ຈັນທະພອນ ກຽມໄປຫາປະສົບການກັບສະໂມສອນໄທອີກຄັ້ງ

ຂອນແກ່ນ ເອັຟຊີ ສະໂມສອນຈາກ ໄທ ລີກ 2 ກຽມປະກາດຄວ້າ   ຈັນທະພອນ ແຫວນວົງສົດ ກອງກາງທີມຊາດລາວ ຊຸດເອເອັຟເອັຟ ຊູຊຸກິ ຄັບ 2018 ໄປຮ່ວມທີມ ເຊິ່ງຖືເປັນຄັ້ງທີ 2 ທີ່ ຈັນທະພອນ ໄດ້ໄປຫາປະສົບການໃນການແຂ່ງຂັນບານເຕະທີ່ປະເທດໄທ ເພາະເມື່ອປີ 2018 ລາວເປັນນັກເຕະຫຼັກຂອງ ນ່ານ ເອັຟຊີ ໃນການພາທີມຄວ້າອັນດັບ 2 ພ້ອມສິດໄປ    ເພອ໊ອຟ ໄທ ລີກ 4 ພາກເໜືອ ໄດ້ສໍາເລັດຕາມການລາຍງານຂອງເຟສບຸ໊ກທາງການຂອງ ຂອນແກ່ນ ເອັຟຊີ.

ຈັນທະພອນ ກາຍເປັນຕົວຫຼັກຂອງທີມຊາດລາວ ນັບຕັ້ງແຕ່ເລີ່ມຕິດທີມຊາດນັບຕັ້ງແຕ່ຊຸດເຍົາວະຊົນຈົນເຖິງຊຸດໃຫຍ່, ສ່ວນຜົນງານໃນນາມສະໂມສອນກາຍເປັນທີ່ຮູ້ຈັກ ຄື: ເປັນສ່ວນສໍາຄັນພາ ຮ່ວງແອງ ອັດຕະປື ຄວ້າແຊັມ ລາວ ພຣີເມຍລີກ 2014 ແລະ ໃນປີ 2018 ພາ ນ່ານ ເອັຟຊີ ສະໂມສອນໃນ ໄທ ລີກ 4 ເຂດພາກເໜືອ ຄວ້າອັນດັບ 2 ພ້ອມສິດໄປ ເພລອ໊ອຟ ໄດ້ສໍາເລັດກ່ອນຈະໝົດສັນຍາ.

ຫຼ້າສຸດ, ມີຂ່າວວ່າ: ຂອນແກ່ນ ເອັຟຊີ ສະໂມສອນ ໄທ ລີກ 2 ກຽມ ຄວ້າຕົວ ຈັນທະພອນ ມາຮ່ວມທີມໃນໂກຕານັກເຕະຊາວອາຊຽນຂອງທີມທີ່ວ່າງຢູ່ ແລະ ຍິ່ງມີໂອກາດເປັນໄປໄດ້ສູງ ເພາະກ່ອນໜ້ານີ້ລາວໄດ້ໄປຮ່ວມຝຶກຊ້ອມກັບ ຂອນແກ່ນ ເມື່ອເດືອນທັນວາ 2018 ຄາດວ່າຈະເຫຼືອພຽງຂັ້ນຕອນລາຍການລະອຽດຕ່າງໆ ກ່ອນຈະເປີດເປັນນັກເຕະໃໝ່ຂອງທີມໃນໄວໆນີ້.

ຂະນະທີ່ ຈັນທະພອນ ເປີດເຜີຍກັບທີມຂ່າວໜັງສືພິມ ເສດຖະກິດ – ການຄ້າ ວ່າ: ພາຍຫຼັງທີ່ສໍາເລັດພາລະກິດກັບ ທີມຊາດລາວ ຊຸດໃຫຍ່ ລຸຍ   ເອເອັຟເອັຟ ຊູຊຸກິ ຄັບ 2018 ທາງສະໂມສອນ ຂອນແກ່ນ ເອັຟຊີ ເຫັນເຖິງຜົນງານທີ່ຜ່ານມາທັງໃນທີມຊາດ ແລະ ສະໂມສອນ ຈຶ່ງໄດ້ດຶງມາຮ່ວມຝຶກຊ້ອມນັບຕັ້ງແຕ່ປີທີ່ຜ່ານມາ ແລະ ໄດ້ຕົກລົງກັນແລ້ວ ແຕ່ຍັງບໍ່ທັນໄດ້ເປີດຕົວຢ່າງເປັນທາງການ ເຊິ່ງຖ້າຖາມເຖິງເປົ້າໝາຍກໍຄືສ້າງຜົນງານໃຫ້ດີທີ່ສຸດ ແລະ ຫວັງພາທີມຂຶ້ນ ໄທ ລີກ ລະດູການໜ້າ.

ສໍາລັບ ຈັນທະພອນ ເກີດວັນທີ 4 ພະຈິກ 1994 ທີ່ບ້ານໂພນທັນ ເມືອງໄຊເສດຖາ ນະຄອນຫຼວງວຽງຈັນ ສາມາດຫຼິ້ນໄດ້ທັງກອງກາງ ແລະ ກອງໜ້າ ໂດຍມີສ່ວນສູງ 168 ຊັງຕີແມັດ ແລະ ໜັກ 65 ກິໂລກຣາມ, ຕິດທີມຊາດຕັ້ງແຕ່ຊຸດ 13 ປີ ຈົນເຖິງຊຸດ     ໃຫຍ່ ເອເອັຟເອັຟ ຊູຊຸກິ ຄັບ 2018, ສ່ວນສະໂມສອນເຄີຍຫຼິ້ນໃຫ້ກັບສະໂມສອນ ທະນາຄານລາວ ໄດ້ແຊັມລາວລີກ 2010 – 2012, ຫຼິ້ນໃຫ້ກັບສະໂມສອນ ຮ່ວງແອງ ອັດຕະປື ລະຫວ່າງປີ 2014 – 2015 ພາທີມຄວ້າແຊັມ ລາວ ພຣີເມຍລີກ 2014, ຫຼິ້ນໃຫ້ກັບສະໂມສອນ ໄຟຟ້າລາວ ຄວ້າອັນດັບ 4 ຂອງ ລາວ ພຣີເມຍລີກ 2016, ຫຼິ້ນໃຫ້ກັບ ວຽງຈັນ ຢູໄນເຕັດ ໃນປີ 2017 ແລະ ຫຼິ້ນໃຫ້ກັບ ນ່ານ ເອັຟຊີ ໃນ ໄທ ລີກ 4 ພາທີມຄວ້າອັນດັບ 2 ໃນປີ 2018.

( ຄໍາສອນ )

%d bloggers like this: