4 ທົດສະວັດ ແຫ່ງຄວາມຈະເລີນຮຸ່ງເຮືອງທາງເສດຖະກິດຂອງຈີນ

ລັດຖະບານຈີນ ຈະບໍ່ຢຸດໃນການຊຸກຍູ້ ແລະ ສົ່ງເສີມການສ້າງເສດຖະກິດແບບເປີດຂອງໂລກ ເນື່ອງຈາກຕະຫຼອດ 40 ປີທີ່ຜ່ານມາ ຈີນ ໄດ້ເປີດປະເທດຈົນປະສົບຄວາມສໍາເລັດໃນການພັດທະນາເສດຖະກິດ ສ້າງຄວາມຈະເລີນຮຸ່ງເຮືອງໃຫ້ກັບປະເທດຄືປັດຈຸບັນນີ້.

ໃນປີ 1978 ຈີນ ເລີ່ມໃຊ້ນະໂຍບາຍປະຕິຮູບພາຍໃນ ແລະ ເປີດປະເທດສູ່ພາຍນອກ ໃນຮອບ 40 ປີມານີ້ ຈາກຈຸດທົດລອງເຖິງການເຜີຍແຜ່, ຈາກເຂດຫ່າງໄກສອກຫຼີກເຖິງເມືອງ, ຈາກການປະຕິຮູບລະບົບເສດຖະກິດເຖິງການປະຕິຮູບເຊີງເລິກໃນທົ່ວທຸກດ້ານ, ການປະຕິຮູບ ແລະ ການເປີດສູ່ພາຍນອກ ບໍ່ພຽງແຕ່ໄດ້ຊຸກຍູ້ໃຫ້ ຈີນ ສ້າງສັນສິ່ງມະຫັດສະຈັນໃນການພັດທະນາເສດຖະກິດ ແລະ ສັງຄົມເທົ່ານັ້ນ ຫາກຍັງໄດ້ເລີ່ມຕື່ມເຕັມກໍາລັງຊຸກຍູ້ການພັດທະນາຂອງໂລກຢ່າງຕັ້ງໜ້ານໍາອີກ.

ນັບຕັ້ງແຕ່ປີ 1978 – 2017 ຈີດີພີ ໄດ້ຂະຫຍາຍຕົວ 33,5 ເທົ່າ ດ້ວຍອັດຕາການຂະຫຍາຍຕົວສະເລ່ຍຕໍ່ປີ 9,5% ໂດຍມີມູນຄ່າ 12,3 ພັນຕື້ໂດລາ ເຊິ່ງເປັນອັດຕາສ່ວນຂອງໂລກຈາກ 1,8% ເພີ່ມຂຶ້ນເປັນ 15,3% ໄດ້ກາຍເປັນປະເທດທີ່ຂະໜາດເສດຖະກິດໃຫຍ່ອັນດັບ 2 ຂອງໂລກ ຮອງຈາກ ອາເມຣິກາ ຕັ້ງແຕ່ປີ 2010 ໃນຮອບ 40 ປີທີ່ຜ່ານມາ ຍອດມູນຄ່າການນໍາເຂົ້າ – ສົ່ງອອກສິນຄ້າຂອງຈີນ ໄດ້ຂະຫຍາຍຕົວ 198 ເທົ່າ, ຍອດມູນຄ່າການນໍາເຂົ້າ – ສົ່ງອອກ ເຊິ່ງການຄ້າການບໍລິການຂະຫຍາຍຕົວຫຼາຍກວ່າ 147 ເທົ່າ ດຶງດູດການລົງທຶນຂອງຕ່າງປະເທດຫຼາຍກວ່າ 2 ພັນຕື້ໂດລາ.

ຕະຫຼອດ 40 ປີ ແຫ່ງຄວາມຈະເລີນຮຸ່ງເຮືອງຂອງຈີນ ເປັນໄລຍະທີ່ປະຊາຊົນໃນເມືອງ ແລະ ເຂດຫ່າງໄກສອກຫຼີກຂອງຈີນ ມີລາຍໄດ້ເພີ່ມຂຶ້ນໄວທີ່ສຸດ, ໄດ້ຮັບປະໂຫຍດຫຼາຍທີ່ສຸດໃນປີ 2017 ໂດຍລາຍໄດ້ທີ່ໃຊ້ຈ່າຍໄດ້ຈິງສະເລ່ຍຕໍ່ຫົວຄົນມີເຖິງ 25.974 ຢວນ ເມື່ອຫັກປັດໄຈລາຄາອອກແລ້ວຂະຫຍາຍຕົວ ກວ່າປີ 1978 ກວ່າ 22 ເທົ່າ, ອັດຕາການຂະຫຍາຍຕົວສະເລ່ຍຕໍ່ປີສູງເຖິງ 8,5% ໃນຫຼາຍ 10 ປີທີ່ຜ່ານມາ ຈີນ ໄດ້ສ້າງສິ່ງມະຫັດສະຈັນໃນປະຫວັດສາດການຫຼຸດ ຄວາມທຸກຍາກຂອງມວນມະນຸດ ໂດຍມີປະຊາກອນ 700 ລ້ານຄົນ ໄດ້ຫຼຸດພົ້ນອອກຈາກຄວາມທຸກຍາກ.

ຈີນ ໃຊ້ຍຸດທະສາດເປີດທີ່ໃຫ້ປະໂຫຍດເຊິ່ງກັນ ແລະ ກັນ ເຊິ່ງບໍ່ພຽງແຕ່ໄດ້ປ່ຽນໂອກາດຂອງໂລກເປັນໂອກາດຂອງ ຈີນ ເທົ່ານັ້ນ ຫາກຍິ່ງໄປກວ່ານັ້ນຄືໄດ້ສ້າງໂອກາດຂອງຈີນ ເປັນໂອກາດຂອງໂລກນໍາອີກ, ຫຼາຍປີມານີ້ອັດຕາສ່ວນອໍານວຍຜົນປະໂຫຍດຂອງເສດຖະກິດຈີນ ຕໍ່ການຂະຫຍາຍຕົວທາງເສດຖະກິດຂອງໂລກ ຮັກສາໃນລະດັບຫຼາຍ ກວ່າ 30% ຕະຫຼອດມາ ເຊິ່ງເປັນແມ່ແຮງສໍາຄັນໃນການຊຸກຍູ້ການຟື້ນຟູ ແລະ ການຂະຫຍາຍຕົວຂອງເສດຖະກິດໂລກ.

ການຄ້າຂອງຈີນ ມີກຸ່ມປະເທດພັນທະມິດນັບມື້ຫຼາຍຂຶ້ນ ໂດຍປະເທດຄູ່ຄ້າເພີ່ມຈາກ 40 ກວ່າປະເທດ ໃນໄລຍະທໍາອິດຂອງການປະຕິຮູບເປີດປະເທດສູ່ພາຍນອກເປັນ 100 ກວ່າປະເທດໃນປັດຈຸບັນ, ຕັ້ງແຕ່ປີ 2010 ເປັນຕົ້ນມາ ຈີນ ເປັນປະເທດນໍາເຂົ້າລາຍໃຫຍ່ທີ່ສຸດຂອງໂລກ ແລະ ເປັນປະເທດທີ່ມີສ່ວນອໍານວຍປະໂຫຍດຫຼາຍທີ່ສຸດໃນການຂະຫຍາຍຕົວທາງການບໍລິການທົ່ວໂລກຕະຫຼອດມາ.

ການປະເຊີນກັບການພັດທະນາທາງເສດຖະກິດໂລກທີ່ເສຍຄວາມສົມດຸນ ຈີນ ໄດ້ສ້າງໂຄງການໜຶ່ງແລວໜຶ່ງເສັ້ນທາງຮ່ວມກັນ ໂດຍໃນ 5 ປີທີ່ຜ່ານມາ ຈີນ ໄດ້ຮ່ວມເຊັນສັນຍາກັບ 140 ກວ່າປະເທດ ແລະ ອົງການສາກົນໃນເອກະສານຄວາມຮ່ວມມືສ້າງໜຶ່ງແລວໜຶ່ງເສັ້ນທາງ, ໂຄງການຮ່ວມມືໃຫຍ່ໆສໍາຄັນຈໍານວນຫຼາຍໄດ້ເລີ່ມຂຶ້ນໃນປະເທດຕາມເສັ້ນທາງ, ປະເທດ ແລະ ເຂດແຄວ້ນຕາມເສັ້ນທາງໜຶ່ງແລວໜຶ່ງເສັ້ນທາງ ໄດ້ກວມເອົາປະຊາກອນກວ່າ 60% ແລະ ການຄ້າຫຼາຍກວ່າ 1/3 ຂອງໂລກ.

ໃນປີ 2018 ທີ່ຜ່ານມາ ຍອດມູນຄ່າການຄ້າລະຫວ່າງ ຈີນ ກັບປະເທດຕາມເສັ້ນທາງດັ່ງກ່າວ ມີຍອດສະສົມຫຼາຍ ກວ່າ 5 ພັນຕື້ໂດລາ, ເຂດຮ່ວມມືທາງເສດຖະກິດການຄ້າທີ່ສ້າງຂຶ້ນໃນປະເທດຕາມເສັ້ນທາງ ມີຍອດການລົງທຶນ 28.900 ລ້ານໂດລາສະຫະລັດ ເຊິ່ງໄດ້ສ້າງວຽກເຮັດງານທໍາ 24,4 ພັນຕໍາແໜ່ງ ແລະ ລາຍຮັບພາສີ 2.010 ລ້ານໂດລາ ໃຫ້ແກ່ປະເທດເຫຼົ່ານັ້ນ.

ການເປີດປະເທດສູ່ພາຍນອກຂອງຈີນ ໄດ້ຊຸກຍູ້ໃຫ້ບັນລຸສັນຕິພາບ, ສະຖຽນລະພາບ, ການພັດທະນາ, ຄວາມຈະເລີນຮຸ່ງເຮືອງໃນທົ່ວໂລກຢ່າງມີພະລັງ ແລະ ຈີນ ເປັນກໍາລັງສໍາຄັນໃນການສົ່ງເສີມຄວາມຮ່ວມມືໄດ້ – ໄດ້, ເປັນປະເທດລົງທຶນລາຍໃຫຍ່ສຸດຂອງ 40 ກວ່າປະເທດ ທີ່ທຸກຍາກຫຼາຍທີ່ສຸດໃນໂລກ.

%d bloggers like this: