ເປີດນຳໃຊ້ເສັ້ນທາງເບຕົງເສີມເຫຼັກ ບ້ານບຸ່ງນາດີ ເມືອງໄຊພູທອງ

ເສັ້ນທາງເບຕົງເສີມເຫຼັກຂອງບ້ານບຸ່ງນາດີ ເມືອງໄຊພູທອງ ແຂວງສະຫວັນນະເຂດ ຄວາມຍາວ 200 ກວ່າແມັດ ໄດ້ເລີ່ມກໍ່ສ້າງແຕ່ຕົ້ນເດືອນທັນວາ ແລະ ໄດ້ສຳເລັດໃນວັນທີ 30 ທັນວາ ປີ 2018 ຕົກມາຮອດວັນທີ 8 ມັງກອນປີ 2019 ໄດ້ມີພິທີເປີດນໍາໃຊ້ເສັ້ນທາງດັ່ງກ່າວຢ່າງເປັນທາງການ ໂດຍການເຂົ້າຮ່ວມພິທີຕັດແຖບ   ຜ້າ ແລະ ລັ່ນຄ້ອງ 9 ບາດ ຂອງ ທ່ານ       ຫ່ວນ ຮັງບົວສອນ ຄະນະປະຈໍາພັກເມືອງ ຮອງເຈົ້າເມືອງໆໄຊພູທອງ, ມີຍາທ່ານ ທອງດໍາ ຈັນທະວົງ ຄະນະ ( ອພສ )    ແຂວງ, ປະທານ ອພສ ເມືອງໄຊພູທອງ; ມີບັນດາທ່ານໃນຄະນະປະຈໍາພັກເມືອງ, ຮອງເຈົ້າເມືອງ, ກໍາມະການພັກເມືອງ, ຫົວໜ້າຫ້ອງການ – ຄະນະຫ້ອງການ, ເລຂາ – ນາຍບ້ານເຖົ້າແກ່ແນວໂຮມ ຕະຫຼອດຮອດພໍ່ແມ່ປະຊາຊົນ, ນັກທຸລະກິດເຂົ້າຮ່ວມຢ່າງພ້ອມພຽງ.

ທ່ານ ມັງຈຸລະ ພົງອຸດົມ ຮອງນາຍບ້ານໆບຸ່ງນາດີ ໄດ້ລາຍງານໃຫ້ຮູ້ວ່າ: ການພັດທະນາເສັ້ນທາງຄົມມະນາຄົມທາງບົກ ບ້ານບຸ່ງນາດີ ກໍໄປຄຽງຄູ່ກັບບ້ານອື່ນໆ ພາຍໃນເມືອງໄຊພູທອງ ແລະ ບ້ານອ້ອມຂ້າງຢ່າງບໍ່ຢຸດຢັ້ງ, ຈາກເສັ້ນທາງແຕ່ກ່ອນເປັນເສັ້ນທາງດິນແດງ, ຈາກດິນແດງມາເປັນທາງລາດຢາງໃນປີ 2014 ຈາກທາງລາດຢາງມາເປັນເສັ້ນທາງເບຕົງເສີມເຫຼັກໃນທ້າຍປີ 2018. ການກໍ່ສ້າງເສັ້ນທາງເບຕົງເສີມເຫຼັກຂອງບ້ານບຸ່ງນາດີ ເປັນເສັ້ນທາງສາຍຫຼັກຂອງບ້ານ ເຊິ່ງມີລວງຍາວ 206 ແມັດ, ກວ້າງ 6 ແມັດ, ໜາ 15 ຊັງຕີແມັດ ລວມມູນຄ່າກໍ່ສ້າງທັງໝົດ 139,88 ລ້ານກີບ ໂດຍໄດ້ເລີ່ມລົງມືກໍ່ສ້າງມາແຕ່ວັນທີ 10 ທັນວາ 2018 ຫາວັນທີ 30 ທັນວາ 2018 ເຊິ່ງໃຊ້ເວລາກໍ່ສ້າງ 20 ວັນ.

ການກໍ່ສ້າງເສັ້ນທາງແມ່ນໄດ້ຜັດປ່ຽນກັນເປັນແຕ່ລະວັນ ເຊິ່ງໄດ້ຮັບການປະກອບສ່ວນທຶນຮອນກໍ່ສ້າງຈາກ ທ່ານ  ວາດສະໜາ ເຈົ້າຂອງ ໂຮງງານນໍ້າດື່ມ ແກ້ວຟ້າ ມີໄຊ ຈໍານວນ 67,68 ລ້ານກີບ ທຶນປະກອບສ່ວນຂອງພໍ່ແມ່ປະຊາຊົນຂອງຊາວບ້ານບຸ່ງນາດີ ແລະ ພາກສ່ວນຕ່າງໆ ຈໍານວນ 72,19 ລ້ານກີບ ໂດຍໃຊ້ແຮງງານຂອງປະຊາຊົນ ແລະ ທະຫານຊາຍແດນປະຈໍາກຸ່ມບ້ານ ເປັນຜູ້ກໍ່ສ້າງ ຈໍານວນ 540 ຄົນ ຍິງ 150  ຄົນ.

ທ່ານຍັງກ່າວຕື່ມອີກວ່າ: ສໍາລັບທິດທາງແຜນການໃນຕໍ່ໜ້າ ແມ່ນຈະສືບຕໍ່ກໍ່ສ້າງເສັ້ນທາງເສັ້ນທີ 2 ຜ່ານບ້ານໃນລວງຍາວ 200 ແມັດ, ກວ້າງ 5,5 ແມັດ, ໜາ 15 ຊັງຕີແມັດ ເຊິ່ງຈະນໍາໃຊ້ທຶນຮອນຈາກການປຸກລະດົມພໍ່ແມ່ປະຊາຊົນ, ຫົວໜ່ວຍທຸລະກິດທີ່ເປັນທ່າແຮງພາຍໃນບ້ານ, ຄາດວ່າຈະນໍາໃຊ້ງົບປະມານ 135 ລ້ານກວ່າກີບ ຈຶ່ງຈະສໍາເລັດຄາດວ່າຈະລົງມືກໍ່ສ້າງໃນກາງປີ 2019, ການກໍ່ສ້າງເສັ້ນທາງນີ້ກໍເພື່ອສ້າງຄວາມສາມັກຄີກັນຂອງປະຊາຊົນພາຍໃນບ້ານ ທັງໄດ້ເຮັດໃຫ້ການໄປ – ມາຫາສູ່ກັນຂອງປະຊາຊົນພາຍໃນບ້ານມີຄວາມສະດວກສະບາຍ ແລະ ປອດໄພໃນການສັນຈອນໄປ – ມາຂອງປະຊາຊົນພາຍໃນບ້ານດີຂຶ້ນ.

ຈາກນັ້ນ, ໃນພິທີຍັງໄດ້ມອບໃບສັນລະເສີນຂອງທ່ານເຈົ້າເມືອງໃຫ້ແກ່ບັນດານັກທຸລະກິດ ແລະ ພໍ່ແມ່ປະຊາຊົນທີ່ໄດ້ປະກອບສ່ວນທຶນຮອນເຂົ້າໃນການກໍ່ ສ້າງເສັ້ນທາງໃນຄັ້ງນີ້ ຈໍານວນ 27 ທ່ານ    ໂດຍໃຫ້ກຽດມອບຂອງ ທ່ານ ຫ່ວນ                 ຮັງບົວສອນ ຮອງເຈົ້າເມືອງໆໄຊພູທອງ. ພ້ອມນັ້ນ, ກໍໄດ້ພ້ອມກັນຕັດແຖບຜ້າ ແລະ ລັ່ນຄ້ອງ 9 ບາດ ທີ່ເປັນສັນຍະລັກໃນການເປີດຊົມໃຊ້ເສັ້ນທາງຢ່າງເປັນທາງການ. ນອກຈາກນັ້ນ, ບັນດາການນໍາກໍຍັງໄດ້ຍ່າງເລາະຊົມເສັ້ນທາງດ້ວຍບັນຍາກາດຟົດຟື້ນ.

(  ຂ່າວ: ພັນທະມິດ ວົງສຸທິ )

%d bloggers like this: