ນໍ້າມັນຈະຂຶ້ນຫາກ ອາຣັບບີ ຊາອຸດິດ ຫຼຸດການສົ່ງອອກ 10%

ອາຣັບບີ ຊາອຸດິດ ຫຼຸດການສົ່ງອອກນໍ້າມັນໃນເດືອນມັງກອນລົງ 10% ຈາກລະດັບຂອງເດືອນພະຈິກ.

ທ່ານ ຄາລິດ ອັນຟາລິ ລັດຖະມົນຕີວ່າການກະຊວງນໍ້າມັນຂອງ ອາຣັບບີ ຊາອຸດິດ ກ່າວວ່າ: ອາຣັບບີ ຊາອຸດິດ ຈະຫຼຸດການສົ່ງອອກນໍ້າມັນເຫຼືອ 7,2 ລ້ານບາເຣວຕໍ່ວັນໃນເດືອນມັງກອນນີ້ ຈາກລະດັບ 8 ລ້ານບາເຣວຕໍ່ວັນໃນເດືອນພະຈິກທີ່ຜ່ານມາ. ນອກຈາກນີ້, ອາຣັບບີ ຊາອຸດິດ ຈະຫຼຸດການສົ່ງອອກເພີ່ມຕື່ມອີກ 100.000 ບາເຣວຕໍ່ວັນໃນເດືອນກຸມພາທີ່ຈະເຖິງນີ້.

ໂອເປັກ ແລະ ບັນດາປະເທດພັນທະມິດຕັດສິນໃຈເມື່ອເດືອນກ່ອນສໍາລັບຫຼຸດກໍາລັງຜະລິດໂດຍລວມປະມານ 1,2 ລ້ານບາເຣວ ເລີ່ມຕັ້ງແຕ່ເດືອນມັງກອນ ເພື່ອເຮັດໃຫ້ລາຄາທີ່ລົງຢ່າງໜັກຈາກພາວະອຸປະທານລົ້ນຕະຫຼາດ ແລະ ຄວາມກັງວົນຕໍ່ອຸປະສົງທີ່ອ່ອນແຮງ.

ຢ່າງໃດກໍຕາມ, ລາຄານໍ້າມັນເລີ່ມຟື້ນຄືນກັບມາແລ້ວໃນໄລຍະບໍ່ເທົ່າວັນທີ່ຜ່ານມາຫຼັງຂໍ້ຕົກລົງໃໝ່ ເຊິ່ງ ໂອເປັກ ແລະ ພັນທະມິດເຫັນດີຫຼຸດກໍາລັງການຜະລິດ 1,2 ລ້ານບາເຣວ ມີຜົນບັງຄັບໃຊ້ຕັ້ງແຕ່ເດືອນນີ້.

%d bloggers like this: