ຈີນ ລົງທຶນປູກເຂົ້ານາແຊງເກືອບ 90 ເຮັກຕາຢູ່ຫຼວງນ້ຳທາ

ນັກລົງທຶນຈາກ ສປ ຈີນ ສຳປະທານເນື້ອທີ່ປູກເຂົ້ານາແຊງ 88 ເຮັກຕາ ຢູ່ເມືອງຫຼວງນ້ຳທາ ຮອດປັດຈຸບັນຕົກກ້າແລ້ວ 45%.

ຕາມການລາຍງານຂອງ ທ່ານ   ສາຍສະໝອນ ມິງບຸບຜາ ຮອງຫົວໜ້າຫ້ອງການກະສິກຳ ແລະ ປ່າໄມ້ ເມືອງຫຼວງນ້ຳທາ ໃຫ້ຮູ້ໃນວັນທີ 8 ມັງກອນ ຜ່ານມາວ່າ: ໃນການຜະລິດເຂົ້ານາແຊງລະດູແລ້ງຢູ່ເມືອງຫຼວງນ້ຳທາ ໃນເນື້ອທີ່ທັງໝົດ 88,56 ເຮັກຕາ ເປັນການລົງທຶນຂອງນັກລົງທຶນ ສປ ຈີນ ເຊິ່ງກວມເອົາ 5 ບ້ານ ຄື: ບ້ານທົ່ງໄຈ້ເໜືອ, ທົ່ງໄຈ້ໃຕ້, ປ່າປົວະ, ທົ່ງດີ ແລະ ບ້ານນ້ຳທຸງ ປັດຈຸບັນຕົກກ້າສຳເລັດແລ້ວ 45% ແລະ ຊາວກະສິກອນໄດ້ຕັດຕໍເຟືອງເຂົ້າໄກ່ນ້ອຍ 25 ເຮັກຕາ ຢູ່ເຂດທົ່ງນາແປນ, ສະເລ່ຍສະມັດຖະພາບ 3,5 – 4 ໂຕນຕໍ່ເຮັກຕາ ແລະ ຜູ້ສຳປະທານຕ້ອງຈ່າຍຄ່າຊົດເຊີຍນຳໃຊ້ທີ່ດິນນາຂອງປະຊາຊົນໃນມູນຄ່າ 5 ລ້ານກີບຕໍ່ເຮັກຕາ, ພ້ອມທັງຮັກສາສະພາບແວດລ້ອມບໍ່ໃຫ້ນຳໃຊ້ຢາຂ້າຫຍ້າໃນພື້ນທີ່ເຮັດນາ, ບໍ່ນຳໃຊ້ຢາປາບສັດຕູພືດ, ຕັດຕໍເຟືອງບໍ່ໃຫ້ສູງເກີນ 30 ຊັງຕີແມັດ, ເຟືອງເຂົ້າໂຕຜູ້ແມ່ນໃຫ້ເອົາອອກຈາກພື້ນທີ່ນາໃຫ້ໝົດ ຕາມການສັນຍາຂອງຫ້ອງການກະສິກຳ ແລະ ປ່າໄມ້ ເມືອງຫຼວງນ້ຳທາ ກັບ ບໍລິສັດ ລາວເວີຍຊີງ ວິທະຍາສາດກະສິກຳ ຈຳກັດ ສປ ຈີນ.

ທ່ານ ສາຍສະໝອນ ມິງບຸບຜາ ຍັງໃຫ້ຮູ້ຕື່ມວ່າ: ນອກຈາກຜະລິດເຂົ້ານາແຊງແລ້ວ ຊາວກະສິກອນເມືອງຫຼວງນ້ຳທາ ຍັງໄດ້ປູກພືດຜັກຕ່າງໆກາຍເປັນສິນຄ້າໃນເນື້ອທີ່ 580 ເຮັກຕາ ຄື: ອ້ອຍ, ສາລີແຂງ, ກ້ວຍ, ສາລີຫວານ, ໝາກໂມ, ໝາກອຶ, ມັນຕົ້ນ, ຖົ່ວເຫຼືອງ, ຖົ່ວຍັດ, ຖົ່ວດິນ, ມັນດ້າງ, ມັນເພົາ, ກະລ່ຳປີ, ຜັກກາດ, ຜັກທຽມ. ຜັກບົ່ວ, ຜັກກາດຫົວ, ຖົ່ວຝັກກຍາວ ແລະ ໝາກແຕງ.

ພ້ອມນັ້ນ, ທ່ານຍັງໄດ້ຮຽກຮ້ອງໃຫ້ຊາວກະສິກອນຈົ່ງເອົາໃຈໃສ່ບົວລະບັດຜົນລະປູກຂອງຕົນໃຫ້ງອກງາມ ແລະ ກາຍເປັນສິນຄ້າສົ່ງອອກສ້າງລາຍຮັບໃຫ້ແກ່ຄອບຄົວ ເພື່ອໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.

( ຂ່າວ : ອຸ້ມ ສົມນໍວັນ )

%d bloggers like this: