ນເປັນ ພົນຈັດຕະວາ ແລະ ດຳລັດຂອງນາຍົກລັດຖະມົນຕີ ວ່າດ້ວຍການເລື່ອນຊັ້ນໃຫ້ນາຍທະຫານ ຈາກ ພັນໂທຂຶ້ນເປັນພັນເອກ ຕາມຄວາມຮຽກຮ້ອງຕ້ອງການຂອງໜ້າທີ່ວຽກງານ ແລະ ອີງຕາມກົດໝາຍ ວ່າດ້ວຍນາຍທະຫານກອງທັບ ປະຊາຊົນລາວ.

 

ພາບປະກອບຂ່າວ (ບໍ່ມີສ່ວນກ່ຽວຂ້ອງກັບເນື້ອໃນ)

 

ໃນນັ້ນ ໄດ້ຮັບການເລື່ອນຊັ້ນຂຶ້ນເປັນພົນຕີມີ: ພົນຈັດຕະວາ ປະສິດ ທ່ຽງທໍາ ຮອງຫົວໜ້າກົມໃຫຍ່ເສນາທິການກອງທັບ, ພົນຈັດຕະວາ ວັນທອງ ກອງມະນີ ຮອງຫົວໜ້າກົມໃຫຍ່ການເມືອງ ກອງທັບ, ພົນຈັດຕະວາ ຄໍາຫຼ້າ ພັນໄຊຍະສຸກ ຫົວໜ້າການເມືອງວິທະຍາຄານປ້ອງກັນຊາດໄກສອນ ພົມວິຫານ ແລະ ພົນຈັດຕະວາ ກິລະກອນ ບຸນນະຜົນ ຫົວໜ້າກົມໃຫຍ່ເຕັກນິກກອງທັບ.

 

ພາບປະກອບຂ່າວ (ບໍ່ມີສ່ວນກ່ຽວຂ້ອງກັບເນື້ອໃນ)

 

ຮັບການເລື່ອນຊັ້ນຂຶ້ນເປັນພົນຈັດຕະວາມີ: ພັນເອກ ແກ້ວສຸວັນ ອິນທະວົງສາ ຫົວໜ້າການທະຫານ ວິທະຍາຄານປ້ອງກັນຊາດ ໄກສອນ ພົມວິຫານ (ວປກ); ພັນເອກ ຄໍາໝັ້ນ ວັນນະວົງ ຫົວໜ້າການເມືອງກອງບັນຊາການທະຫານ ແຂວງໄຊຍະບູລີ; ພັນເອກ ຈະເລີນ ວົງວິໄຊ ຫົວໜ້າການເມືອງ ກອງບັນຊາການທະຫານແຂວງ ສະຫວັນນະເຂດພັນເອກ ແສງຍືນ ລັດສະໝີ ຫົວໜ້າການເມືອງກອງພົນທີ 1; ພັນເອກ ບຸນແຍງ ວິໄລສົມ ຫົວໜ້າກົມອຸປະໂພກ-ບໍລິໂພກ ກົມໃຫຍ່ພະລາທິການກອງທັບ; ພັນເອກ ຄໍາຄິດ ໄຊສົງຄາມ ຫົວໜ້າກົມສື່ສານກົມໃຫຍ່ເສນາທິການກອງທັບ; ພັນເອກ ອຸລະຫາ ທອງວັນທາ ຫົວໜ້າອໍານວຍການບໍລິສັດສະຕາຣ໌ໂທລະຄົມ.

 

ພາບປະກອບຂ່າວ (ບໍ່ມີສ່ວນກ່ຽວຂ້ອງກັບເນື້ອໃນ)

ພັນເອກ ບຸນມາ ຈັນທະວົງສາ ຫົວໜ້າອໍານວຍການບໍລິສັດລາວ ເດີນອາກາດ; ພັນເອກ ສາຍໃຈ ກົມມະສິດ ຫົວໜ້າການທະຫານກອງພົນທີ 1; ພັນເອກ ບຸນທອນ ສິດສຸວົງ ຮອງຫົວໜ້າາຫ້ອງວ່າການກະຊວງປ້ອງກັນປະເທດ; ພັນເອກ ພູມີ ດາລາເພັດ ຮອງຫົວໜ້າກົມພະນັກງານກົມໃຫຍ່ການເມືອງກອງທັບ; ພັນເອກ ບຸນເດື່ອງ ພັນສົດໃສ ຮອງຫົວໜ້າຫ້ອງການຄະນະກຳມະການ ປກສ-ປກຊ ສູນກາງ ແລະ ມີນາຍທະຫານໄດ້ຮັບເລື່ອນຊັ້ນຂຶ້ນເປັນພັນເອກຈາກກໍາລັງຫຼວງ ແລະ ກໍາລັງທ້ອງຖິ່ນທົ່ວກອງທັບ ຈຳນວນ 45 ສະຫາຍ.

 

ພາບປະກອບຂ່າວ (ບໍ່ມີສ່ວນກ່ຽວຂ້ອງກັບເນື້ອໃນ)

ໂອກາດນີ້ ທ່ານ ພົນເອກ ຈັນສະຫມອນ ຈັນຍາລາດ ກໍ່ໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳ ຫຼາຍບັນຫາສຳຄັນຕໍ່ນາຍທະຫານຂັ້ນສູງທີ່ໄດ້ຮັບການເລື່ອນຊັ້ນໃໝ່ໃນຄັ້ງນີ້ ໂດຍໄດ້ເນັ້ນໜັກໃຫ້ນາຍທະຫານຂັ້ນສູງ ແຕ່ລະສະຫາຍສືບຕໍ່ເຝິກຝົນຫຼໍ່ຫຼອມຕົນເອງໃນຮອບດ້ານ, ພ້ອມກັນຍົກສູງຄວາມຮັບຜິດຊອບຕໍ່ໜ້າທີ່ ການເມືອງຂອງຕົນໃຫ້ສູງກວ່າເກົ່າ, ເປັນຫຼັກແຫຼ່ງໃນການເຕົ້າໂຮມຄວາມສາມັກຄີພາຍໃນໃຫ້ແໜ້ນແຟ້ນ, ປັບປຸງແບບແຜນວິທີເຮັດວຽກໃຫ້ມີວິທະຍາສາດ ບົນພື້ນຖານປະຕິບັດຕາມຫຼັກການລວມສູນປະຊາທິປະໄຕ ເຮັດວຽກເປັນໝູ່ຄະນະ, ແບ່ງໃຫ້ບຸກຄົນຮົບຜິດຊອບ ພ້ອມກັນກໍ່ສ້າງກອງທັບກ້າວຂຶ້ນ ເປັນກອງທັບປະຕິວັດມີແບບແຜນ ແລະ ທັນສະໄໝ.

 

ພາບປະກອບຂ່າວ (ບໍ່ມີສ່ວນກ່ຽວຂ້ອງກັບເນື້ອໃນ)

 

ຂອບໃຈຂໍ້ມູນຈາກ: Lao people’s Army News

%d bloggers like this: