ຜັກພື້ນບ້ານແຄມຮົ້ວ ແຕ່ມີຄຸນປະໂຫຍດຫຼາກຫຼາຍ ປ້ອງກັນ-ປິ່ນປົວໄດ້ສາລະພັດໂຣກ

ກະຖິນ ເປັນຜັກພື້ນບ້ານທີ່ເຮົາເຫັນໄດ້ທົ່ວໄປ ແລະ ຮູ້ຈັກກັນດີຢູ່ແລ້ວ ເຊິ່ງເປັນພືດທີ່ປູກງ່າຍ ແລະ ຍັງສາມາດນຳມາປະກອບກັບອາຫານໄດ້ອີກ. ແນ່ນອນວ່າຫຼາຍຄົນຄືຊິຮູ້ມາກ່ອນວ່າ ກະຖິນນອກຈາກຈະນຳໄປຮັບປະທານອາຫານແລ້ວ ຍັງມີຄຸນປະໂຫຍດອີກຫຼາກຫຼາຍຢ່າງທີ່ເຮົາສາມາດນໍາເອົາຍອດ, ດອກ ແລະ ໝາກ ມາກິນເປັນອາຫານ.

 

ຕົ້ນກະຖິນແບ່ງອອກເປັນສອງປະເພດຄື:

  1. ຕົ້ນກະຖິນໃຫຍ່: ລັກສະນະຕົ້ນກະຖິນໃຫຍ່ ຈະມີຮູບແບບຕາມຊື່ ເພາະຈະມີຂະໜາດລໍາຕົ້ນທີ່ສູງໃຫຍ່ ແລະ ສາມາດທີ່ຈະເຕີບໃຫຍ່ໄດ້ຢ່າງໄວວາ ໂດຍມີສາຍພັນມາຈາກປະເທດຊາວາດອນ ແລະ ເປຣູ.
  2. ຕົ້ນກະຖິນພື້ນເມືອງ: ກະຖິນນີ້ ເປັນສາຍພັນຂອງປະເທດຮາວາຍ ເຊິ່ງຈະມີຂະໜາດລໍາຕົ້ນທີ່ນ້ອຍກວ່າຖະຖິ່ນໃຫຍ່ພໍສົມຄວນ ການຈະເລີນເຕີບໂຕນັ້ນກໍສາມາດຈະເລີນເຕີບໂຕໄດ້ຢ່າງໄວວາ ແລະ ສ່ວນຫຼາຍກໍ່ແມ່ນກະຖິ່ນທີ່ປະເທດລາວນິຍົມປູກ.

ກະຖິນ ມີຄຸນປະໂຫຍດຫຼາຍຢ່າງ:

  • ໃຊ້ເປັນຢາ: ຄົນສະໄໝກ່ອນໃຫ້ຄວາມສຳຄັນຫຼາຍ ເພາະມີສັບພະຄຸນເປັນຢາ ໂດຍສາມາດນຳໃຊ້ປິ່ນປົວໂລກຕ່າງໆ ໃຊ້ໃນການບຳລຸງດູແລຜິວ ໂດຍນຳເອົາໃບຂອງຕົ້ນກະຖິນມາໃຊ້ ເຊິ່ງຈະຊ່ວຍເສີມສ້າງຄອລລາເຈນເຮັດໃຫ້ຜິວເຮົາງາມ ແລະ ມີສຸຂະພາບດີ. ນອກຈາກນີ້ ຍັງສາມາດຫຼຸດອາການອັກເສບ ຫຼື ເຈັບປວດທີ່ຂື້ນເກີດ ລວມເຖິງແກ່ນໝາກກະຖິນຍັງສາມາດຕ້ານອະນຸມູນອິດສະຫຼະທີ່ຈະຊ່ວຍໃຫ້ປ້ອງກັນມະເຮັງໄດ້.
  • ໃຊ້ເປັນອາຫານສັດ ສຳລັບຕົ້ນກະຖິນນັ້ນຈະໃຊ້ໃນສ່ວນຂອງຍອດ, ໝາກ ແລະ ໃບ ນຳມາເຮັດອາຫານສັດໃຫ້ງົວ, ໄກ່ ແລະ ອື່ນໆ.
  • ໃຊ້ເພື່ອກະສິກຳ ກະຖິນ ຖືວ່າເປັນຕົ້ນໄມ້ທີ່ອຸດົມໄປດ້ວຍປະໂຫຍດໃນດ້ານກະສິກຳ ເພາະ ສາມາດນຳມາເປັນປຸ໋ຍໝັກໃຫ້ກັບຕົ້ນໄມ້ໄດ້ ເນື່ອງຈາກພາຍໃນລຳຕົ້ນນັ້ນຈະມີ ໄນໂຕຣເຈນ ແລະ ໂພແທສຊຽມ ສ່ວນລຳຕົ້ນຍັງໃຊ້ໄປປະກອບໃນດ້ານກະສິກຳຕ່າງໆໄດ້.

 

  • ປູກເປັນຮົ້ວກັນລົມຮອບບ້ານ ຕົ້ນກະຖິນສາມາດທີ່ຈະນຳມາໃຊ້ປູກເປັນຮົ້ວເຮືອນໄດ້ ໂດຍສະເພາະຕົ້ນກະຖິນໃຫຍ່ ເຊິ່ງຈະມີຂະໜາດລຳຕົ້ນໃຫຍ່ພໍສົມຄວນ. ດັ່ງນັ້ນຫາກນຳມາປູກເປັນຮົ້ວເຮືອນ ກໍຈະຊ່ວຍກັນລົມໃຫ້ເຮືອນເປັນຢ່າງດີ ແລະ ບໍ່ຈຳເປັນຈະຕ້ອງຮັກສາຫຼາຍຢ່າງ ເພາະຕົ້ນກະຖິນສາມາດເຕີບໃຫຍ່ໄດ້ຕາມທຳມະຊາດ.
  • ປະໂຫຍດໃນການໃຊ້ງານດ້ານອື່ນໆ ໄດ້ແກ່: ນຳເອົາເປືອກແຫ້ງຂອງຕົ້ນກະຖິນມາໃຊ້ຍ້ອມສີເສັ້ນໄໝ, ນຳເອົາເປືອກກະຖິນເຮັດໃຫ້ເກີດເປັນເສັ້ນໄຍແລ້ວນຳເຮັດເປັນແຜ່ນເຈ້ຍໄດ້ ສ່ວນແກ່ນກະຖິນກໍມີປະໂຫຍດເຊັ່ນດຽວກັນ ເພາະສາມາດນຳເອົາແກ່ນມາເຮັດເປັນເຄື່ອງປະດັບ ສາຍຄໍ ແລະ ສາຍແອວໄດ້.

 

ນອກຈາກປະໂຫຍດທີ່ກ່າວມາຂ້າງເທິງນີ້ແລ້ວ ກະຖິນຍັງມາໃຊ້ເພື່ອຮັກສາສຸຂະພາບ ເຊັ່ນ:

  • ຮັກສາໂຣກເບົາຫວານ: ແກ່ນໝາກກະຖິນສາມາດນຳມາຕົ້ມເປັນຊາເພື່ອໃຊ້ໃນການປິ່ນປົວ ແລະ ຄວບຄຸມໂຣກເບົາຫວານໄດ້ ແຕ່ຄວນໃຊ້ແກ່ນກະຖິນແກ່ ແລະ ຜ່ານການຕາກແຫ້ງມາແລ້ວເທົ່ານັ້ນ ຫຼັງຈາກນັ້ນນຳມາບົດ ແລະ ປະສົມນໍ້າ ແລ້ວດື່ມມື້ລະ 1​ ຈອກ ເປັນປະຈຳທຸກມື້.
  • ຮັກສາອາການອັກເສບຂອງໄຕ: ນຳເອົາແກ່ນກະຖິນໃນການຮັກສາ ໂດຍນຳໃຊ້ 3-5 ເມັດ ໃສ່ລົງໄປໃນຖ້ວຍນໍ້າຮ້ອນຕືກັບການແຊ່ຊາ ແຕ່ຈະຕ້ອງຖ້າໃຫ້ອຸ່ນກ່ອນຈຶ່ງຈະດື່ມໄດ້ ໂດຍຄວນດຶ່ມມື້ລະ 3 ຄັ້ງ.
  • ຂ້າແມ່ທ້ອງ: ກະຖິນໄດ້ຮັບຄວາມນິຍົມຫຼາຍໃນການນຳມາໃຊ້ເປັນຢາຂ້າແມ່ທ້ອງ ໂດຍຈະໃຊ້ແກ່ນກະຖິນແກ່ ແລະ ແຫ້ງ ຈາກນັ້ນນຳມາບົດໃຫ້ໄດ້ປະລິມານ 6 ກລາມ ແລ້ວນຳມາປະສົມກັບນໍ້າ 100cc ແລ້ວດື່ມກ່ອນນອນ.
  • ຮັກສາອາການນອນບໍ່ຫຼັບ: ນຳໃຊ້ທັງແກ່ນ ແລະ ໃບ ຂອງກະຖິນມາຕົ້ມກັບນໍ້າ ແລ້ວຄ້ຽວໃຫ້ເຂົ້າກັນ ຫຼັງຈາກນັ້ນໃຫ້ນຳມາດື່ມປະມານ 3 ມື້ ກໍ່ຈະຊ່ວຍໃຫ້ເຮົານອນຫຼັບງ່າຍຂື້ນ.

 

ນອກຈາກມີປະໂຫຍດແລ້ວ ເຮົາຄວນລະວັງຫຼາຍຢ່າງເຊັ່ນ: ກະຖິນສາມາດດູດຊືມ ຊິລິນຽມ ຈາກດິນ ມາສະສົມໄວ້ໃນປະລິມານຫຼາຍ ເມື່ອເຮົາກິນໝາກກະຖິນເຂົ້າໄປຫຼາຍໆ ຫຼື ກິນເປັນປະຈຳ ທາດດັ່ງກ່າວກໍ່ອາດຈະເກີດພິດຂື້ນໃນຮ່າງກາຍໄດ້ ເຖິງແມ່ນວ່າມັນຈະມີປະໂຫຍດ ແຕ່ກໍ່ຄວນລະມັດລະວັງໃນການກິນໃບກະຖິນ ພໍສົມຄວນ. ເພາະໃນສ່ວນໃບຂອງກະຖິນນັ້ນສາມາດສັງເຄາະສານ ມິໂມຊິນ ເຊິ່ງເປັນສານພິດອອກມາ ແລະ ເມື່ອໄດ້ຮັບພິດກໍ່ຈະເຮັດໃຫ້ເກີດອາການເບື່ອອາຫານ, ຕ່ອມໄທລອຍໃຫຍ່ມີອາການທາງປະສາດ ແຕ່ສາມາດຫຼຸດສານເຫຼົ່ານີ້ລົງໄປຈາກການແຊ່ນໍ້າ ຫຼື ຕົ້ມກ່ອນມານຳກິນ.

 

%d bloggers like this: