ຊ້ອມໃຫຍ່ກຽມສະຫຼອງວັນສ້າງຕັ້ງກອງທັບຄົບຮອບ 70 ປີ ໃນວັນທີ 20 ມັງກອນ

ກອງທັບປະຊາຊົນລາວທີ່ໄດ້ຮັບການສ້າງຕັ້ງຂຶ້ນໃນວັນທີ 20 ມັງກອນ ປີ 1949 ມາຮອດປີນີ້ 2019 ແມ່ນຄົບຮອບ 70 ປີພໍດີ. ເພື່ອລະນຶກເຖິງປະຫວັດສາດ, ຜົນງານ ແລະ ຄຸນງາມຄວາມດີຂອງກອງທັບປະຊາຊົນລາວ ທີ່ໄດ້ເປັນກອງກຳລັງຫຼັກຂັບໄລ່ສັດຕູຜູ້ບໍ່ຫວັງດີຕໍ່ຊາດ ແລະ ປະຊາຊົນໃນແຕ່ລະໄລຍະ ຈິ່ງຈະໄດ້ຈັດພິທີສະເຫຼີມສະຫຼອງໃຫຍ່ຂຶ້ນໃນວັນທີ 20 ມັງກອນ 2019.

 

 

 

ມາໃນວັນທີ 14 ມັງກອນ 2019 ນີ້ ຈິ່ງໄດ້ຈັດພິທີຊ້ອມໃຫຍ່ ສວນສະໜາມບັນດາກ້ອນກຳລັງ ຂຶ້ນ ທີ່ວິທະຍາຄານກົມມະດຳ ເມືອງ ໂພນໂຮງ ແຂວງວຽງຈັນ ໂດຍການເຂົ້າຮ່ວມຂອງ ທ່ານ ພັນຄຳ ວິພາວັນ ຮອງປະທານປະເທດແຫ່ງ ສປປ ລາວ, ທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີ ກະຊວງປ້ອງກັນປະເທດ ມີບັນດາການນຳພັກ-ລັດ, ພ້ອມດ້ວຍມວນຊົນອ້ອມຂ້າງເຂົ້າຮ່ວມຢ່າງຫຼວງຫຼາຍ.

 

 

ສຳລັບພິທີຊ້ອມໃຫຍ່ໃນວັນທີ 14 ມັງກອນນີ້ ເລີ່ມຕົ້ນດ້ວຍການສະແດງສິລະປະການຮ້ອງເພງປະສົມຟ້ອນ, ການສະແດງມວຍຕໍ່ສູ້ຂອງເຫຼົ່າທະຫານ ຕາມມາດ້ວຍກ້ອນກຳລັງສວນສະໜາມທີ່ປະກອບມີຫຼາຍພາກສ່ວນໃນກຳລັງປະກອບອາວຸດເຊັ່ນ: ກ້ອນທຸງໄຊ ກອງທັບປະຊາຊົນລາວ, ກ້ອນພາຫະນະເຫຼົ່າລົບປືນໃຫຍ່ໜ້າດິນ, ກອງພັນໃຫຍ່ 703, ກ້ອນກໍາລັງທະຫານທ້ອງຖິ່ນ.

 

 

ກ້ອນເຫຼົ່າຮົບເສນາຮັກ, ກ້ອນເຫຼົ່າຮົບສື່ສານ, ກ້ອນເຫຼົ່າຮົບປ້ອງກັນອາກາດ, ກ້ອນເຫຼົ່າຮົບລົດຕັງ-ຍານເກາະ, ກ້ອນເຫຼົ່າຮົບຊ່າງແສງ, ກ້ອນກຳລັງທະຫານຊາຍແດນ, ກ້ອນທະຫານຮາບ, ກ້ອນນາຍທະຫານອາກາດ, ກ້ອນນາຍທະຫານບົກ, ກ້ອນກອງຮ້ອຍກຳລັງໄຟເພດຍິງ, ກ້ອນກອງທັບປົດປ່ອຍປະຊາຊົນລາວ, ກ້ອນນາຍທະຫານ ກອງທັບອິດສະຫຼະ, ສະຫະພັນນັກຮົບເກົ່າແຫ່ງຊາດ, ກ້ອນກຳລັງປ້ອງກັນຕົວ, ກ້ອງກຳລັງກອງຫຼອນ.

 

ນອກນັ້ນ, ຍັງມີກ້ອນກຳລັງອື່ນໆທີ່ໄດ້ເດີນສວນສະໜາມຕໍ່ໜ້າການນຳ ແລະ ມວນຊົນຢ່າງເຄັ່ງຂືມ ແລະ ສະຫງ່າງາມ ອັນສໍາຄັນແມ່ນສະແດງເຖິງນ້ຳໃຈພິລະອາດຫານຂອງກຳລັງທະຫານລາວ ທີ່ຍາມໃດກໍ່ຢືນຢູ່ຄຽງຂ້າງປ້ອງກັນສະຫງົບປອດໄພໃຫ້ແກ່ປະເທດຊາດ ແລະ ປະຊາຊົນບໍ່ວ່າຈະເປັນຍາມສົງຄາມ ຫຼື ສັນຕິພາບ.

 

%d bloggers like this: