ປະຊາຊົນບ້ານຜານາງ ສົມທົບທຶນສ້ອມແປງຂົວ ແລະ ເສັ້ນທາງ

ປະຊາຊົນບ້ານຜານາງ ເມືອງມະຫາໄຊ ແຂວງຄຳມ່ວນ ຮ່ວມສົມທົບທຶນສ້ອມແປງຂົວ ແລະ ເສັ້ນທາງເຂົ້າຫາບ້ານຂອງຕົນ ໃນວັນທີ 7 ມັງກອນ 2019 ຜ່ານມາ ໂດຍມີ ທ່ານ ແສງຈັນ ຊາມົນຕີ ຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງມະຫາໄຊ, ພ້ອມດ້ວຍ ທ່ານ ບຸນຍົງ ໄຊຍະວົງ ຮອງຫົວໜ້າຫ້ອງວ່າການປົກຄອງເມືອງ ແລະ ຄະນະທີມງານວິຊາການທີ່ກ່ຽວຂ້ອງ ໄດ້ພ້ອມກັນລົງເຄື່ອນໄຫວຊຸກຍູ້ອຳນາດການປົກຄອງ ແລະ ປະຊາຊົນພາຍໃນບ້ານດັ່ງກ່າວ.

ການສ້ອມແປງເສັ້ນທາງ ແລະ ຂົວເຂດດັ່ງກ່າວກໍເພື່ອເຮັດໃຫ້ການສັນຈອນໄປ – ມາຂອງປະຊາຊົນບັນດາເຜົ່າພາຍໃນບ້ານຜານາງ ເມືອງມະຫາໄຊ ໄດ້ມີຄວາມສະດວກສະບາຍ ແລະ ປອດໄພໃນການໃຊ້ຖະໜົນຫົນທາງ. ດັ່ງນັ້ນ, ທາງອຳນາດການປົກຄອງເມືອງກໍຄືຫ້ອງການໂຍທາທິການ ແລະ ຂົນສົ່ງເມືອງ ໄດ້ສົມທົບກັບພາກສ່ວນຕ່າງໆທີ່ກ່ຽວຂ້ອງ, ພ້ອມດ້ວຍອຳນາດການປົກຄອງ ແລະ ປະຊາຊົນພາຍໃນບ້ານຜານາງ ພ້ອມກັນປຸກລະດົມທຶນຮອນ ແລະ ອຸປະກອນ ເປັນຕົ້ນແມ່ນໄມ້ທີ່ຈະສ້ອມແປງຂົວ, ເຫຼັກຕະປູ ແລະ ອື່ນໆທີ່ກ່ຽວຂ້ອງ ລວມມູນຄ່າທັງໝົດ 3,1 ລ້ານກີບ ເພື່ອປະກອບສ່ວນເຂົ້າໃນການສ້ອມແປງຂົວ ແລະ ເສັ້ນທາງເຂົ້າຫາບ້ານ. ຂະບວນການສ້ອມແປງຂົວ ແລະ ເສັ້ນທາງຄັ້ງນີ້ແມ່ນໄດ້ພ້ອມກັນນຳໃຊ້ແຮງງານປະຊາຊົນພາຍໃນບ້ານແປງຂົວທີ່ເປ່ເພ, ຂຸດດິນຖົມສົ້ນຂົວ ແລະ ເສັ້ນທາງໃຫ້ພຽງ.

ການສ້າງຂະບວນການສ້ອມແປງຂົວ ແລະ ເສັ້ນທາງດັ່ງກ່າວ ກໍເພື່ອສ້າງຄວາມສາມັກຄີຮັດແໜ້ນຂອງປະຊາຊົນພາຍໃນບ້ານ, ເຮັດໃຫ້ຖະໜົນຫົນທາງມີຄວາມສະອາດສວຍງາມ ແລະ ມີຄວາມສະດວກໃນການສັນຈອນ ທັງເປັນການສ້າງຜົນງານຂະບວນການຄຳນັບຮັບຕ້ອນວັນສຳຄັນຕ່າງໆຂອງຊາດຂອງພັກ ໂດຍສະເພາະແມ່ນວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ແລະ ຕ້ອນຮັບກອງປະຊຸມໃຫຍ່ 3 ຂັ້ນຂອງເມືອງ.

( ຂ່າວ: ແດງສະຫວັດ ແສນພານິດ )

%d bloggers like this: