ປີ 2018 ນັກເດີນທາງທ່ອງທ່ຽວ ເນປານ ທະລຸ 1 ລ້ານຄົນຄັ້ງທໍາອິດ

ປີ 2018 ຖືເປັນປີທີ່ພິເສດສໍາລັບ ເນປານ ເນື່ອງຈາກມີຜູ້ຄົນມາທ່ອງທ່ຽວທະລຸ 1 ລ້ານຄົນ ເປັນຄັ້ງທໍາອິດ.

ອົງການທ່ອງທ່ຽວແຫ່ງຊາດ ເນປານ ລາຍງານວ່າ: ປີ 2018 ປະເທດເນປານ ມີນັກທ່ອງທ່ຽວເຂົ້າໄປທ່ຽວເຖິງ 1 ລ້ານຄົນ ເປັນຄັ້ງທໍາອິດ ອັນເປັນຜົນມາຈາກການທີ່ຄົນອິນເດຍ, ຈີນ, ອາເມຣິກາ, ສີລັງກາ ແລະ ອັງກິດ ເດີນທາງໄປທ່ອງທ່ຽວ ເນປານ ເພີ່ມຫຼາຍຂຶ້ນ ໂດຍຈໍານວນຕົວເລກນັກທ່ອງທ່ຽວທີ່ໄປທ່ຽວ ເນປານ ປີ 2018 ຢູ່ທີ່ 1.173.072 ຄົນ ເພີ່ມຂຶ້ນຈາກປີ 2017 ເຖິງເກືອບ 25%.

ທ່ານ ຣາບິນທຣາ ອາດິຄາຣີ ລັດຖະມົນຕີວ່າການກະຊວງທ່ອງທ່ຽວ ເນປານ ກ່າວວ່າ: ຈໍານວນນັກທ່ອງທ່ຽວທີ່ທະລຸ 1 ລ້ານຄົນ ຖືເປັນເລື່ອງທີ່ພິເສດ.

ທັງນີ້, ການທ່ອງທ່ຽວ ເນປານ ຖືເປັນລາຍຮັບສໍາຄັນຂອງປະເທດທີ່ຖືວ່າທຸກຍາກແຫ່ງໜຶ່ງຂອງໂລກ ເຊິ່ງຕັ້ງຢູ່ລະດັບຄວາມສູງກວ່າ 8 ພັນແມັດ ເຖິງ 8 ຈຸດ ຈາກທີ່ທົ່ວໂລກມີທັງໝົດ 14 ຈຸດ.

ຂະນະທີ່ການທ່ອງທ່ຽວ ເນປານ ເກີດບັນຫາຫຼັງຈາກເກີດແຜ່ນດິນໄຫວຮ້າຍແຮງໃນປີ 2015 ທີ່ເຮັດໃຫ້ມີຜູ້ເສຍຊີວິດເຖິງເກືອບ 9 ພັນຄົນ ແລະ ທໍາລາຍສະຖານທີ່ເປັນມໍລະດົກໂລກຫຼາຍແຫ່ງ.

%d bloggers like this: