2 ຈໍາເລີຍຕ້ອງໂທດປະຫານຖານຄ້າ-ຂາຍຢາເສບຕິດ

ການຄ້າ-ຂາຍຢາເສບຕິດ ຮູ້ຢູ່ເປັນສິ່ງທີ່ຜິດກົດໝາຍແຕ່ຫຼາຍຄົນກໍ່ຍອມສ່ຽງເພື່ອໃຫ້ໄດ້ລ້ຳລວຍທາງລັດ ຫາກຜົນສຸດທ້າຍເມື່ອຖືກຈັບໄດ້ກໍ່ກາຍເປັນເລື່ອງໃຫຍ່ເສຍທັງເງິນ, ເສຍອະນາຄົດ, ເສຍຄວາມມຸ້ງຫວັງຕັ້ງໃຈຂອງຄົນທີ່ເປັນພໍ່ແມ່ພີ່ນ້ອງຜູ້ຫວັງດີ ທີ່ສຳຄັນໄດ້ນອນລຳບາກໃນຄຸກຍາວຫຼາຍປີ ຫຼື ຕະຫຼອດຊີວິດຄືຄະດີລາຍນີ້ທີ່ແຂວງສາລະວັນ.

ພາບປະກອບຂ່າວ

 

ຄະນະສານອາຍາ ສານປະຊາຊົນຂັ້ນຕົ້ນແຂວງສາລະວັນ ໄດ້ຕັດສິນປະຫານຊີວິດ 2 ຈຳເລີຍ ຄະດີຄ້າຂາຍຢາເສບຕິດ ຊື່ ທ້າວ ບຸນລ້ຽງ ອາ ຍຸ 32 ປີ ຢູ່ບ້ານເທດສະບານ ແລະ ທ້າວ ຄຳພຸດ ອາຍຸ 38 ປີ ບ້ານຕຸກລຸກ ເມືອງ ຕຸ້ມລານ ແຂວງ ສາລະວັນ ທັງສອງຖືກເຈົ້າໜ້າທີ່ຕໍາຫຼວດກັກຕົວ ໃນວັນທີ 11 ກໍລະກົດ 2017 ພ້ອມຂອງກາງຢາບ້າ 39.259 ເມັດ ໜັກ 3.780,43 ກຼາມ.

 

ພາບປະກອບຂ່າວ

 

ໃນຫ້ອງປະຊຸມສານ, ໄອຍະການປະຊາຊົນແຂວງ ໄດ້ຖະແຫຼງສຳນວນຄະດີດັ່ງກ່າວວ່າ: ຈໍາເລີຍທັງ 2 ຄົນ ໄດ້ມີການສົມຮູ້ຮ່ວມຄິດລັກລອບຄ້າຂາຍຢາເສບຕິດກັບຄົນຫວຽດນາມ ຊື່ ທ້າວ ຕຸງ ແລະ ທ້າວ ລາມ ມາແຕ່ວັນທີ 2 ກໍລະກົດ 2017 ທັງ 2 ຄົນນີ້ບໍ່ຮູ້ບ່ອນພັກເຊົາທີ່ແນ່ນອນ ຕໍ່ກັບການພົວພັນຂອງພວກກ່ຽວ ເບື້ອງຕົ້ນຈໍາເລີຍທັງສອງໄດ້ຮູ້ຈັກກັບ ທ້າວ ຕຸງ ແລະ ທ້າວ ລາມ ຢູ່ພາຍໃນເທດສະບານເມືອງ. ຕໍ່ມາທ້າວ ຕຸງ ແລະ ທ້າວ ລາມ ໄດ້ແວ່ຢາມຄອບຄົວຈໍາເລີຍທັງສອງຄົນ ແລະ ມີການສັງສັນເປັນປະຈໍາ.

 

ພາບປະກອບຂ່າວ

 

ຫຼາຍວັນຕໍ່ມາ, ທ້າວ ຕຸງ ໂທລະສັບຫາ ທ້າວ ບຸນລ້ຽງ (ຈໍາເລີຍ 1 ເພື່ອຕິດຕໍ່ຊື້ຢາບ້າ) ຈໍານວນ 20 ມັດ. ຈາກນັ້ນ, ທ້າວ ບຸນລ້ຽງ ໄດ້ຕິດຕໍ່ຫາໝູ່ ຊື່ ທ້າວ ຄໍາພຸດ (ຈໍາເລີຍ 2) ຈາກນັ້ນ, ຈໍາເລີຍ 2 ໄດ້ຕິດຕໍ່ພົວພັນເອົາຢາບ້າຈໍານວນ 20 ມັດ ນໍາ ທ້າວ ຄໍາຜຸຍ, ທ້າວ ບຸນນ້ອຍ ແລະ ທ້າວ ສົມ ບູນ.
ພາຍຫຼັງ, ໄດ້ຢາບ້າຄົບຕາມຈໍານວນແລ້ວ ຈຶ່ງໃຫ້ຈໍາເລີຍ 1 ໂທຫາ ທ້າວ ຕຸງ ແລະ ທ້າວ ລາມ ໃຫ້ແລກປ່ຽນເງິນໂດລາເປັນເງິນກີບ ເພາະເຈົ້າຂອງຢາບ້າບໍ່ເອົາເງິນໂດລາ ແລ້ວນັດສົ່ງຢາບ້າ ໃຫ້ກັນຢູ່ຊາຍແດນລາວ-ຫວຽດນາມ.

 

ພາບປະກອບຂ່າວ

 

ຕົກມາຮອດ ວັນທີ 11 ກໍລະກົດ 2017 ຈໍາເລີຍທັງສອງຈຶ່ງ ເອົາຢາບ້າຈໍານວນດັ່ງກ່າວໃສ່ເປົາແລ້ວພາກັນຂີ່ລົດຈັກອອກໄປສົ່ງຢາບ້າໃຫ້ຜູ້ສັ່ງຊື້ຕາມການນັດສົ່ງ ພໍຂີ່ລົດຈັກອອກຈາກບ້ານເທດສະບານເມືອງຕະໂອ້ຍ ຮອດຫົວຂົວເຊໂປນ ເມືອງສະໝ້ວຍ ຖືກເຈົ້າໜ້າທີ່ກັກຕົວພ້ອມຂອງກາງຈຳນວນ 39.259 ເມັດ.

 

                                                                                       ພາບປະກອບຂ່າວ

 

ໂດຍອີງຕາມກົດໝາຍວ່າດ້ວຍການປັບປຸງມາດຕາ 146 ຂອງກົດໝາຍອາຍາ ແລະ ມາດຕາ 75, 76 ຂອງກົດໝາຍວ່າດ້ວຍຢາເສບຕິດ ມາດຕາ 2 ທີ່ໄດ້ກໍານົດວ່າ: ບຸກຄົນໃດຫາກຜະລິດ, ປຸງແຕ່ງ ຫຼື ມີຢາເສບຕິດໄວ້ຄອບຄອງ, ຄ້າຂາຍ, ຈໍາໜ່າຍ, ນໍາເຂົ້າ, ສົ່ງອອກ, ຂົນສົ່ງ ຫຼື ນໍາຢາອີ-ຢາບ້າ, ຢາໄອສ໌ ຫຼື ວັດຖຸອອກລິດຕໍ່ຈິດປະສາດຜ່ານ ສປປ ລາວ ເກີນກວ່າ 500 ກຼາມ ຂຶ້ນໄປຈະຖືກ ລົງໂທດປະຫານຊີວິດ.
ດັ່ງນັ້ນ, ຕາມການຄົ້ນຄວ້າບັນດາຂໍ້ມູນ, ຫຼັກຖານ ແລະ ຄໍາສາລະພາບຂອງຈໍາເລີຍໃນ ຫ້ອງປະຊຸມສານແລ້ວ ຄະນະສານອາຍາ ຈຶ່ງລົງໂທດປະຫານຊີວິດ ທ້າວ ບຸນລ້ຽງ ແລະ ທ້າວ ຄຳພຸດ ສະຖານ ຄ້າ-ຂາຍຢາເສບຕິດ.

 

 

 

ທີ່ມາ: ຂ່າວໜັງສືພິມຄວາມສະຫງົບ

%d bloggers like this: