2 ລໍ້ພາລຸຍ ສູ່ດິນແດນຜົ້ງສາລີ ຊົມວິຖີຊີວິດ ແລະ ທໍາມະຊາດເມືອງເໜືອ

ຕອນທີ 2 ອີ່ມໃຈໄດ້ໄປໄຊສະຖານ ດິນແດນແຫ່ງສາຍພູ ແລະ ສາຍໝອກ

ອາກາດເຊົ້າມື້ນັ້ນທີ່ປາກລາຍ ເຢັນ ແລະ ມີໝອກປົກຄຸ້ມໄປທົ່ວ, ສາຍລົມເຢັນໆພັດມາບໍ່ໄດ້ຂາດ, ການນັ່ງຈິບກາເຟເບົາໆຊົມສາຍນໍ້າຂອງຍາມເຊົ້າ ມັນຊ່າງເປັນບັນຍາກາດທີ່ຜ່ອນຄາຍມີຄວາມສຸກ, ການຖ່າຍຮູບຢູ່ຕົວເມືອງປາກລາຍ ໃນມື້ນັ້ນແມ່ນເປັນໄປໄດ້ຍາກ ເນື່ອງຈາກນໍ້າໝອກທີ່ກົ້ວໄປທົ່ວເມືອງ ເມື່ອກິນເຂົ້າເຊົ້າທີ່ປາກລາຍແລ້ວ ພວກເຮົາກໍອອກເດີນທາງທັນທີ ໂດຍເປົ້າໝາຍມື້ນີ້ຢູ່ທີ່ເມືອງໄຊສະຖານ ແຂວງໄຊຍະບູລີ ເຊິ່ງຫ່າງຈາກປາກລາຍ ປະມານ 200 ກິໂລແມັດ.

ການເດີນທາງຈາກປາກລາຍ ຫາ ໄຊຍະບູລີ ປະມານ 140 ກິໂລແມັດ ພວກເຮົາບໍ່ຄ່ອຍໄດ້ແວ່ຖ່າຍຮູບປານໃດ ເນື່ອງຈາກເສັ້ນນີ້ເຄີຍຜ່ານມາ 3 – 4 ຄັ້ງແລ້ວ ບວກກັບອາກາດໃນຕອນບ່າຍຮ້ອນເອົ້າຫຼາຍຈຶ່ງບໍ່ເໝາະຕໍ່ການຖ່າຍຮູບປານໃດ, ພວກເຮົາແວ່ກິນເຂົ້າສວາຍທີ່ເທສະບານແຂວງໄຊຍະບູລີ. ຈາກນັ້ນ, ກໍມຸ່ງໜ້າສູ່ເມືອງໄຊສະຖານທັນທີ ດ້ວຍຫົວໃຈທີ່ຈົດຈໍ່ຄອງຄອຍ ແລະ ຕື່ນເຕັ້ນ.

ໄລຍະທາງຈາກເທສະບານແຂວງໄຊຍະບູລີ ຫາ ເມືອງໄຊສະຖານ ປະມານ 60 ກິໂລແມັດ ແຕ່ຕະຫຼອດເສັ້ນທາງທີ່ແຄບໆ ແລະ ຄ້ອຍຊັນຫຼາຍນັ້ນ ກໍເຮັດໃຫ້ການເດີນທາງໃຊ້ເວລາດົນພໍສົມຄວນ ເນື່ອງຈາກເປັນເສັ້ນທາງທີ່ຍັງບໍ່ເຄີຍຜ່ານມາກ່ອນ ຈຶ່ງມີຈຸດແວ່ພັກຖ່າຍຮູບເປັນຍ່ານໆ ເຊິ່ງສ່ວນໃຫຍ່ຈະເປັນພູສຸດສາຍຕາ.

ສະພາບອາກາດຕອນແລງມື້ນັ້ນຖືວ່າເປັນໃຈມີແສງລອດຈາກເມກອອກມາ ເຊິ່ງແຕ່ງແຕ້ມທຳມະຊາດໃຫ້ງົດງາມຫຼາຍຂຶ້ນ ແລະ ພວກເຮົາກໍໃຊ້ເວລາຖ່າຍຮູບຫຼາຍຂຶ້ນ ຈົນເວລາປະມານ 6:00 ໂມງແລງ ຈຶ່ງເດີນທາງມາຮອດຕົວເມືອງໄຊສະຖານ. ຈາກນັ້ນ, ກໍຟ້າວຂຶ້ນດອຍກາວ ຈຸດຊົມວິວ 360 ອົງສາ ແຕ່ໜ້າເສຍດາຍທີ່ຕາເວັນລັບຂອບຟ້າໄປແລ້ວ ມີພຽງແສງສີຍາມຄ້າຍຄໍ່າໃຫ້ຊົມຄວາມງົດງາມ ພວກເຮົາຖ່າຍຮູບໜ້ອຍໜຶ່ງແລ້ວກໍໄປຊອກທີ່ພັກ ແລະ ຫາກິນເຂົ້າຕື່ມພະລັງ.

ໄຊສະຖານ ເປັນເມືອງນ້ອຍ, ສະຖານທີ່ພັກ ແລະ ຮ້ານຂາຍເຄື່ອງກໍມີໜ້ອຍ ເຊິ່ງຕອນທີ່ໄປຮອດຮ້ານຂາຍເຄື່ອງແຫ້ງນັ້ນກໍໂຊກດີທີ່ຍັງບໍ່ປິດ ແຕ່ຫາກກາຍ 19:00 ໂມງ ກໍຈະປິດໝົດແລ້ວ.

ເມື່ອເຈົ້າຂອງຮ້ານຮູ້ວ່າພວກເຮົາເປັນນັກທ່ອງທ່ຽວທີ່ເດີນທາງມາແຕ່ໄກກໍຊວນລົມ ແລະ ເຊີນກິນເຂົ້ານຳ ແຕ່ພວກເຮົາກໍປະຕິເສດມີແຕ່ຂໍປັນເຂົ້ານຳເພິ່ນ ແລະ ຊື້ຂອງກິນຈຳນວນໜຶ່ງແລ້ວກໍກັບຂຶ້ນໄປທີ່ພັກເພື່ອກະກຽມເຂົ້າແລງ.

ທ້ອງຟ້າຄືນນັ້ນເຖິງຢູ່ຕົວເມືອງແຕ່ກໍເຫັນດວງດາວເຕັມທ້ອງຟ້າ ພວກເຮົາຈຶ່ງບໍ່ຊັກຊ້າໃນການອອກໄປດອຍກາວ ເຊິ່ງຢູ່ຫ່າງຈາກເຮືອນພັກປະມານ 200 – 300 ແມັດ ເພື່ອຖ່າຍດວງດາວ ແລະ ທາງຊ້າງເຜືອກ.

ຮຸ່ງອາລຸນວັນໃໝ່ຂ້ອຍລຸກຂຶ້ນກ່ອນໝູ່ຕາມສຽງໂມງປຸກຕອນ 6:00 ໂມງ. ຈາກນັ້ນ, ກໍຈັບກ້ອງອອກໄປຖ່າຍຮູບທີ່ຈຸດຊົມວິວດອຍກາວທັນທີ ເພາະເວລາບໍ່ຖ້າທ້ອງຟ້າງາມກຳລັງມາ, ບັນຍາກາດຍາມເຊົ້າງຽບສະຫງົບ ສາຍລົມຕົ້ນລະດູໜາວພັດມາເປັນຮູດໆ ແນມເບິ່ງທຳມະຊາດອັນງົດງາມກໍເຮັດໃຫ້ອີ່ມຫົວໃຈທີ່ໄດ້ເດີນທາງມາຮອດເມືອງໄຊສະຖານ ສົມໃຈຢາກ.

ແສງຕາເວັນຄ່ອຍໆລອດພົ້ນສາຍພູເປັ່ງສີທອງອັນງົດງາມຕ້ອງກົກໄມ້ໃບຫຍ້າເຫຼື້ອມຍິບຍັບ ເມື່ອຖ່າຍຮູບສຳເລັດແລ້ວກໍເຖິງເວລາທີ່ຕ້ອງໄດ້ເດີນທາງສູ່ເປົ້າໝາຍຕໍ່ໄປ ນັ້ນກໍຄືເມືອງປາກແບງ ແຂວງອຸດົມໄຊ ປະໄວ້ແຕ່ ຄວາມປະທັບໃຈໃຫ້ຢູ່ໃນຄວາມຊົງຈຳ ແລະ ຫວັງວ່າໃນຕໍ່ໜ້າພາກລັດ ແລະ ນັກທຸລະກິດຈະເຂົ້າມາພັດທະນາສະຖານທີ່ແຫ່ງນີ້ໃຫ້ມີ ຄວາມພ້ອມ ແລະ ດຶງດູດນັກທ່ອງທ່ຽວໄດ້ດີຍິ່ງຂຶ້ນ

ເມືອງໄຊສະຖານ ແຂວງໄຊຍະບູລີ ສ້າງຕັ້ງຂຶ້ນໃນວັນທີ 22 ທັນວາ 2009 ຫ່າງຈາກເທສະບານແຂວງໄຊຍະບູລີ ໄປທາງທິດຕາເວັນຕົກ ປະມານ 60 ກິໂລແມັດ, ມີເນື້ອທີ່ທັງໝົດ 896 ຕາລາງກິໂລແມັດ, ເປັນເຂດພູດອຍ ກວມເອົາ 100%, ທິດເໜືອຕິດກັບເມືອງຫົງສາ, ທິດໃຕ້ຕິດກັບເມືອງພຽງ, ທິດຕາເວັນອອກຕິດກັບເມືອງໄຊຍະບູລີ ແລະ ທິດຕາເວັນຕົກຕິດກັບຣາຊະອານາຈັກໄທ, ມີປະຊາກອນທັງໝົດ 15.200 ຄົນ ປະຊາຊົນສ່ວນໃຫຍ່ເປັນຊົນເຜົ່າໄປຣ່ ກວມເອົາ 99,06%.

ຈຸດເດັ່ນຂອງເມືອງໄຊສະຖານ ກໍຄືຕັ້ງຢູ່ຕາມສາຍພູເຮັດໃຫ້ມີຄວາມງົດງາມ ແລະ ແຕກຕ່າງຈາກບັນດາເມືອງອື່ນໆ. ຈາກທີ່ຕັ້ງດັ່ງກ່າວໄດ້ກາຍເປັນມົນສະເໜໜຶ່ງດຶງດູດຜູ້ຄົນໃຫ້ມາເບິ່ງມາສຳຜັດເມືອງນ້ອຍໆທີ່ຕັ້ງຢູ່ຈອມພູ ທີ່ມີສາຍພູນ້ອຍ – ໃຫຍ່ສຸດສາຍຕາ ເຮັດໃຫ້ມີທະເລໝອກທັງໃນລະດູໜາວ ແລະ ລະດູມຝົນ ໂດຍມີຈຸດຊົມວິວດອຍກາວ ຕັ້ງຢູ່ກາງເມືອງທີ່ສາມາດແນມເບິ່ງທິວທັດທຳມະຊາດແບບ 360 ອົງສາ.

ສຳລັບລະດູທີ່ຄວນມາຢ້ຽມຢາມກໍສາມາດມາໄດ້ທຸກລະດູ ແຕ່ລະດູໜາວກໍຈະສຳຜັດກັບອາກາດໜາວ ແລະ ທະເລໝອກ, ແຕ່ໃນລະດູຝົນກໍຈະມີທະເລໝອກທີ່ງົດງາມໄປອີກແບບ, ສ່ວນເສັ້ນທາງແມ່ນປູຢາງຕະຫຼອດທາງແຕ່ທາງຢາກແຄບໜ້ອຍໜຶ່ງ ແລະ ຄ້ອຍຊັນຫຼາຍ ຕ້ອງໃຊ້ຄວາມລະມັດລະວັງໃນການເດີນທາງພໍສົມຄວນ.

ສິ່ງຄວນເອົາໃຈໃສ່ຂອງນັກເດີນທາງ:

ດ້ານທີ່ພັກ: ມີບໍ່ຫຼາຍແຕ່ຈຸດຊົມວິວພື້ນທີ່ ກວ້າງ ສາມາດຕັ້ງເຕັ້ນນອນສຳຜັດທຳມະຊາດໄດ້

ອາຫານການກິນ: ເນື່ອງຈາກເປັນເມືອງນ້ອຍອາຫານການກິນທີ່ຖືກປາກຂອງຫຼາຍຄົນອາດບໍ່ມີໃຫ້ເລືອກ ຫາກທ່ານກັງວົນເລື່ອງອາຫານກໍຄວນຖືໄປພ້ອມຈະເປັນການດີ ເພາະທີ່ນັ້ນມີພຽງຮ້ານຂາຍເຄື່ອງທົ່ວໄປຈຳນວນໜຶ່ງທີ່ມີພຽງອາຫານແຫ້ງ, ສ່ວນຮ້ານເຝີເຂົ້າປຽກກໍເປັນພຽງກະຕູບນ້ອຍແຄມທາງທີ່ເປີດຊ້າປິດໄວ.

%d bloggers like this: