ປີທ່ອງທ່ຽວລາວ ຍູ້ຕົວເລກນັກທ່ອງທ່ຽວຢູ່ສາລະວັນ ເພີ່ມຂຶ້ນ

ນັບແຕ່ຕົ້ນປີ 2018 ເປັນຕົ້ນມາ ທົ່ວປະເທດລາວໄດ້ເປີດຂະບວນປີທ່ອງທ່ຽວລາວ ເພື່ອຊ່ວຍກະຕຸ້ນວຽກງານການທ່ອງທ່ຽວໃຫ້ແຕ່ລະເຂດແຂວງ ເຊິ່ງນັ້ນກໍເປັນເງື່ອນໄຂທີ່ດີ ແລະ ເຮັດໃຫ້ຂະແໜງການທ່ອງທ່ຽວມີທ່າອ່ຽງດີຂຶ້ນ ໂດຍສະເພາະແຂວງສາລະວັນ ທີ່ເຫັນໄດ້ເຖິງຄວາມແຕກຕ່າງວ່າ ປີ 2018 ມີນັກທ່ອງທ່ຽວ ເພີ່ມຂຶ້ນ, ໃນຂະນະທີ່ປັດຈຸບັນອຳນາດການປົກຄອງ         ແຂວງກຳລັງສຸມໃສ່ພັດທະນາສະຖານທີ່ທ່ຽວທ່ຽວທຳມະຊາດ ເພື່ອເປັນທ່າແຮງໃນການດຶງດູດນັກທ່ຽວ.

ທ່ານ ບຸນກ່ອງ ເກດທອງຄຳ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງສາລະວັນ ( ຖວທ ) ກ່າວວ່າ: ສະເພາະວຽກງານທ່ອງທ່ຽວ ປີ 2018 ແຂວງສາລະວັນ ພວກເຮົາໄດ້ສຳເລັດການຈັດງານສະເຫຼີມສະຫຼອງປີທ່ອງທ່ຽວລາວ ທີ່ຕິດພັນກັບການສະຫຼອງ ແລະ ສົມໂພດຫໍໄຕປີດົກ. ນອກຈາກນັ້ນ, ຍັງໄດ້ລົງຊຸກຍູ້ບັນດາເມືອງທົ່ວແຂວງຈັດງານເປີດປີທ່ອງທ່ຽວຂອງແຕ່ລະເມືອງ ຕິດພັນກັບການຈັດງານບຸນປະເພນີຊົນເຜົ່າ. ນອກນີ້, ພະແນກ ຖວທ ພວກເຮົາຍັງໄດ້ລົງຕິດຕາມ, ຊຸກຍູ້ ແລະ ສ້າງສິ່ງອຳນວຍຄວາມສະດວກດ້ານການທ່ອງທ່ຽວຢູ່ແຫຼ່ງສະຖານທີ່ທ່ອງທ່ຽວແບບອະນຸຮັກ ອຸທິຍານພູຜາສຸກ ເປັນຕົ້ນແມ່ນ: ປັບປຸງທາງຍ່າງເຂົ້າຖໍ້າໂດຍການເຮັດຂົວໄມ້ ແລະ ກອງຫີນ, ຕິດປ້າຍຫ້າມ, ປ້າຍເຕືອນ, ຕິດດອກໄຟເພີ່ມຕື່ມບ່ອນທີ່ຍັງບໍ່ທັນມີແສງສະຫວ່າງພຽງພໍ, ເທແທ່ນຕັ້ງພະພຸດທະຮູບ, ສ້າງຂະບວນການປູກຕົ້ນໄມ້ພ້ອມອະນາໄມສະຖານທີ່ຕ່າງໆໃນຖໍ້າ ແລະ ນອກຖໍ້າ.

ທ່ານກ່າວຕື່ມວ່າ: ຜ່ານການຈັດຕັ້ງປະຕິບັດວຽກງານທ່ອງທ່ຽວ ຕິດພັນກັບຂະບວນເປີດປີທ່ອງທ່ຽວລາວ ປີ 2018 ເຫັນວ່າມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຢູ່ໃນແຂວງສາລະວັນ ຈຳນວນ 110.000 ຄົນ, ສາມາດສ້າງລາຍຮັບໄດ້ 15.082.300 ໂດລາ, ຖ້າທຽບຕົວເລກນັກທ່ອງທ່ຽວໃນປີ 2017 ຜ່ານມາ ມີນັກທ່ອງທ່ຽວ ຈຳນວນ 98 ພັນກວ່າຄົນ ເຫັນວ່າການຈັດບັນດາກິດຈະກຳໃນປີທ່ອງທ່ຽວລາວ ຕິດພັນກັບບຸນປະເພນີຕ່າງໆຂອງຊົນເຜົ່າ ແມ່ນຊ່ວຍເຮັດໃຫ້ຕົວເລກນັກທ່ອງທ່ຽວຂອງແຂວງເພີ່ມຂຶ້ນ.

ມາຮອດປັດຈຸບັນທົ່ວແຂວງສາລະວັນ ມີສະຖານທີ່ທ່ອງທ່ຽວທັງໝົດ 95 ແຫ່ງ. ໃນນັ້ນ, ສະຖານທີ່ທ່ອງທ່ຽວທຳມະຊາດມີ 52 ແຫ່ງ, ວັດທະນະທຳ 37 ແຫ່ງ ແລະ ປະຫວັດສາດ 6 ແຫ່ງ, ໂຮງແຮມ 7 ແຫ່ງ, ເຮືອນພັກ 51 ແຫ່ງ, ຮ້ານອາຫານ 48 ແຫ່ງ, ຮ້ານບັນເທີງ 2 ແຫ່ງ, ຮ້ານກິນດື່ມກາງແຈ້ງ 6 ແຫ່ງ, ຮ້ານກິນດື່ມທົ່ວໄປ 64 ແຫ່ງ ແລະ ມີບໍລິສັດທ່ອງທ່ຽວ 2 ບໍລິສັດ.

( ຂ່າວ: ຄຳນ້ອຍ )

%d bloggers like this: