ລາວ ໂຕໂຢຕ້າ ເອັຟຊີ ຮ່ວມວັດທີມດັງໃນ ອາຊຽນ ລາຍການ ລີໂອ ປຣີຊິຊັນ ຄັບ 2019

ລາວ ໂຕໂຢຕ້າ ເອັຟຊີ ແຊັມ ເປບຊີ ລາວ ພຣີເມຍລີກ ກຽມທົດສອບທີມກ່ອນລຸຍລາຍການໃຫຍ່ຢ່າງ ເປບຊີ ລາວ ພຣີເມຍລີກ 2019 ແລະ ເອເອັຟຊີ ຄັບ 2019 ທີ່ຈະເປີດສາກຂຶ້ນໃນທ້າຍເດືອນກຸມພານີ້ ດ້ວຍການກຽມທົດສອບທີມກັບ 3 ສະໂມສອນ ຈາກອາຊຽນ ແລະ 12 ທີມທີ່ມີຊື່ສຽງຈາກໄທ ໃນບານເຕະລາຍການ ລີໂອ ປຣີຊີຊັນ ຄັບ 2019 ( LEO PRE-SEASON CUP 2019 ) ທີ່ປະເທດໄທ ລະຫວ່າງວັນທີ 12 – 26 ມັງກອນ 2019.

ການແຂ່ງຂັນບານເຕະ ລີໂອ ປຣີຊີຊັນ ຄັບ 2019 ຈັດຂຶ້ນເປັນຄັ້ງທີ 3 ຂະນະທີ່ປີນີ້ເປັນປີທໍາອິດທີ່ຝ່າຍຈັດການແຂ່ງຂັນໄດ້ເຊີນເອົາ 4 ສະໂມສອນ ຈາກອາຊຽນ ຄື: ລາວ ໂຕໂຢຕ້າ ເອັຟຊີ ຈາກ ສປປ ລາວ,ຮາໂນ້ຍ ເອັຟຊີ ຈາກຫວຽດນາມ, ພະນົມເປັນ ຄາວ ເອັຟຊີ ຈາກກໍາປູເຈຍ ແລະ ແທັມປິເນສ ໂຣເວີ ເອັຟຊີ ຈາກສິງກະໂປ ມາຮ່ວມສ້າງສີສັນກັບອີກ 12 ສະໂມສອນຈາກໄທ ປະກອບດ້ວຍ 6 ສະໂມສອນຈາກ ໄທ ລີກ 1 ໄດ້ແກ່: ເມືອງທອງ ຢູໄນເຕັດ ແຊັມເກົ່າ, ການທ່າເຮືອ ເອັຟຊີ, ສິງ ຊຽງຣາຍ ຢູໄນເຕັດ, ປຣະຈວບ ເອັຟຊີ, ນະຄອນຣາຊສີມາ ເອັຟຊີ, ຊຽງໃໝ່ ເອັຟຊີ ແລະ ອີກ 6 ສະໂມສອນມາຈາກ ໄທ ລີກ 2 ໄດ້ແກ່: ບາງກອກ ກາສ, ປະທຸມ ຢູໄນເຕັດ, ຂອນແກ່ນ ເອັຟຊີ, ໜອງບົວ ເອັຟຊີ, ສະມຸດສາຄອນ ເອັຟຊີ, ຣະຍອງ ເອັຟຊີ ແລະ ອຸດອນທານີ   ເອັຟຊີ.

ສໍາລັບການແຂ່ງຮອບຄັດເລືອກຮອບທໍາອິດ ຈະແຂ່ງຂັນໃນວັນທີ 12 – 13 ມັງກອນ 2019, ຮອບຄັດເລືອກຮອບ 2 ແຂ່ງຂັນວັນທີ 15 – 16 ມັງກອນ 2019, ສ່ວນ ລາວ ໂຕໂຢຕ້າ ເອັຟຊີ ແລະ 3 ສະໂມສອນ ຈາກອາຊຽນ ໄດ້ສິດຢືນລໍຖ້າໃນຮອບ 8 ທີມ ແຂ່ງຂັນລະຫວ່າງວັນທີ 19 – 20 ມັງກອນ 2019 ເຊິ່ງ ລາວ ໂຕໂຢຕ້າ ເອັຟຊີ ລໍຖ້າພົບຜູ້ຊະນະລະຫວ່າງ 2 ທີມ ຈາກຮອບຄັດເລືອກຮອບທໍາອິດ ຣະຢອງ ເອັຟຊີ ຫຼື ຂອນແກ່ນ ເອັຟຊີ ແລະ ປະຈວບ ເອັຟຊີ.

ຂະນະທີ່ຮອບຮອງຊະນະເລີດ ຈະແຂ່ງຂັນໃນວັນທີ 23 ມັງກອນ 2019 ແລະ ນັດຊີງຊະນະເລີດ ຈະແຂ່ງຂັນໃນວັນທີ 25 ມັງກອນ 2019 ໂດຍແຊັມລາຍການນີ້ຈະໄດ້ຮັບຂັນຊະນະເລີດພ້ອມເງິນລາງວັນ 60 ພັນໂດລາ, ອັນດັບ 2 ໄດ້ຮັບເງິນ 20 ພັນໂດລາ, ອັນດັບ 3 ໄດ້ຮັບເງິນ 10 ພັນໂດລາ ແລະ ອັນດັບ 4 ໄດ້ຮັບເງິນລາງວັນ 5 ພັນໂດລາ.

( ຮູບຈາກ: LAO Toyota F.C )

%d bloggers like this: