ມສ ວຽງຈັນ ໄດ້ຮັບການຢັ້ງຢືນເປັນໂຮງຮຽນຄຸນນະພາບການສຶກສາ 2 ພາສາ

ໂຮງຮຽນ ມສ ວຽງຈັນ ໄດ້ຮັບການຢັ້ງຢືນເປັນໂຮງຮຽນຄຸນນະພາບ ດ້ານການຮຽນ – ການສອນຫ້ອງສອງພາສາ ລາວ – ຝຣັ່ງ Label France Education ເປັນຄັ້ງທີ 2 ຕິດຕໍ່ກັນ ຈາກກະຊວງເອີຣົບ ແລະ ການຕ່າງປະເທດ ແຫ່ງປະເທດຝຣັ່ງ.

ພິທີມອບໃບຢັ້ງຢືນໂຮງຮຽນຄຸນນະພາບ Label France Education ດັ່ງກ່າວ ມີຂຶ້ນໃນວັນທີ 10 ມັງກອນຜ່ານມາ ທີ່ຫ້ອງປະຊຸມໂຮງຮຽນ ມສ ວຽງຈັນ ໂດຍເປັນກຽດຕາງໜ້າມອບຂອງ ທ່ານ ນາງ ເບເນດິກ ເດຊັງ ທູດວັດທະນະທໍາປະຈໍາສະຖານທູດຝຣັ່ງ ທັງເປັນຜູ້ອໍານວຍການສູນພາສາຝຣັ່ງ ປະຈໍາ ສປປ ລາວ ແລະ ຕາງໜ້າຮັບຂອງ ທ່ານ ນາງ ວຽງສຸວັນ ພະໄຊສົມບັດ ຜູ້ອໍານວຍການໂຮງຮຽນ ມສ ວຽງຈັນ, ມີ ທ່ານ ຮສ. ປອ. ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະ ກີລາ ພ້ອມດ້ວຍຕາງໜ້າຈາກກົມ, ຜູ້ປະສານງານ, ພະແນກ, ຫ້ອງການ, ໂຮງຮຽນອ້ອມຂ້າງ, ສະມາຄົມພໍ່ແມ່ນັກຮຽນ, ໂຮງຮຽນນາໆຊາດ, ພະນັກງານ, ຄູ – ອາຈານ ແລະ ນ້ອງນັກຮຽນເຂົ້າຮ່ວມເປັນສັກຂີພິຍານ.

ໂອກາດນີ້ ທ່ານ ນາງ ເບເນດິກ ເດຊັງ ກ່າວວ່າ: ການມອບໃບຢັ້ງຢືນຄຸນນະພາບການສຶກສາ Label France Education ໃຫ້ແກ່ໂຮງຮຽນ ມສ ວຽງຈັນ ຄັ້ງນີ້ ນັບວ່າເປັນຄັ້ງທີ 2 ຕິດຕໍ່ກັນ, ໃບຢັ້ງຢືນດັ່ງກ່າວ ແມ່ນອອກໃຫ້ໂດຍກະຊວງເອີຣົບ ແລະ ການຕ່າງປະເທດ ແຫ່ງປະເທດຝຣັ່ງ ເພື່ອຢັ້ງຢືນຄຸນນະພາບການຮຽນ – ການສອນທີ່ດີເລີດຂອງລະບົບການສິດສອນສອງພາສາໃນທົ່ວໂລກທີ່ສອນເປັນພາສາຝຣັ່ງ. ນອກຈາກນີ້, ຍັງສະແດງເຖິງການຮັບຮອງ ແລະ ຮັບຮູ້ອີກຄັ້ງຈາກປະເທດຝຣັ່ງ ກ່ຽວກັບຄຸນນະພາບການຮຽນ – ການສອນເປັນພາສາຝຣັ່ງຂອງໂຮງຮຽນ ມສ ວຽງຈັນ ເຊິ່ງໂຮງຮຽນແຫ່ງນີ້ແມ່ນໜຶ່ງໃນສະຖາບັນການສຶກສາທີ່ນອນຢູ່ໃນເຄືອຂ່າຍລະບົບການສິດສອນສອງພາສາ ທີ່ມີເຖິງ 285 ສາຍວິຊາສອງພາສາ ໃນ 53 ປະເທດທົ່ວໂລກ, ການທີ່ເປັນສະມາຊິກໃນເຄືອຂ່າຍລະດັບໂລກຖືເປັນໂອກາດທີ່ດີສໍາລັບສະຖາບັນທີ່ໄດ້ຮັບຮອງຄຸນນະພາບໃນການເຕົ້າໂຮມ ແລະ ແບ່ງປັນດ້ານຊັບພະຍາກອນ ແລະ ວິທີການປະຕິບັດດ້ານການສຶກສາທີ່ຖືກຕ້ອງ.

ທ່ານ ນາງ ຄຳຊ້ອຍ ວົງສຳພັນ ທີ່ປຶກສາໂຮງຮຽນ ມສ ວຽງຈັນ ພ້ອມທັງເປັນອາຈານສອນຢູ່ຫ້ອງສອງພາສາ ໃຫ້ສຳພາດວ່າ: ໂຮງຮຽນ ມສ ວຽງຈັນ ເປັນໂຮງຮຽນແຫ່ງທຳອິດທີ່ເປີດຮັບລະບົບການຮຽນສອງພາສາ ລາວ – ຝຣັ່ງ ໃນປີ 1995 ຈົນມາຮອດປັດຈຸບັນ ແລະ ເຫັນວ່າໄດ້ຮັບຜົນສຳເລັດພໍສົມຄວນສຳລັບການຮຽນ – ການສອນ, ຄູ – ອາຈານຈຳນວນໜຶ່ງໄດ້ໄປຝຶກອົບຮົມຢູ່ປະເທດຝຣັ່ງ, ໄດ້ຝຶກອົບຮົມຕໍ່ເນື່ອງ ແລະ ໄດ້ມີຄູຝຶກປະຈຳຢູ່ໃນແຕ່ລະແຂວງ ຄື: ນະຄອນຫຼວງວຽງຈັນ, ຫຼວງພະບາງ, ສະຫວັນນະເຂດ ແລະ ປາກເຊ. ນອກຈາກນີ້, ຍັງມີຄູຝຶກຢູ່ສູນກາງ, ມີຊ່ຽວຊານຝຣັ່ງ ມາປະຈຳເພື່ອຊ່ວຍເຫຼືອພວກເຮົາ.

ໂຮງຮຽນ ມສ ວຽງຈັນ ເປັນໂຮງຮຽນແຫ່ງທໍາອິດທີ່ເປີດຮັບລະບົບຫ້ອງຮຽນສອງພາສາ ລາວ – ຝຣັ່ງ ໃນປີ 1995 ເຊິ່ງການຮຽນ – ການສອນພາສາຝຣັ່ງ ເລີ່ມແຕ່ຊັ້ນປະຖົມປີທີ 3 ຈົນເຖິງມັດທະຍົມຕອນປາຍ. ຕະຫຼອດ 20 ປີຕໍ່ມາ ໂຮງຮຽນນີ້ໄດ້ກາຍເປັນໂຮງຮຽນຕົວແບບໃຫ້ແກ່ອີກ 3 ໂຮງຮຽນສາມັນສຶກສາພາຍໃນປະເທດ ທີ່ມີການຈັດການຮຽນ – ການສອນສອງພາສາ ລາວ – ຝຣັ່ງ.

ມສ ວຽງຈັນ ໄດ້ລາງວັນ Label France Education ຄັ້ງທໍາອິດ ໃນປີ 2016 ເຊິ່ງແມ່ນຄວາມພາກພູມໃຈສໍາລັບໂຮງຮຽນກໍຄືບັນດາຄູສອນທຸກຄົນ ແລະ ທຸກພາກສ່ວນທີ່ມີສ່ວນຮ່ວມດ້ານການສຶກສາ ແລະ ການຮຽນ – ການສອນສອງພາສາ ລາວ – ຝຣັ່ງ, ການທີ່ໄດ້ຮັບລາງວັນ Label France Education ຖືເປັນໝາກຜົນຂອງການຮ່ວມມືລະຫວ່າງປະເທດ ລາວ ແລະ ຝຣັ່ງ ໃນຂະແໜງການສຶກສາ ແລະ ເປັນສິ່ງທີ່ຢັ້ງຢືນຄຸນນະພາບດີເລີດຂອງລະບົບການຮຽນ – ການສອນສອງພາສາຂອງລັດ.

[ ຂ່າວ – ຮູບ: ແກ້ວ ]

%d bloggers like this: